ދުބާއީން އިސްރާއީލަށް ދަތުރުކުރި ފްލައިދުބާއީގެ ފްލައިޓު FZ1073 ގައި ކޯ-ޕައިލެޓް، ކެޕްޓަނަށް ހަމަލާދީ ބޯޓު ވައްޓާލަން އުޅުނު ހާދިސާއާ ގުޅިގެން ކަމާބެހޭ އިދާރާތަކުން ތަހުގީގު ކުރަމުންދާއިރު، މި ހާދިސާގެ ރަސްމީ މައުލޫމާތުތަކާމެދު އާންމުންނާއި އޭވިއޭޝަން ދާއިރާގެ ހަބީރުންގެ މެދުގައި ބޮޑެތި ސުވާލުތަކެއް ވަނީ އުފެދިފައެވެ.
ދުބާއީ އިންޓަނޭޝަނަލް އެއާޕޯޓުން ނައްޓާލިތާ ދެ ގަޑިއިރާއި ބައި ފަހުން ހިނގި މި ހާދިސާގައި، ކޯ-ޕައިލެޓް ހަމާމް އަލް-ހައްމާމީ ވަނީ ކެޕްޓަން ސްމިތު މައްޗާރަށް ކޮކްޕިޓްގައި އޮންނަ ކުއްލި ހާލަތްތަކުގައި ބޭނުންކުރާ ކޯރާޑިއަކުން ހަމަލާދީފައެވެ. ކެޕްޓަނަށް ކޮކްޕިޓްގެ ދޮރު ހުޅުވާލެވުމާއެކު ފްލައިޓުން ދަތުރުކުރި އާންމު މީހުން ވެސެގެން ކޯ-ޕައިލެޓް ވަނީ ކޮންޓްރޯލްކޮށްފައެވެ. އެއަށްފަހު ބޯޓު ވަނީ ސައޫދީ އަރަބިއްޔާއަށް ކުއްލި ހާލަތުގައި ޖައްސާފައެވެ.
މި ހާދިސާއާ ގުޅިގެން އެންމެ ބޮޑަށް ބަހުސްކުރެވޭ 5 ސުވާލު:
1. ސެކިއުރިޓީ ކަންބޮޑުވުންތަކެއް ހުއްޓާ ހައްމާމީއަށް އުދުހުމުގެ ހުއްދަ ދިނީ ކީއްވެ؟
އޯމާންގެ ރައްޔިތެއްކަމަށްވާ ހައްމާމީއަކީ ހައްދުފަހަނައަޅާފައިވާ ފިކުރުތަކެއް ގެންގުޅޭ މީހެއްކަމަށް ބެލެވިގެން އޯމާންގެ ކަމާބެހޭ އިދާރާތަކުން ކުރިންވެސް އޭނާއަށް އުދުހުން މަނާކޮށްފައިވާ މީހެއްކަމަށް ރިޕޯޓްތައް ބުނެއެވެ. އަދި އޯމާންގެ ގައުމީ އެއާލައިންގެ ވަޒީފާއިންވެސް އޭނާ ވަކިކޮށްފައިވާކަމަށް މީޑިއާތަކުން ރިޕޯޓްކުރެއެވެ. މިފަދަ ސީރިއަސް ސެކިއުރިޓީ މައްސަލަތަކެއް ހުރި މީހަކަށް ފްލައިދުބާއީގެ ފްލައިޓެއްގެ ކޮންޓްރޯލް ލިބުނު ގޮތަކާމެދު ވަނީ ސުވާލު އުފެދިފައެވެ.
2. 'ޕްލަމްބަރަކު' ބޯޓު ކޮންޓްރޯލް ކުރި ވާހަކައިގެ ހަގީގަތަކީ ކޮބައި؟
ލޭތަކުން ތޭއްސެވިފައި ހުރި ކެޕްޓަން ކޮކްޕިޓް ދޮރު ހުޅުވާލުމުން ކޯ-ޕައިލެޓް ހިފެހެއްޓި މީހުންގެ ތެރޭގައި އިސްރާއީލުގެ 50 އަހަރުގެ ޔަނިވް ހާޔޫން ނަމަކަށްކިޔާ މީހަކު ހިމެނެއެވެ. އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ "ޕްލަމްބަރެއް" ގޮތުގައި ސިފަކުރި ހާޔޫން ބުނެފައިވަނީ، އިތުރު ޕައިލެޓަކު ކޮކްޕިޓަށް ވަނުމުގެ ކުރިން އޭނާ ބޯޓުގެ ކޮންޓްރޯލްތަކުގައި ހިފި ކަމަށެވެ. އެއީ "އެއާ ކްރޭޝް އިންވެސްޓިގޭޝަން" ޝޯ ބަލައިގެން ދަސްވި ގޮތަށް ކަމަށް އޭނާ ބުނި ނަމަވެސް، އާންމު ޕްލަމްބަރަކަށް ވައިގެ ތެރޭގައި ބޯޓެއް ކޮންޓްރޯލް ކުރެވިދާނެތޯ ސޯޝަލް މީޑިއާގައި ވަނީ ސުވާލު އުފައްދާފައެވެ.
3. 17،000 ފޫޓުން ބޯޓު ވައްޓާލިއިރު އެކަކަށްވެސް އަނިޔާނުވީ ކީއްވެ؟
ފްލައިޓް ޓްރެކިން މައުލޫމާތުތަކުން ދައްކާ ގޮތުގައި، މި ހާދިސާ ހިނގި ވަގުތު ބޯޓު ވަނީ 2 މިނެޓަށްވުރެ ކުރު މުއްދަތެއްގެ ތެރޭގައި 5,180 މީޓަރު (17,000 ފޫޓު) ތިރިއަށް ވެއްޓިފައެވެ. މިފަދަ ނުރައްކާތެރި "ޑައިވް" އެއްގައި ބޯޓުގެ ތެރޭގައި ހުރި އެއްޗެހި އުކެމުންދާނެ ކަމަށާއި، ނަމަވެސް މި ހާދިސާގައި އެއްވެސް މީހަކަށް ސީރިއަސް އަނިޔާއެއް ނުލިބި ސަލާމަތްވުމުން ފްލައިޓް އިންސްޓްރަކްޓަރުންވެސް ވަނީ އެކަމާ ހައިރާންކަން ފާޅުކޮށްފައެވެ.
4. އޯމާންގެ ކޯ-ޕައިލެޓަކަށް އިސްރާއީލަށް ދަތުރުކުރުމުގެ ހުއްދަ ލިބުނީ ކީއްވެ؟
އިސްރާއީލާއި އޯމާންއާ ދެމެދު ރަސްމީ ސިޔާސީ ގުޅުމެއް ނޯންނާތީ، އާންމުކޮށް އެފަދަ ގައުމުތަކުގެ ކްރޫއިންނަށް އިސްރާއީލަށް އުދުހުމުގެ ހުއްދައެއް ނުލިބެއެވެ. ނަމަވެސް، އިސްރާއީލުގެ "ހާއަރެޓްޒް" ނޫހުން ރިޕޯޓްކޮށްފައިވާ ގޮތުގައި، ފްލައިޓް ނައްޓާލުމުގެ ކުރިން މޮސާޑް އަދި އިސްރާއީލުގެ ސެކިއުރިޓީ އިދާރާތަކަށް ކްރޫއިންގެ ލިސްޓް ލިބިފައިވެއެވެ. އޯމާންގެ ރައްޔިތަކު އިސްރާއީލަށް ދާ ފްލައިޓެއްގެ ކްރޫއެއްގެ ގޮތުގައި ހުރުމުން ސެކިއުރިޓީ ފިލްޓަރުން އެކަން ފާހަގަނުވީ ކީއްވެގެންތޯ ސުވާލު އުފެދެއެވެ.
5. ހަމަލާދިނުމުގެ ކުރިން ކޯ-ޕައިލެޓް ކުރި ނަމާދަކީ ކޮބައި؟
ކެޕްޓަން މައްޗާރް އިސްރާއީލުގެ ބޮޑުވަޒީރަށް މައުލޫމާތު ދެމުން ބުނެފައިވަނީ، ހަމަލާދިނުމުގެ 4 ނުވަތަ 5 މިނެޓު ކުރިން ހައްމާމީ ނަމާދުކުރަން އެދުނު ކަމަށެވެ. ފްލައިޓް ނައްޓާލި ގަޑިއާއި ހަމަލާދިން ވަގުތަށް ބަލާއިރު (ޖީއެމްޓީން 05:35)، އެއީ އިސްލާމީ ފަރުޟު ނަމާދެއްގެ ވަގުތެއް ނޫނެވެ. މިއީ އަމިއްލަ އެހެން އަޅުކަމެއްތޯ ނުވަތަ މިކަމުގެ ފަހަތުގައިވާ ސަބަބަކީ ކޮބައިތޯވެސް ތަހުގީގު ކުރާ ފަރާތްތަކުން ދަނީ ބަލަމުންނެވެ.
މި ހާދިސާގެ ފުރިހަމަ ތަހުގީގެއް ޔޫއޭއީ އާއި ސައޫދީ އަރަބިއްޔާގެ ކަމާބެހޭ އިދާރާތަކުން ގުޅިގެން ދަނީ ކުރިއަށް ގެންދަމުންނެވެ.
