އެމެރިކާގެ ރައީސް ޑޮނަލްޑް ޓްރަމްޕް މެދައިންތިހާބުގެ ނަތީޖާ ގަބޫލުކުރި ނަމަވެސް، އޭނާއަށް ލިބިފައިވާ ވީޓޯ ކުރުމުގެ ބާރު ބޭނުންކުރާނެ ކަމަށް ވިދާޅުވެއްޖެ އެވެ.
މި އިންތިހާބުގައި ޓްރަމްޕްއަށް ބޮޑު ނާކާމިޔާބީއަކާ ކުރިމަތިލާން ޖެހިފައިވާއިރު، އެމެރިކާގެ ގާނޫނު ހަދާ މަޖިލީހާއި ސެނެޓުގެ އަޣުލަބިއްޔަތު ލިބުނީ އިދިކޮޅު ޑިމޮކްރެޓުންނަށެވެ. ނަތީޖާއާ މެދު ދެކެލައްވާ ގޮތް ޓްރަމްޕް ހާމަކުރީ 'ޓްރުތް ސޯޝަލް' މެދުވެރިކޮށެވެ.
"ކެންޑިޑޭޓުން މޮޅުވި އަދި ބަލިވި ސަބަބުތަކާ ގުޅޭގޮތުން، ރަނގަޅު އަދި ނުބައި ވާހަކަވެސް ދައްކާ ސިޔާސީ މުހައްލިލަކަށް އަޅުގަނޑު ވާނަން،" އޭނާ ވިދާޅުވިއެވެ. ޓެކްސަސްގެ ގަވަރުނަރު ގްރެގް އެބޮޓް ފަދަ ބައެއް ރިޕަބްލިކަން ބޭފުޅުންނަށް ފާޑުކިޔުމުގެ ގޮތުން ކަޑަ ބަހެއްވެސް ބޭނުންކުރިއެވެ.
"ވީޓޯ" ޖަހާފައިވާ ރަތް ތޮއްޕެއްގެ ފޮޓޯއެއްވެސް ޓްރަމްޕް ސޯޝަލް މީޑިއާގައި ހިއްސާކޮށްފައިވެއެވެ. ރައީސް ޓްރަމްޕް މިފަދައިން ވިދާޅުވީ ކުރިއަށް ޑިމޮކްރެޓުންގެ އަޣުލަބިއްޔަތު އޮންނަ ކޮންގްރެސްއިން ފާސްކުރާ ގާނޫނުތައް ހުއްޓުވުމުގެ ބާރު އޭނާއަށް އޮތްކަން ހަނދާންކޮށްދިނުމަށް ކަމަށް ބެލެވެއެވެ.
"މި އިންތިހާބުގެ ވޯޓު ކަރުދާހުގައި އަޅުގަނޑުގެ ނަމެއް ނެތް. އަޅުގަނޑުގެ ނަން އޮތް ނަމަ، މިއީ ފުރިހަމަ އަޣުލަބިއްޔަތަކުން އަޅުގަނޑުމެން ހޯދާނެ ބޮޑު ކާމިޔާބީއެއް،" ޓްރަމްޕް ކުރިން ކުރި ޕޯސްޓެއްގައި ބުނެފައިވެއެވެ.
ނިއުޔޯކް ޓައިމްސްއަށް ދެއްވި އިންޓަވިއު އެއްގައި ޓްރަމްޕް ވިދާޅުވީ، ނަތީޖާ "އިތުބާރާއެކު ބަލައިގަތުމަށް ތައްޔާރަށް ހުރި" ކަމަށާއި، އިދިކޮޅު ޕާޓީއާއެކު މަސައްކަތް ކުރުމަށް ތައްޔާރުވަމުންދާ ކަމަށެވެ. "އަހަރެން އެބޭފުޅުންނާއެކު މަސައްކަތް ކުރުމަށް އުންމީދު ކުރަން. ކަންކަމުގައި އެއްބަސްވުމަކަށް އާދެވޭނެ ކަމަށް ބެލެވޭ،" އޭނާ ވިދާޅުވިއެވެ.
