ފާއިތުވި 5 އަހަރުތެރޭ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި މަހަކީ މިއަހަރުގެ ފެބްރުއަރީމަސް ކަމުގައި އިމިގްރޭޝަނުން ބުނެފިއެވެ.
މިގޮތުން މިއަހަރު މިހާތަނަށް އައި ފަތުރިވެރިންގެ އަދަދުވަނީ މިހިގާ މާރޗްމަހުގެ 2 ވަނަ ދުވަހާއި ހަމައަށް 356،538 އަރާފައެވެ. އިމިގްރޭޝަނުން އާންމު ކޮށްފައިވާ މައުލޫމާތަށް ބަލާއިރު، ފާއިތުވި ފެބްރުއަރީމަހު ރާއްޖެއަށް 177،915 ފަތުރުވެރިން ޒިޔާރަތް ކޮށްފައި ވެއެވެ. މިއީ ފާއިތުވި ޖެނުއަރީ މަހާއި އަޅާ ބަލާއިރު 3.1 އިންސައްތަ މަތީ އަދަދެކެވެ.
މިގޮތުން ފާއިތުވެދިޔަ 5 އަހަރުގެ ހިސާބުތަކަށް ބަލާއިރު، ރާއްޖެއަށް އެންމެ ގިނައިން ފަތުރުވެރިން ޒިޔާރަތްކޮށްފައިވާ މަހަކީ ނިމިދިޔަ ފެބުރުއަރީ މަހެވެ. އެމަހު ކޮންމެ ދުވަހުަކުވެސް އެވްރެޖްކޮށް 7،354 ރާއްޖެ ޒިޔާރަތް ކޮށްފައި ވެއެވެ. އަދި އެމަހު އެންމެ ގިނައިން ފަތުރުވެރިން ރާއްޖެއަށް ޒިޔާރަތް ކޮށްފައިވަނީ ފެބްރުއަރީ 11 ވަނަ ދުވަހުއެވެ. އެދުވަނު 8،029 ފަތުރުވެރިން ރާއްޖެއަށް ޒިޔާރަތް ކޮށްފައި ވެއެވެ.
އިމިގްރޭޝަނުން އާންމު ކޮށްފައިވާ ހިސާބުތަކަށް ބަލާއިރު، ފެބްރުއަރީމަހު ރާއްޖެއަށް އެންމެ ގިނައިން ޒިޔާރަތް ކޮށްފައިވަނީ ރަޝިއާގެ ފަތުރުވެރިންނެވެ. ރަޝިއާއިން 21،567 ފަތުރުވެރިން ފެބްރުއަރީމަހު ޒިޔާރަތް ކޮށްފައި ވެއެވެ.
ދެވަނައަށް އެންމެ ގިނައިން ފަތުރުވެރިން ޒިޔާރަތް ކޮށްފައިވަނީ އިންޑިއާއިންނެވެ. އެއީ 19،497 ފަތުރުވެރިންނެވެ. ތިންވަނައަށް އެންމެ ގިނައިން ފަތުރުވެރިން ޒިޔާރަތްކުރި އިނގިރޭސިވިލާތުން ރާއްޖެއަށް 17،941 ފެބްރުއަރީމަހު ޒިޔާރަތް ކޮށްފައި ވެއެވެ.
