25 ފެބްރުއަރީ 2026 ގައި ބޭއްވުނު ތާރީޚީ ރަސްމިއްޔާތެއްގައި، އިންޑިއާގެ ބޮޑުވަޒީރު ނަރެންދުރަ މޯދީ އަކީ އިޒްރޭލުގެ ޕާލަމެންޓުގެ އެންމެ މަތީ ޝަރަފު ކަމަށްވާ "ސްޕީކަރ އޮފް ދަ ކްނެސެޓް މެޑަލް" އެރުވުނު ބޭރު ގައުމެއްގެ ފުރަތަމަ ލީޑަރަށް ވެވަޑައިގެންފިއެވެ.

މި މެޑަލް މޯދީއަށް އެރުވީ ގުދުސްގައި ހުންނަ އިޒްރޭލުގެ ޕާލަމެންޓް (ކްނެސެޓް) ގައި އެމަނިކުފާނު ދެއްވި ތާރީޚީ ތަޤުރީރަށްފަހު، ކްނެސެޓްގެ ސްޕީކަރ އާމިރް އޯހާނާ އެވެ. މިއީ އިންޑިއާ އާއި އިޒްރޭލުގެ ގުޅުން ހަމައެކަނި ޚާރިޖީ ގުޅުމަކުން ބަދަލުވެ، "ދެ ގައުމުގެ ދެމެދުގައި އޮތް އަޚުވަންތަކަމެއްގެ" ރަމްޒެކެވެ.

"ސްޕީކަރ އޮފް ދަ ކްނެސެޓް މެޑަލް" އަކީ އިޒްރޭލަށާއި ޔަހޫދީންނަށް ބޮޑެތި ޚިދުމަތްތަކެއް ކޮށްދެއްވާ ބޭފުޅުންނަށް އެރުވުމަށް އަލަށް ތައާރަފްކުރި ޝަރަފެކެވެ. މި ޝަރަފު ލިބުނު އެންމެ ފުރަތަމަ ބޭފުޅަކަށް މޯދީ ވެވަޑައިގަތުމުން ދޭހަވަނީ އިންޑިއާއާއެކު އޮތް ގުޅުމަކީ ހަމައެކަނި ސަރުކާރަކުން ބާއްވާ ގުޅުމެއް ނޫން ކަމާއި، އެއީ މުޅި އިޒްރޭލުގެ ގާނޫނު ހަދާ މަޖިލީހުން ބަލައިގަންނަ ގުޅުމެއް ކަމެވެ.

ދިފާއީ، ސައިބަރ ސެކިއުރިޓީ އަދި ދަނޑުވެރިކަމުގެ ދާއިރާއިން ދެ ގައުމުގެ ގުޅުން އާ އުސްމިންތަކަކަށް ގެންގޮސްދެއްވުމުގައި މޯދީ ކުރެއްވި މަސައްކަތް ސްޕީކަރ އާމިރް އޯހާނާ ފާހަގަކުރެއްވިއެވެ. އަދި  ކްނެސެޓްގައި މޯދީ ދެއްވި ތަޤުރީރަށް ޕާލަމެންޓުގެ ހުރިހާ މެންބަރުން ވަނީ ކޮޅަށް ތެދުވެ ވަރަށް ބޮޑަށް މަރުޙަބާ ދަންނަވާފައެވެ.

މޯދީގެ ތަޤުރީރުގައި ފާހަގަކުރެއްވި މުހިންމު ކަންކަމުގެ ތެރޭގައި، 2000 އަހަރަށްވުރެ ކުރިން އިންޑިއާ އާއި އިޒްރޭލާ ދެމެދު އޮތް ވިޔަފާރީގެ ގުޅުންތަކުގެ ތަކާއި، ޓެރަރިޒަމަށް އިންޑިއާއިން "ޒީރޯ ޓޮލަރެންސް" ގެންގުޅޭނެ ކަމަށާއި، އިޒްރޭލުގެ ހިތާމައިގައި އިންޑިއާ ބައިވެރިވާ ކަމަށް ވިދާޅުވިއެވެ.

މޯދީގެ ތަޤުރީރު ނިންމަވާލައްވަމުން ހީބްރޫ ބަހުން "އަމް އިޒްރޭލް ޚާއި" (އިޒްރޭލުގެ ރައްޔިތުން ދެމިއޮންނާނެ) އޭ ވިދާޅުވުމުން، މުޅި މަޖިލީހުގައި "މޯދީ، މޯދީ" އޭ ކިޔައި އަޑުގަދަ ވެގެން ދިޔައެވެ.

ބޮޑުވަޒީރު މޯދީއަށް އެރުވުނު ޝަރަފްގެ މެޑަލްއަކީ ވަރަށް ފުރިހަމަ ފަރުމާއެއްގެ މައްޗަށް ތައްޔާރުކޮށްފައިވާ އެއްޗެކެވެ. ރަނުން ޕްލޭޓްކޮށްފައިވާ ބްރޮންޒް އިން ތައްޔާރުކޮށްފައިވާ މި މެޑަލްގެ އެއްފަރާތުގައި ކްނެސެޓް އިމާރާތާއި އިޒްރޭލުގެ ދައުލަތުގެ ނިޝާން ކުރަހާފައިވެއެވެ.

މެޑަލްގެ ވަށައިގެން ވެސްޓަން ވޯލް (Western Wall) ގެ ގާތައް ކުރަހާފައިވާއިރު، އަނެއް ފަރާތުގައި އޮންނަނީ ކްނެސެޓްގެ ޕްލީނަމް ހޯލެވެ. މެޑަލްގައި ބައިބަލްގެ އާޔަތެއް ކަމަށްވާ "ޝަރަފާއި މާތްކަމުގެ ތާޖު އެމަނިކުފާނަށް އެރުވިއެވެ" މިފަދަ އިބާރާތެއް ލިޔެފައިވެއެވެ.

މި ޝަރަފާއެކު، މިހާރު މޯދީއަކީ އިޒްރޭލުގެ އެންމެ މަތީ ޝަރަފާއި ފަލަސްތީނުގެ އެންމެ މަތީ ޝަރަފު (ގްރޭންޑް ކޮލަރ އޮފް ދަ ސްޓޭޓް އޮފް ޕަލަސްޓައިން – 2018 ގައި) ލިބިވަޑައިގަތް މަދު ލީޑަރުންގެ ތެރެއިން ބޭފުޅެކެވެ.