ކުރީގެ އިސްލާމިކް މިނިސްޓަރ ޑރ.ޝަހީމް އިސްކޮށް ހުންނަވައިގެން، ކީރިތި ޤުރުއާން ހިތު ދަސް 100 ޙާފިޒުންގެ އުފެއްދުމުގެ މަޝްރޫއު މިހަފްތާ ބަންދުގައި ފެށުމަށް ހަމަޖެހިއްޖެއެވެ.
އިލްމު އިންސްޓިޓިއުޓްގެ ފަރާތުން އިޢުލާންކުރި ޙާފިޒުން އުފެއްދުމުގެ މަޝްރޫޢަށް ވަނީ ބޮޑު ތަރުހީބެއް ލިބިގެން ގޮސްފައެވެ. ހަފްތާ ބަންދުގައި ޕްރޮގުރާމު ފެށުމަށް ހަމަޖެހިފައިވާއިރު، މި ޕްރޮގުރާމު ފަށަނީވެސް 600 ދަރިވަރުންނާއި އެކުގައެވެ.
ޑރ.ޝަހީމް ވިދާޅުވީ ކިޔަވައި ދިނުމުގެ އިންތިޒާމުތައް ވީހާވެސް ރަނގަޅަށް ކުރިއަށް ގެންދިއުމަށްޓަކައި، ކިޔަވާދޭ ކޮންމެ ކުލާހެއްގައި ސްމާރޓް ބޯޑު ބެހެއްޓިފައިވާނެ ކަމަށެވެ. އަދި ރާގު ދަސްކޮށް ޤާރީންގެ ކިޔެވުން އަޑު އެހުމަށް ޚާއްޞަ ލެބެއް ޤާއިމްކުރެވިފައިވާާއިރު، ޚާއްޞަ ލައިބްރަރީއެއްވެސް ޤާއިމުކުރެވިފައިވާނެ ކަމަށެވެ.
ޤުރުއާންގެ ޢިލްމު އުނގެނުމަށް ރާއްޖޭގައި މިހާތަނަށް ޤާއިމުކުރެވޭ އެންމެ ފުރިހަމަ މާޙައުލަށް ޢިލްމު އިންސްޓިޓިއުޓް ވެގެން ދިއުމަކީ އަޅުގަނޑުގެ އުންމީދު. މާތް ﷲ މި މަސައްކަތުގައި ބަރަކާތްލައްވާށި.
– ޑރ.ޝަހީމް ވިދާޅުވިއެވެ.
ޝަހީމް ވިދާޅުވީ ކްލާސްތަކުން ޖާގަ ހޯދަން ގިނަ ފަރާތްތަކަކުން އަދިވެސް އެދެމުންދާތީވެ، ޚާއްޞަކޮށް ހަފްތާގެ ދުވަސްތަކުގައި ހެނދުނު ދަންފަޅިއަށް އެދޭ މީހުން ގިނަވުމުން، މިބަޔަށް ރެޖިސްޓްރީވާން އަލުން ހުޅުވާލާނެ ކަމަށެވެ. ހާފިޒުން ތަމްރީން ކުރުމަށް ހުޅުވާލި ފުރުސަތުގައި ކުރިން ހީކުރިވަރަށްވުރެވެސް ބޮޑު ތަރުހީބެއް ލިބިގެން ގޮސްފައިވާއިރު، މިއީ ރާއްޖޭގައި މިހާގިނަ ހާފިޒުން އުފެއްދުމަށް ހިންގޭ މިފަދަ ފުރަތަމަ ޕްރޮގުރާމު ކަންވެސް ފާހަގަކޮށްލެވެއެވެ.
100 ޙާފިޒުން އުފެއްދުމުގެ މަޝްރޫޢަކީ ދިވެހި މުޖުތަމަޢުގައި ކީރިތި ޤުރުއާނަށް އޮންނަ ލޯބި އިތުރުކޮށް ރާއްޖޭގައި ޙާފިޒުން އިތުރުކުރުމުގެ މަތިވެރި މަޤުޞަދުގައި ޢިލްމު އިންސްޓިޓިއުޓް ފޯ އިސްލާމިކް ސްޓަޑީސްގެ ފަރާތުން ކުރިއަށް ގެންދާ ޚާއްޞަ މަޝްރޫޢެކެވެ. މި މަޝްރޫޢުގެ ފިޒިކަލް ކުލާސްތައް މިވަގުތު ކުރިއަށް ދާނީ މާލޭގައި އެކަންޏެވެ. އޮންލައިން ކުލާސްތައް މުޅި ރާއްޖެއަށް އަމާޒުކޮށް ކުރިއަށް ގެންދެވޭނެއެވެ. ޢިލްމުގެ އަމާޒަކީ ރާއްޖޭގެ ކޮންމެ އަތޮޅެއްގައި ޢިލްމުގެ ފިޒިކަލް ޙިފްޒު ކެމްޕަސްއެއް ޤާއިމު ކުރުމެވެ.
އިޖާޒާ ދިނުން:
އިޖާޒާއަކީ، ޙިފުޒު ކޮށް ނިމުމުން ޙިފުޒުގެ ސަނަދުން ސިލްސިލާ ކީރިތި ރަސޫލާ ޞައްލަﷲ ޢަލައިހި ވަސައްލަމައާ ހަމައަށް ގުޅުވައިދިނުމެވެ. މިކަން ކުރާ ގޮތައް ހަމަޖެހިފައިވަނީ އެފަދަ އިޖާޒާ ސަނަދު ލިބިވަޑައިގެންފައިވާ ދަންނަބޭކަލުން ނުވަތަ ޙާފިޒުން ރާއްޖެއިން ބޭރުން ގެނެސްގެން އެކުއްޖަކު ލައްވައި އެބޭފުޅަކަށް ޤުރުއާން އެއްކޮށް ހިތުން ކިޔައިދީގެންނެވެ. ނުވަތަ ޢިލްމު އިންސްޓިޓިއުޓްގެ ޚަރަދުގައި އެދަރިވަރަކު އެފަދަ ތަނަކަށް ފޮނުވައިގެންނެވެ. ޙިފްޒުގެ ސަނަދުގެ ސިލްސިލާއިން ކީރިތި ރަސޫލާއާ ހަމަ އަށް ގުޅުވައިލުމަކީ ޙާފިޒަކަށް ލިބޭނެ ޙިފްޒުގެ އެންމެ މަތިވެރި ޝަރަފެވެ.
ޙިފުޒު ކުރުމާއެކު ރީތި ރާގަށް ޤުރުއާން ކިޔަވަން ދަސްކުރުން.
ބޭރުގެ އުސްތާޛެއް މެދުވެރިކޮށް ކޮންމެ މަހަކު އެއް ފަހަރު ޢަރަބި ބަހުގެ ކުލާހެއް.
ތަޖްވީދުގެ ހަމަތަކުން ކިޔަވަން ދަސްކުރުން.
އަންހެން ދަރިވަރުންނަށް ތިއްބަވާނީ އަންހެން އުސްތާޛުން.
ތަރުބަވީ ފިލާވަޅުތަކާއި ޤުރުއާނުގެ އަޚުލާޤު ދަސްކޮށްދިނުން
ބޭރުގެ ތަޖުރިބާކާރު އުސްތާޛުން ދަރިވަރުންނާ ބައްދަލުކުރުން.
ޕްރޮގްރާމްގެ ފީތައް:
– ހަފްތާ ބަންދުގެ ހުކުރު، ހޮނިހިރު : ކޮންމެ ދުވަހަކު ދޮޅުގަޑިއިރު ކިޔައިދޭނެ (ކުލާހަށް ހާޒިރުވެ) : މަހަކު 500 ރުފިޔާ
– ހަފްތާ ބަންދުގެ ހުކުރު، ހޮނިހިރު : ދޮޅުގަޑިއިރު ކިޔައިދޭނެ (އޮންލައިން) : މަހަކު 700 ރުފިޔާ
ހަފްތާއަކު 5 ދުވަހު ހުކުރު ހޮނިހިރު ފިޔަވާ (ކުލާހަށް ހާޒިރުވެ) : މަހަކު 1000 ރުފިޔާ
– ހަފްތާއަކު ކޮންމެ ދުވަހަކު، ހުކުރު ހޮނިހިރު ފިޔަވާ (އޮންލައިން) : މަހަކު 1100 ރުފިޔާ
މި މަޝްރޫޢަކީ ހަމައެކަނި ދަސްކޮށްދޭ މަޝްރޫޢެއްނޫނެވެ. ހިތު ދަސްކުރުމުގެ އިތުރުން، މި މަޝްރޫއުގައި ތަޖުވީދުގެ ހަމަތަކުން ރީތި ރާގުތަކަށް ހުނަރުވެރިކަމާއެކު ކިޔަވަން ދަސްކޮށްދެވޭނެއެވެ. ރާއްޖެއާއި ރާއްޖެއިން ބޭރުގެ ތަޖުރިބާކާރު ޙާފިޒުންނާއި މޮޅު ޤާރީންގެ ހުނަރުވެރިކަން ޙިއްސާކުރެވޭނެއެވެ.
މިޞްރު، ޖޯޑަން، ކުވައިތު، ސަޢުދީ ޢަރަބިއްޔާ، މެލޭޝިޔާ، އިންޑިއާ، ޕާކިސްތާން، އިންޑޮނޭޝިޔާ، މޮރޮކޯ ފަދަ ޤައުމުތަކުގެ ތަޖުރިބާކާރު އުސްތާޛުން އެކި މަރުޙަލާތަކުގައި މި މަޝްރޫޢުގެ ދަރިވަރުންނާ ބައްދަލުކުރާނެއެވެ. މި މަޝްރޫޢުގައި ދެ ޖިންސުގެ ޒުވާނުންނަށް ބައިވެރިވެވޭނެއެވެ. ކުލާސްތައް ކުރިއަށްދާނީ ވަކިންނެވެ. މި މަޝްރޫޢުގެ ފުރަތަމަ މަރުޙަލާ ކުރިއަށް ދާނީ ހަފްތާ ބަންދުތަކުގައެވެ.
