ދުނިޔޭގެ ފުޓްބޯޅަ ހިންގާ މައި އިދާރާ ފީފާގެ ރައީސް ޖިއާނީ އިންފަންޓީނޯ، ވޯލްޑް ކަޕް މުބާރާތުގެ ވަކި ބައެއް އަމިއްލަ އިންވެސްޓަރުންނަށް ވިއްކާލުމަށް ރާވަމުންދާ ރޭވުމާ ދެކޮޅަށް، ޔޫރަޕްގެ ގައުމު ތަކުން ފީފާގެ މުބާރާތްތައް ބައިކޮޓް ކުރުމަށް އެއްބަސް ވެއްޖެއެވެ.

ސްކައި ނިއުސް އިން ރިޕޯޓް ކޮށްފައިވާ ގޮތުގައި، ޔޫރަޕްގެ ފުޓްބޯޅަ އިދާރާ (ޔޫއީއެފްއޭ) އަށް ނިސްބަތްވާ 55 ގައުމުގެ ފުޓްބޯޅަ އެސޯސިއޭޝަނުން ވަނީ ކުއްލި ބައްދަލުވުމެއް ބާއްވައި، ފީފާގެ މި ނިންމުމާ ދެކޮޅަށް އެކުވެރިކަމާއެކު ތެދުވުމަށް ނިންމާފައެވެ. އަދި އަމިއްލަ އިންވެސްޓަރުންނަށް ވޯލްޑް ކަޕްގެ ހިއްސާ ވިއްކާލުމުގެ ޕްލޭން ފީފާއިން އުވާނުލާހާ ހިނދަކު، ކުރިއަށް އޮތް ވޯލްޑް ކަޕް މުބާރާތްތަކާއި ފީފާއިން އިންތިޒާމްކުރާ އެއްވެސް މުބާރާތެއްގައި ޔޫރަޕްގެ އެއްވެސް ގައުމަކުން ބައިވެރިނުވާނެ ކަމަށް ވަނީ ނިންމާފައެވެ.

ޔޫއީއެފްއޭއިން ނެރުނު ބަޔާނެއްގައި ބުނެފައިވަނީ، ފުޓްބޯޅައަކީ އެއްވެސް ވަކި އިދާރާއެއްގެ ނުވަތަ ކަންކަން ނިންމާ ފަރާތެއްގެ މިލްކެއް ނޫން ކަމަށާއި، ފީފާއިން މަސައްކަތް ކުރަނީ "ފުޓްބޯޅައިގެ ރޫހު ވިއްކާލުމަށް" ކަމަށެވެ. އަދި މި ޕްލޭނަކީ ސިއްރިއްޔާތުގައި ރޭވިގެން ކުރިއަށްގެންދިޔަ ކަމެއްކަމަށް ބުނެ، އުތުރު އެމެރިކާގެ ފުޓްބޯޅަ ކޮންފެޑަރޭޝަން އިންވެސް ވަނީ މި ކަންބޮޑުވުންތަކަށް ތާއީދުކޮށް، ފީފާގެ މި މަސައްކަތާ ދެކޮޅުހަދާފައެވެ.

މި މައްސަލައިގައި ޔޫރަޕްގެ ގައުމުތަކުން އެކުވި ވަރުގަދަ ނިންމުމާއެކު، ފީފާގެ ރައީސް އިންފަންޓީނޯއަށް ވަނީ ބޮޑެތި ފިއްތުންތަކަކާ ކުރިމަތިލާންޖެހިފައެވެ. އަދި މި ހުށަހެޅުން އަނބުރާ ގެންދިއުމަށް ނުވަތަ ބޮޑެތި ބަދަލުތަކެއް ގެނައުމަށް ފީފާއަށް މަޖުބޫރުވެގެންދާނެ ކަމަށް ކުޅިވަރުގެ މުރާސިލުން ބުނެއެވެ.