ވެނެޒުއޭލާއަށް އައި ބާރުގަދަ ބިންހެލުންތަކަކާ ގުޅިގެން، އެތައް ހާސް ބަޔަކު މަރުވެފައިވުން އެކަށީގެންވާ ކަމުގެ ބިރު ބޮޑުވެ، ކާރިސާގެ ސަރަހައްދުތަކުގައި މީހުން ސަލާމަތް ކުރުމުގެ މަސައްކަތް ބާރުދުވެލީގައި ފަށައިފިއެވެ.

ބުދަ ދުވަހުގެ ހަވީރުގެ ވަގުތެއްގައި، 40 ސިކުންތުގެ ކުރު މުއްދަތެއްގެ ތެރޭގައި ވެނެޒުއޭލާގެ އުތުރުައް އައިސްފައިވަނީ 7.5 އަދި 7.2 މެގްނިޓިއުޑްގެ ދެ ބިންހެލުމެވެ. މި ބިންހެލުންތަކުގެ ސަބަބުން އެ ގައުމުގެ އުތުރު އައްސޭރިފަށުގެ ސަރަހައްދުތަކަށް ބޮޑެތި ގެއްލުންތަކެއް ވެ، ގިނަ އަދަދެއްގެ ބިނާތަކާއި އިމާރާތްތައް ވަނީ ބިމާ ހަމަވެފައެވެ.

ވެނެޒުއޭލާގެ ވެރިރަށް ކަރާކަސްގެ ކައިރީގައި އޮންނަ ސައިމަން ބޮލިވަރް ބައިނަލްއަގުވާމީ ވައިގެ ބަނދަރަށް ވެސް ބޮޑެތި ގެއްލުންތަކެއް ވެފައިވާއިރު، އެންމެ ބޮޑު ހަލާކެއް ލިބިފައިވަނީ ވައިގެ ބަނދަރު ކައިރީގައި އޮންނަ އައްސޭރިފަށުގެ ރަށްތައް ކަމަށްވާ ލާ ގުއައިރާ، ކަޓިއާ ލާ މާ އަދި ކަރަބަލޭޑާ އަށެވެ. އެ ސަރަހައްދުތަކުގެ ބޮޑެތި އެޕާޓްމަންޓް އިމާރާތްތަކާއި ހޮޓާތައް ވެއްޓި، ކުނިބުނީގެ ދަށުގައި އެތައް ބަޔަކު ވަނީ ތާށިވެފައެވެ.

ވެނެޒުއޭލާގެ އެކްޓިން ރައީސް ޑެލްސީ ރޮޑްރިގޭޒް ވަނީ މި ހާދިސާއަކީ "ބޮޑު މުސީބާތެއް" ގޮތުގައި ސިފަކުރައްވައި، ލާ ގުއައިރާ ސަރަހައްދަކީ ކާރިސާގެ ސަރަހައްދެއްގެ ގޮތުގައި ކަނޑައަޅުއްވާފައެވެ. އަދި ކުނިބުނީގެ ދަށުން މީހުން ހޯދުމުގެ އުނދަގޫ މަސައްކަތް ސަލާމަތްތެރިން ކުރަމުންދާ ކަމަށް އޭނާ ވިދާޅުވިއެވެ.

އދ. ގެ އިންސާނީ އެހީއާ ބެހޭ އިދާރާ އިން ބުނި ގޮތުގައި ހަމައެކަނި ލާ ގުއައިރާ ސަރަހައްދުން ވެސް 100 އަށްވުރެ ގިނަ އިމާރާތް ވަނީ ވެއްޓިފައެވެ. މީގެ ތެރޭގައި ގިނަ އަދަދެއްގެ ކުޑަކުދިންނާއި އުމުރުން ދުވަސްވީ މީހުން ހިމެނޭހެން، މުޅި އާއިލާތައް ވަނީ ވީނުވީއެއް ނޭނގި ގެއްލިފައެވެ.

މި ކާރިސާއާ ގުޅިގެން ބައިނަލްއަގުވާމީ މުޖުތަމައުން ދަނީ ވެނެޒުއޭލާއަށް އެހީތެރިކަން ފޯރުކޮށްދެމުންނެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި، ބިންހެލުމަށްފަހު ފުރަތަމަ ފާއިތުވާ 72 ގަޑިއިރަކީ މީހުންގެ ފުރާނަ ސަލާމަތްކުރުމަށް އެންމެ މުހިންމު ވަގުތު ކަމުން، އެމެރިކާގެ ޑިފެންސް ޑިޕާޓްމަންޓުން ސަލާމަތްކުރާ ޓީމުތައް އެ ސަރަހައްދަށް ފޮނުވުމަށް ދަނީ އެހީތެރިވަމުންނެވެ. މީގެ އިތުރުން ފަރަންސޭސިވިލާތާއި، ބްރެޒިލް ފަދަ ގައުމުތަކުން ވެސް ވަނީ ހަމްދަރުދީ ފާޅުކޮށް، އެހީގެ ޓީމުތައް ފޮނުވުމަށް ތައްޔާރަށް ތިބިކަން ހާމަކޮށްފައެވެ.

މި ބިންހެލުންތަކުގެ ބާރުގަދަކަމުން، ވެނެޒުއޭލާއާ 1000 އަށްވުރެ ގިނަ މޭލު ދުރުގައި އޮންނަ ބްރެޒިލްގެ މަނައުސް ސިޓީއަށް ވެސް އޭގެ ލޮޅުންތައް އަސަރުކޮށް، އެ ރަށުގެ މީހުން ގެތަކުން ނިކުންނަން ޖެހުނެވެ. އިގްތިސާދީ އަދި ސިޔާސީ ބޮޑު ހީނަރުކަމެއްގެ ތެރޭގައި އޮތް ވެނެޒުއޭލާއަށް މި ކާރިސާ ކުރިމަތިވީ، މި އަހަރުގެ ކުރީކޮޅު އެ ގައުމުގެ ވެރިކަމަށް އައި ބޮޑެތި ބަދަލުތަކަށްފަހުގައެވެ.