އެމެރިކާގެ ސިޔާސީ ތާރީޚުގައި އެންމެ ބޮޑަށް ފާހަގަކުރެވޭ އެއް މައްސަލަ ކަމަށްވާ ޖެފްރީ އެޕްސްޓައިންގެ މައްސަލައިގައި، އެމެރިކާގެ ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން ބަންދު ކުރެވިފައިވާ ދޮރުތަކެއްގެ ފަހަތުގައި ހަ ގަޑިއިރަށްވުރެ ގިނަ އިރުވަންދެން ބަޔާން ދެއްވައިފިއެވެ.

ފެބްރުއަރީ 26، 2026 ގައި ހައުސް އޯވަސައިޓް ކޮމިޓީއަށް ދެއްވި މި ބަޔާނުގައި ހިލަރީ ވަނީ، އެޕްސްޓައިން ހިންގި ޖަރީމާތަކުގެ އެއްވެސް މައުލޫމާތެއް އެކަމަނާއަށް އެނގިވަޑައިގެންފައިނުވާ ކަމަށާއި، އަދި އޭނާއާ ދުވަހަކުވެސް ބައްދަލުވެފައި ނުވާ ކަމަށް ވިދާޅުވެފައެވެ.

ކޮންގްރެސްގެ އަމުރަށް ނުކިޔަމަންތެރިވުމުގެ ދައުވާ އުފުލިދާނެ ކަމުގެ ބިރު އޮތުމުން ދެއްވި މި ބަޔާނަކީ، އެޕްސްޓައިންގެ ނުފޫޒުގަދަ ގުޅުންތައް ހޯދުމަށް ކުރާ ތަހުގީގަށް ލިބުނު ބޮޑު ކުރިއެރުމެކެވެ.

"ސިޔާސީ ކުޅިވަރެއް" އަދި ވަރުގަދަ ދޮގުކުރުން ތަކެއް
މި ބަޔާން ދެއްވުމަށްފަހު ހިލަރީ ވަނީ ރިޕަބްލިކަން ޕާޓީގެ މެންބަރުންނަށް ވަރަށް ބޮޑަށް ފާޑުވިދާޅުވެފައެވެ.

އެކަމަނާ ސިފަކުރެއްވި ގޮތުގައި މިއީ "ޕާޓީގެ މަސްލަހަތު އޮތް ސިޔާސީ ކުޅިވަރެކެވެ." ސޯޝަލް މީޑިއާގައި ހިއްސާ ކުރެއްވި ބަޔާނެއްގައި އެކަމަނާ ވިދާޅުވިއެވެ:

"އަޅުގަނޑު ހަނދާންވާ ގޮތުގައި އެޕްސްޓައިންއާ ދުވަހަކުވެސް ބައްދަލެއް ނުވޭ. އޭނާގެ ބޯޓެއްގައި ނުވަތަ ރަށެއްގައި، ނޫނީ އޮފީހެއްގައިވެސް އަޅުގަނޑު ނޫޅެން. މިކަމާ ބެހޭގޮތުން އިތުރަށް ދައްކާނެ ވާހަކައެއް ނެތް." ހިލަރީ ވިދާޅުވި އެވެ.

އެޕްސްޓައިންގެ ބައިވެރިޔާ ގިލެއިން މެކްސްވެލް އަކީ "ދަންނަ މީހެއް" ކަމަށް އެއްބަސްވި ނަމަވެސް އޭނާ ވަނީ 2010 ވަނަ އަހަރު ޗެލްސީ ކްލިންޓަންގެ ކައިވެންޏަށް މެހެމާނެއްގެ ބައިވެރިއެއްގެ ގޮތުގައި ގޮސްފައެވެ، ހިލަރީ ވިދާޅުވީ އެކަމަނާ މިކަމުގެ ތެރެއަށް ވައްދަނީ އަސްލު މައްސަލައިން މީހުންގެ ސަމާލުކަން އަނބުރާލުމަށް ކަމަށެވެ.
ބަޔާން ދެއްވަމުން ދަނިކޮށް، ހިލަރީ އިންނެވި ފޮޓޯއެއް ސޯޝަލް މީޑިއާގައި ލީކުވުމާ ގުޅިގެން މައްސަލަ ކުޑަކޮށް މެދުކަނޑާލަން ޖެހުނެވެ. މިކަމާ ގުޅިގެން ހިލަރީ ވަނީ، މި އަޑުއެހުންތައް ސިއްރު ކޮށްގެން ކުރިއަށް ގެންދިއުމުގެ ބަދަލުގައި، އާންމުންނަށް ހުޅުވާލައިގެން ކުރިއަށް ގެންދިއުމަށް އަނެއްކާވެސް ގޮވާލައްވާފައެވެ.

ހިލަރީގެ ބަޔާނަށްފަހު، މިހާރު އެންމެ ބޮޑަށް ގޮވާލެވެމުން ދަނީ ރައީސް ޑޮނަލްޑް ޓްރަމްޕްވެސް ކޮމިޓީއަށް ހާޒިރުކޮށް ބަޔާން ނެގުމަށެވެ.

ރޮބަޓް ގާސިއާ (ޑިމޮކްރެޓް) ވިދާޅުވީ ކްލިންޓަން އާއިލާއިން ބަޔާން ދޭ ނަމަ، ޓްރަމްޕްވެސް ހާޒިރުވެ ސުވާލުތަކަށް ޖަވާބު ދާރީވާން ޖެހޭނެ ކަމަށެވެ. އަދި ޑީ.އޯ.ޖޭ އިން ގެއްލިފައިވާ ބައެއް ފައިލްތަކުގައި ޓްރަމްޕާ ދެކޮޅަށް ސީރިއަސް ތުހުމަތުތަކެއް ހުރެދާނެ ކަމަށް އޭނާ ތުހުމަތު ކުރެއްވިއެވެ.

ޓްރަމްޕް ހާޒިރުކުރުމާ މެދު ގާނޫނީ އަދި ސިޔާސީ ބޮޑެތި ބަހުސްތަކެއް ކުރިއަށްދާނެ ކަމަށް ބެލެވެއެވެ.

މި ތަހުގީގު އަދި ނިމުމަކާ ގާތެއް ނުވެއެވެ. ކުރީގެ ރައީސް ބިލް ކްލިންޓަންވެސް ބަޔާން ދެއްވުމަށްވެސް ވަނީ ހަމަޖެހިފައެވެ. މިއީ އެމެރިކާގެ ކުރީގެ ރައީސަކު މިފަދަ ތަހުގީގަކަށް ބަޔާން ދެއްވާ ފުރަތަމަ ފަހަރެވެ.

ކޮމިޓީގެ މުގައްރިރު ޖޭމްސް ކޯމާ ވިދާޅުވީ، ގާނޫނީ ގޮތުން ބަލަންޖެހޭ ކަންކަން ބެލުމަށްފަހު ބަޔާނުގެ ވީޑިއޯ އާއި ލިޔުންތައް އާންމުކުރާނެ ކަމަށެވެ.