މީޑިއާ ކޮމިޝަނުން ނުރުހޭ ކޮންމެ ހިނދެއްގައި، މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ރައްޔިތުންގެ މަޖިލީހުގެ އަމިއްލަ މެންބަރަކު ބިލެއް ހުށަހަޅައިފައިވަނީ ހިޔާލުފާޅުކުރުމުގެ މިނިވަންކަމަށް ކަނޑައެޅިގެން ހުރަސް އަޅައި، ނޫސްތަކާއި މީިޑިއާތައް ބަންދުކޮށް، ޑިމޮކްރަސީގެ ހަތަރުވަނަ ބާރުގެ ގޮތުގައި ނޫސްވެރިންނާއި މީޑިއާތަކުން އަދާކުރަމުންދާ ދައުރު މުޅިން ނައްތައިލުމަށް ޓަކައި ކަމަށް އެމްޑީޕީން ބުނެފި އެވެ.

އެމްޑީޕީން މިއަދު ނެރުނު ނޫސްބަޔާނެއްގައި ބުނީ ނޫސްވެރިންނާއި މީޑިއާތައް ސަރުކާރުގެ ކޮންޓްރޯލްގެ ދަށުން މަސައްކަތްކުރަންޖެހޭ ގޮތައް ހަދައި، ނޫސްވެރިކަމުގެ މިނިވަންކަމާއި ހިޔާލުފާޅުކުރުމުގެ މިނިވަންކަމަށް ހުރަސްއެޅުމަށް، ރައްޔިތުންގެ މަޖިލީހަށް ހުށަހަޅައިފައިވާ، މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ބިލާ ގުޅޭ ގޮތުން، މީޑިއާތައް ތަމްސީލުކުރާ ފަރާތްތަކާއި، ނޫސްވެރިންގެ ޖަމިއްޔާ (މޯލްޑިވްސް ޖަރނަލިސްޓް އެސޯސިއޭޝަން) ގެ ބޭފުޅުން މިއަދު ވަނީ އެމްޑީޕީއާ ބައްދަލުކޮށް އެ ބިލާމެދު ނޫސްވެރިންގެ ހުރި ނުހަނު ބޮޑެތި ގިނަ ކަންބޮޑުވުންތަކެއް ހިއްސާކޮށްފައި ކަމަށެވެ.

ނޫސްވެރިންގެ ފަރާތުން ހިއްސާކުރި ކަންކަމުގެ ތެރޭގައި، އެންމެ ބޮޑު އެއް ކަންބޮޑުވުމަކީ، މީޑިއާތަކުގެ ރެގިއުލޭޓަރީ އިދާރާއެއްގެ ގޮތުގައި، މީޑިއާގެ ވޯޓާއެކު އިންތިހާބުވެގެން އެކުލަވައިލައިފައިވާ މިނިވަން މީޑިއާ ކައުންސިލް އުވައިލައި، ސަރުކާރުގެ ކޮންޓްރޯލް އޮންނަ ގޮތަށް އެކުލަވައިލާ މީޑިއާ ކޮމިޝަނަކަށް، މީޑިއާތައް ރެގިއުލޭޓްކުރުމުގެ ބާރު ދޭ ގޮތަށް އޮތް އޮތުން ކަމަށް އެމްޑީޕީން ބުންޏެވެ.  ބިލުގައި އޮތް ގޮތުންނަމަ، މި ކޮމިޝަނުގައި ހިމެނޭ 7 މެންބަރުންގެ ތެރެއިން 4 މެމްބަރުންނަކީ ސީދާ ރައީސުލްޖުމްހޫރިއްޔާ އައްޔަނުކުރާ މެންބަރުންނެވެ. މީގެ އިތުރުން، ކޮމިޝަންގެ ހިންގުމުގެ އެންމެ އިސް ފަރާތްތައް ކަމުގައިވާ ކޮމިޝަންގެ ރައީސް އަދި ނާއިބު ރައީސަކު ކަނޑައެޅުމުގެ ބާރުވެސް ދީފައިވަނީ ރައީސުލްޖުމްހޫރިއްޔާއަށެވެ. ނޫސްވެރިކަމުގެ މިނިވަންކަން ކުރިއެރުވުމަކީ، މި ބިލުގެ އިސް އެއް މަގްސަދު ކަމަށް ބަޔާންކޮށްފައިވާއިރު، ބިލުގެ އެންމެހައި މާއްދާތަކެއް ފަރުމާކޮށްފައިވަނީ، ނޫސްވެރިންގެ މަސައްކަތުގައި އެފަރާތްތަކަށް އޮންނަ އެންމެހައި މިނިވަންކަމެއް ހަނިވެގެންދާ ގޮތަށް ކަމަށް އެމްޑީޕީން ބުންޏެވެ.

"މީޑިއާ ކޮމިޝަނުން ނުރުހޭ ކޮންމެ ހިނދެއްގައި، މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ބިލުގައި ހިމަނައިފައިވާ މާއްދާތަކަކީ ވެސް، ހިޔާލުފާޅުކުރުމުގެ މިނިވަންކަމަށް ކަނޑައެޅިގެން ހުރަސް އަޅައި، ނޫސްތަކާއި މީިޑިއާތައް ބަންދުކޮށް، ޑިމޮކްރަސީގެ ހަތަރުވަނަ ބާރުގެ ގޮތުގައި ނޫސްވެރިންނާއި މީޑިއާތަކުން އަދާކުރަމުންދާ ދައުރު މުޅިން ނައްތައިލުމަށް ޓަކައި ހިމަނައިފައިވާ މާއްދާތަކެއްކަން ފާހަގަކުރަމެވެ." އެމްޑީޕީން ބުންޏެވެ.

ނޫސްވެރިން އަމަލުކުރަންޖެހޭ ސުލޫކީ މިންގަނޑާ ގުޅޭ ގޮތުން ބިލުގައި ހިމަނައިފައި ހުރި ކަންކަމުގެ ގޮތުގައި، މީހެއްގެ ހުރުމަތާއި، އިއްޒަތާއި ގަދަރަށް އުނިކަން އަންނަ ބަސްތައް ޝާއިއުނުކުރުމާއި، ވަކި ފަރާތަކަށް ބުރަވުމެއްނެތި ހަބަރު ގެނެސްދޭން ޖެހޭނެ ކަމަށް ބަޔާންކޮށްފައި ހުރި މާއްދާތައް ސިފަކުރެވެނީ، ސަރުކާރުން ކުރާ ނޭދެވޭ ކަންކަމާއި ސަރުކާރަށް ފާޑުކިޔުން އަމާޒުވާ ގޮތަށް ގެނެސްދޭ އެއްވެސް ހަބަރެއް ފެތުރުނަނުދިނުމުގެ މަގްސަދުގައި ހިމަނައިފައިވާ މާއްދާތަކެއްގެ ގޮތުގައި ނޫސްވެރިން ދެކޭ ކަމަށް އެމްޑީޕީން ބުންޏެވެ.

އެމްޑީޕީން ބުނީ ރައްޔިތުންނާ ގުޅިފައިވާ ކަންކަމުގެ ހަބަރު، ހާމަކަމާއި ދެފުށްފެންނަ އުސޫލަކުން ރައްޔިތުންނާ ހިސާބަށް ފޯރުކޮށްދިނުމުގައްޔާއި ސަރުކާރާއި ރައްޔިތުންގެ މަންދޫބުން ޖަވާބުދާރީކުރުވުމުގައި ވެސް ނޫސްވެރިންނަކީ މުހިންމު ދައުރެއް އަދާކުރާ ބައެއް ކަމަށެވެ.

ޑިމޮކްރަސީގެ އުސޫލުތައް ނަގަހައްޓައި، ސަރުކާރަކުން މަސައްކަތްކުރަންވާނީ، ވީހާވެސް ފުޅާދާއިރާއެއްގައި ނޫސްވެރިކަމުގެ މަސައްކަތްކުރެވޭނެ ޖާގަ ތަނަވަސްކޮށްދިނުމަށް ކަމަށް ވާއިރު، މި ކަމުގެ، ނޫސްވެރިކަމުގެ ދާއިރާގައި ރާއްޖެ ހާސިލްކޮށްފައިވާ ކުރިއެރުމާއި ކާމިޔާބީތައް އެތަށް ގުނައަކުން ފަހަތަށް ސޮއްސައިިލާނެކަމުގެ ކަންބޮޑުވުންވެސް ނޫސްވެރިންގެ މެދުގައި އެބައޮތް ކަމަށް އެމްޑީޕީން ބުންޏެވެ.

"މިއީ، ނޫސްވެރިކަމުގެ މިނިވަންކަން އިންތިހާ ދަރަޖައަށް ހަނިވެ، ނޫސްވެރިންގެ މަސައްކަތްތަކުގައި ގިނަ ގުނަ ގޮންޖެހުންތަކާ ކުރިމަލާންޖެހޭނެ ކަމެެއްކަން ނޫސްވެރިންގެ ވާހަކަތަކުން ފާހަގަވެފައިވެއެވެ." އެމްޑީޕީން ބުންޏެވެ.

އެހެންކަމާއެކު، މި ބިލު އަނބުރައި ގެންދިއުމަށް ސަރުކާރަށް ގޮވައިލާ ކަމަށް އެމްޑީޕީން ބުންޏެވެ.

ނޫސްވެރިންގެ ހުރި ކަންބޮޑުވުންތަކަށް ހައްލު ހޯދުމަށް ޓަކައި ޒިންމާދާރު އިދިކޮޅު ޕާޓީގެ ހައިސިއްޔަތުން، ކުރަންޖެހޭ އެންމެހައި މަސައްކަތެއް ކުރުމަށް އެމްޑީޕީން ނިންމައިފައިވާކަމަށް އެ ޕާޓީން ބުންޏެވެ.