މާލޭގެ އަމީނީމަގުގައި ކުރިއަށްގެންދިޔަ މަރާމާތުގެ މަސައްކަތް ނިންމައި، އެ ސަރަހައްދު އާންމުންގެ ދަތުރުފަތުރަށް ހުޅުވާލައިފިއެވެ.
މި އަހަރުގެ އޮގަސްޓް މަހު ފެށި މި މަޝްރޫއުގެ ދަށުން، ދަރުމަވަންތަ ޕާކުން ފެށިގެން އިއްޒުއްދީން މަގާ ހަމައަށް އޮންނަ ސެގްމަންޓް 1 ގައި، ކުރިން އެޅި ތާރު ނަގައި 2,794 އަކަމީޓަރުގެ ސަރަޙައްދެއްގައި އަލުން ތާރުއެޅުމުގެ އިތުރުން، މަގުމަތީ ނިޝާންތައް ކުރެހުމުގެ މަސައްކަތްވެސް ނިންމާލައިފިއެވެ. ސެގްމަންޓް 2 ގެ ދަށުން 133 އަކަމީޓަރުގެ ސަރަޙައްދެއްގައިވެސް ހަމަ އެފަދަ މަސައްކަތްތަކެއް ކޮށްފައިވެއެވެ.
އެމްޓީސީސީން ބުނީ، ދެން ކުރިއަށްދާނީ ސެގްމަންޓް 3 އާއި 4 ގެ މަސައްކަތް ކަމަށެވެ. އިއްޒުއްދީން ހިނގުމުން ކޯރުކެނޑި ހިނގުމާ ހަމައަށް ހިމެނޭ ސެގްމަންޓް 3 ގައި 1,924 އަކަމީޓަރުގެ ސަރަޙައްދަކާއި، ކޯރުކެނޑިން ގިޔާސުއްދީން ސްކޫލާ ހަމައަށް ހިމެނޭ ސެގްމަންޓް 4 ގައި 1,148 އަކަމީޓަރުގެ ސަރަޙައްދެއްގައިވެސް ތާރު ނަގައި އަލުން އެޅުމުގެ މަސައްކަތް ކުރިއަށްދާނެއެވެ.
