މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ބޮޑު ހިޔާނާތުގެ މައްސަލާގައި އެންޓި ކޮރަޕްޝަން ކޮމިޝަން (އޭސީސީ) އިން ކުރީގެ ރައީސް އަބުދުﷲ ޔާމީން އަބްދުލްގައްޔޫމުގެ މައްޗަށް ކުރިއަށް ގެންދިޔަ، ތަހުގީގާ ގުޅިގެން ބޭންކު އޮފް މޯލްޑިވްސް (ބީއެމްއެލް) ގައި ހުޅުވި އެސްކްރޯ އެކައުންޓަށް ޔާމީންގެ އެކައުންޓުން ޖަމާކުރި 1 މިލިއަން ޑޮލަރު ބީއެމްއެލްއަށް ދޫކުރެވޭނެ ކަމަށް އޭސީސީން ބުނެފިއެވެ.

މި މައްސަލައަކީ އެމްއެމްޕީއާރުސީ ހިޔާނާތުގެ މައްސަލައާއި ގުޅިގެން ދައުލަތުން ޔާމީންގެ މައްޗަށް ކުރި މަނީ ލޯންޑަރިންނާއި ރިޝްވަތު ގަބޫލު ކުރުމުގެ ދައުވާ ޔާމީންގެ މައްޗަށް ސާބިތު ނުވާތީ އާއި އެސްކްރޯ އެއްބަސްވުމުގެ މުއްދަތު ހަމަވި ފަހުން ޔާމީންގެ އެކައުންޓަށް 1 މިލިއަން ޑޮލަރު ޖަމާނުކޮށް ހިފެހެއްޓި މައްސަލައިގައި، އެ 1 މިލިއަން ޑޮލަރު ހޯއްދެއްވުމަށް  އޭސީސީ އާއި ބީއެމްއެލްއާއި ދެކޮޅަށް ސިވިލް ކޯޓަށް ޔާމީންގެ ފަރާތުން ހުށަހެޅުއްވި މައްސަލައެކެވެ.

ސިވިލް ކޯޓުގައި މި ދައުވާއަށް ޖަވާބުދާރީ ވަމުން، ބޭންކާ ދެކޮޅަށް ދައުވާ ނުކުރެވޭނެ ކަމަށްބުނެ ބީއެމްއެލްއިން އިޖުރާއީ ނުކުތާއެއް ނެގިއެވެ. ނަމަވެސް އެ އިޖުރާއީ ނުކުތާ ބަލައި ނުގަނެ ސިވިލް ކޯޓުން ނިންމީ އޭސީސީގެ އިތުރުން ބީއެމްއެލްގެ މައްޗަށްވެސް ޔާމީނަށް ދައުވާ ކުރެވޭނެ ކަމަށެވެ. ސިވިލް ކޯޓުގެ އެ ނިންމުން ގާނޫނު ތަކާއި ހިލާފު ކަމަށް ބުނެ ބީއެމްއެލްއިން އެ މައްސަލަ ހައި ކޯޓުގައި އިސްތިއުނާފު ކުރިއެވެ.

މިއަދުގެ އަޑު އެހުމަކީ ހައި ކޯޓުގައި ބޭއްވި އެ މައްސަލައިގެ ދެވަނަ އަޑުއެހުމެވެ.

މީގެކުރިން އޮތް އަޑު އެހުމުގައި ހައިކޯޓަށް މައްސަލަ ހުށަހަޅުއްވަމުން ބީއެމްއެލްގެ ގާނޫނީ ވަކީލު މޫސާ ފާރިޝް އަހުމަދު ވިދާޅުވީ، ޔާމީން ސޮއި ކުރެއްވި އެސްކްރޯ އެއްބަސްވުމުގައި ބޭންކަށް އެސްކްރޯ އެޖެންޓެއްގެ ދައުރު ދީފައި ނެތް ކަމަށެވެ. އަދި ޔާމީނާއި އޭސީސީއާ ދެމެދުވި އެއްބަސްވުމުގައި "އެސްކްރޯ" ގެ ލަފުޒު ބޭނުން ކުރި ނަމަވެސް އެ މުއާމަލާތް ހިންގީ އެސްކްރޯގެ މުއާމަލާތްތައް ހިންގާ ގޮތަކަށް ނޫން ކަމަށްވެސް ވިދާޅުވިއެވެ.

އެ އެއްބަސްވުމުގެ ދަށުން އޭސީސީގެ ނަމުގައި ބޭންކުގައި ހުޅުވީ ކަރަންޓް އެކައުންޓެއް ކަމަށާއި، އެއީ އެސްކްރޯ އެކައުންޓެއް ނޫން ކަމަށްވެސް ބުނެފައިވެއެވެ. އަދި އެ އެކައުންޓަށް އެއް މިލިއަން ޑޮލަރު ޖަމާކުރީ 10 ޖޫން 2018 ގައި ކަމަށާއި އެއީ ޔާމީނާއި އޭސީސީއާއި ދެމެދު ވެފައިވާ އެއްބަސްވުމެއްގެ ދަށުން އޭސީސީގެ އެކައުންޓަކަށް ޖަމާ ކޮށްފައިވާ ފައިސާ ކަމަށްވާތީ އެއަށް އެއްވެސް ބާރެއް ބޭންކަށް ނުހިންގޭނެ ކަމަށްވެސް ވިދާޅުވިއެވެ. އެހެން ކަމުން އެ ދައުވާގައި ބޭންކު ނުހިމެނޭނެ ކަަމަށް ވިދާޅުވެ އެ ދައުވާއިން ބޭންކު އުނި ކުރުމަށްވެސް ހައިކޯޓުގައި ވަކީލު އެދިވަޑައިގެންނެވިއެވެ.

ނަމަވެސް މިއަދުގެ އަޑު އެހުމުގައި، ޔާމީންގެ ފަރާތްޕުޅުން، ޔާމީންގެ ބަދަލުގައި ކޯޓުގައި ތަމްސީލު ކުރައްވާ ވަކީލު ޝާހު އާއި އޭސީސީގެ ވަކީލު އައިޝަތު ޝުނައިނަތު އަބުދުﷲ ވަނީ ބޭންކަށް ރައްދު ދެއްވައިފައެވެ.

ޝާހު ވިދާޅުވީ، އެ އެކައުންޓާ ބެހޭ ގޮތުން ޔާމީނާއި އަދި އޭސީސީއާއެކު ބީއެމްއެލްއިން ކޮށްފައިވާ މުއާމަލާތް ތަަކަށް ބަލާއިރުވެސް އެއީ އެކްސްކްރޯ އެކައުންޓެއްކަން ސަބިތުވާ ކަމަށެވެ. އެ އެކައުންޓް ހުޅުވި ފޯމުގައި ހިމެނޭ ކަރަންޓް އެކައުންޓާއި ސޭވިންގ އެކައުންޓް ހިމެނޭ ތަނުގައި އެއްވެސް އެއްޗެއް ޖަހާފައިނުވާ ކަމަށާއި، އެކައުންޓް ނަމެއްގެ ގޮތުގައި އޭސީސީ ޖެހުމަށްފަހު ބްރެކެޓެއްގައި އެކްސްކްރޯ އެކައުންޓް ޖަހާފައިވާ ކަމަށްވެސް ވިދާޅުވިއެވެ. އެކަމުންވެސް އެއީ އެކްސްކްރޯ އެކައުންޓެއްކަން އެނގޭ ކަމަށްވެސް އޭނާ ވިދާޅުވިއެވެ.

އެ އެކައުންޓް ހުޅުވުމުގައި އަމަލުކުރި ގޮތަށް ބަލާއިރު ބީއެމްއެލްއަކީ އެކަމުގެ ބައިވެރިއެއްކަން ސާބިތުވާ ކަމަށާއި، އެ ފައިސާ އެސްކްރޯ އެކައުންޓެއްގައި ބަހައްޓައި ދިނުމަށް ބޭންކުން އެއްބަސް ވެފައިވާކަން، ކަމާބެހޭ ސިޓީ ތަކުންނާއި އެކަމާބެހޭ އެއްބަސްވުން ތަކުން އެނގޭ ކަމަށްވެސް އޭނާ ވިދާޅުވިއެވެ.

އޭނާ ވިދާޅުވީ އެކަމަކީ ބެންކުގެ އެނގުމާއި ފެނުުމުގެ ތެރެއިން ބޭންކުގެ ދައުރެއް އޮވެގެން ކުރިއަށް ގެންދިޔަ ކަމެއް ކަމަށެވެ.

އޭސީސީގެ ވަކީލާ އައިޝަތު ޝުނައިނަތު ވިދާޅުވީ، ޔާމީންގެ އެކައުންޓުން އޭސީސީގެ އެކައުންޓަށް ޖަމާކުރި ފައިސާއަކީ އެސްކްރޯ އެކައުންޓެއްގައި ބެހެއްޓުމަށް ބީއެމްއެލްވެސް ހިމެނޭ ގޮތަށް ވެފައިވާ އެއްބަސްވުމެއްގެ ދަށުން ޖަމާކުރި ފައިސާ ކަމަށެވެ.

އެކްސްރޯ އެރޭންޖުމެންޓެއް ނެތް ކަމަށް ބޭންކުން ބުނާއިރު އެއީ ހަގީގަތްނޫން ކަމަށް އެއްބަސްވުންތަކުން އެނެގެން އޮންނާނެ ކަމަށްވެސް އޭނާ ވިދާޅުވިއެވެ.

ވަކީލާ ވިދާޅުވީ، އެއްބަސްވުންތަކާއި އެކަމާބެހޭ ގޮތުން ބަދަލު ކުރެވުނު ސިޓީތަކާއި ލިޔެކިއުން ތަކަށް ބަލާއިރު، އޭސީސީ އާއި ޔާމީނާ ދެބައިވެރިން އެކަމާބެހޭ އެބަސްވުމުގައި ސޮއި ކުރުުގެ ނަތީޖާއަކީ އެ އެއްބަސްވުމުގެ ދަށުން ބޭންކުގައި ބެހެއްޓިފައިވާ ފައިސާއާއި މެދު، އިތުރު ލިޔެކިއުމަކާ ނުލައި އެއްބަސްވުމާއި އެއްގޮތަށް ކަންކުރުމަށް ބޭންކަށްދެވޭ އިރުޝާދެއްް ގޮތަށް ގާނޫނީ ގޮތުން ބެލުން ކަމަށެވެ. އަދި އެއީ އެ އެއްބަސްވެފައިވާ ގޮތަށް ބޭންކަށް ދެވޭ އިރުޝާދެއް ކަމަށާއި، އެ އެއްބަސްވުމުަގައި އެކަމާބެހޭ އިލްތިޒާމެއް ބޭންކަށް ދިނުން ކަމަށް ދެފަރާތުން އެއްބަސްވެފައިވާ ކަމަށްވެސް ވިދާޅުވިއެވެ.

އެއްވަގުތެއްގައި ސޮއި ކުރެވިގެން ގާއިމް ކުރި އެ އެއްބަސްވުމުުގެ ތިން އަސްލުގެ ތެރެއިން އެއް އަސްލު ބޭންކަށް ދީފައިވާ ކަމަށްވެސް ވިދާޅުވިއެވެ. އޭސީސީން ބޭންކުގައި އެދިފައި ވަނީ އެސްކްރޯ އެކައުންޓެއް ހުޅުވަން ކަމަށާއި، އެކަމާބެހޭ އެއްބަސްވުމުގެ ނަމަކީވެސް އެސްކްރޯ އެކައުންޓެއް ހުޅުވުމުގެ އެއްބަސްވުން ކަމަށްވެސް ވިދާޅުވިއެވެ.

ވަކީލު ވިދާޅުވީ އެސްކްރޯ އެޖެންޓަކަށް އޮންނަ ރޯލް އެއްބަސްވުމުގައި ބޭންކަށް ދީފައިވާކަން ބަޔާން ކޮށްފައިވާ ކަމަށާއި، އެއީ އެ ފައިސާ ދޫކުރަން ޖެހޭ ވަގުތު އައުމުން ދޫކުރުން ކަމަށްވެސް ވިދާޅުވިއެވެ.

ތިން ފަރާތުން ދައްކަން ބޭނުންވާ ވާހަކަތައް ނުނިމި އުޅެނިކޮށް މިއަދު ބޭއްވި އަޑު އެހުމުގެ ވަގުތުވެސް ވަނީ ހަމަވެފައެވެ.

އެހެން ކަމުން ފަނޑިޔާރު ވިދާޅުވީ ދެން އޮންނަ ދުވަހަކުން ވަކީލުންނަށް އިތުރު ފުރުސަތު އަރުވާނެ ކަމަށެވެ.