އެމްޑީޕީގެ ޗެއާޕާސަންގެ މަގާމަށް ވާދަކުރައްވާ ކުރީގެ ރައީސް މުހައްމަދު ނަޝީދު، ކުރީގެ ރައީސް އިބްރާހިމް މުހައްމަދު ސޯލިހާ މެދު ގެންގުޅުއްވި ހަރުކަށި ސިޔާސަތު ބަދަލުކުރައްވައި، އެމަނިކުފާނާ އިދިކޮޅަށް މަސައްކަތް ނުކުރައްވާނެ ކަމަށް އިއުލާން ކުރައްވައިފިއެވެ.

ޗެއާޕާސަން އިންތިޚާބުގެ ކެމްޕޭނަށް މިހާރު ނ. އަތޮޅަށް ކުރައްވަމުންދާ ދަތުރުފުޅުގައި، ހޮޅުދޫގައި ބޭއްވި ބައްދަލުވުމެއްގައި ވާހަކަފުޅު ދައްކަވަމުން ނަޝީދު ވިދާޅުވީ، އެމްޑީޕީ އަލުން ރުކުރުވާލައި ވަރުގަދަ ކުރެވޭނެ ކަމަށެވެ. ނަމަވެސް އެއީ އެކަނި ކުރެވޭނެ ކަމެއް ނޫން ކަމަށާއި، އިންތިޚާބަށް ފަހު ޕާޓީގެ ހުރިހާ ލީޑަރުންނާ ގުޅިގެން މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ.

ޚާއްސަގޮތެއްގައި ރައީސް ސޯލިހާއެކު މަސައްކަތް ކުރެއްވުމާ ގުޅޭގޮތުން ނަޝީދު ވިދާޅުވީ، "އަޅުގަނޑަށް ގަބޫލުކުރެވޭ ރައީސް ސޯލިހުވެސް އަޅުގަނޑުމެންނާއެކު މަސައްކަތް ކުރައްވާނެ. އަދި ބާކީ ތިއްބެވި ލީޑަރުން، ޝާހިދުވެސް މަސައްކަތް ކުރައްވާނެ. އަޅުގަނޑު ރައީސް ސޯލިހާ އިދިކޮޅު ނުވާނަން،" ނަޝީދު ވިދާޅުވިއެވެ.

ނަޝީދުގެ ވާހަކަފުޅުގައި އިތުރަށް ވިދާޅުވީ، ކެމްޕޭނުގެ ތެރެއިން މިހާތަނަށް 1800 އެއްހާ ގެއަށް އަދި 81 ރަށަށް ވަޑައިގެންނެވުމުން މިއަދު ރާއްޖޭގެ ހާލަތު ވަރަށް ގާތުން ފެނިވަޑައިގެންފި ކަމަށެވެ. އަދި ރައްޔިތުން އުޅެމުންދާ ދަތި ހާލަތު އެނގިވަޑައިގަންނަވާ ކަމަށާއި، ނަމަވެސް އެ ހާލަތު ބަދަލުކޮށްދޭނެ ސިޔާސަތެއް މިހާރުގެ ސަރުކާރުގައި ނެތް ކަމަށް ވިދާޅުވެ ސަރުކާރަށް ފާޑުވިދާޅުވިއެވެ.

ރާއްޖޭގެ އިގްތިސާދީ ހާލަތަށް އަލިއަޅުއްވާލައްވަމުން ނަޝީދު ވިދާޅުވީ، ގައުމު އިންތިހާއަށް ދަރަނިވެރިވެފައިވާ އިރު، އެކަމަށް ސަރުކާރުގެ އެއްވެސް ހައްލެއް ނެތް ކަމަށެވެ. އަދި ސަރުކާރުގެ މާލީ ސިޔާސަތެއް ނެތްކަން ހާމަވަނީ ފިނޭންސް މިނިސްޓަރު ކަމުގެ މަގާމުން އެތައް ބޭފުޅުންނެއް އިސްތިއުފާ ދެއްވަމުން ގެންދަވާތީ ކަމަށްވެސް އެމަނިކުފާނު ފާހަގަކުރެއްވިއެވެ.

މީގެ ކުރިން ރައީސް ސޯލިހާ ދެމެދު އުފެދުނު ސިޔާސީ ޚިޔާލުތަފާތުވުންތަކާ ގުޅިގެން، ނަޝީދު ވަނީ އެމްޑީޕީން ވަކިވެވަޑައިގެން 'ދަ ޑިމޮކްރެޓްސް' ގެ ނަމުގައި އާ ޕާޓީއެއް އުފައްދަވައި، 2023 ގެ ރިޔާސީ އިންތިޚާބުގައި ރައީސް ސޯލިހާ އިދިކޮޅަށް މަސައްކަތް ކުރައްވާފައެވެ. އެހެންނަމަވެސް، އަލުން އެމްޑީޕީއާ ގުޅިވަޑައިގަތުމަށް ފަހު، ކުރިން ގެންގުޅުއްވި "ބަލިވާ ފަޅީގައި ތިބޭ މީހުން ބާކީކުރުމުގެ" ރާގު ބަދަލުކުރައްވައި، އެއްބައިވަންތަކަމާއެކު މަސައްކަތް ކުރައްވާނެ ކަމަށް މިހާރު މިވަނީ ވިދާޅުވާން ފައްޓަވާފައެވެ.