ލުބުނާނުގެ ބެއިރޫތުގެ ދެކުނު ސަރަހައްދުތަކަށް އިޒްރޭލުން ދިން ހަމަލާތަކުގެ ބަދަލުހިފުމުގެ ގޮތުން، އާދީއްތަ ދުވަހުގެ ރޭ އީރާނުން އިޒްރޭލަށް ވަރުގަދަ މިސައިލް ހަމަލާތަކެއް ދީފިއެވެ.

މިއީ މިދިޔަ އޭޕްރީލް މަހު ހަމަލާ ބަދަލު ކުރުން ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުން އީރާނުން ސީދާ އިޒްރޭލަށް ހަމަލާދިން ފުރަތަމަ ފަހަރެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ނެރުނު ބަޔާނެއްގައި ބުނެފައިވަނީ، މި ހަމަލާއަކީ ލުބުނާނުގެ ދެކުނުގެ ޓަޔަރ އަދި ނަބަޓިއޭ ސަރަހައްދުގައި އިޒްރޭލުން ހިންގަމުންދާ ގަތުލުއާންމު ތަކަށް ދިން ރައްދެއް ކަމަށެވެ. މަދުވެގެން 20 މިސައިލް ހަތަރު ބޭހަކުން ފޮނުވާލާފައިވާއިރު، އީރާނުން ވަނީ މިއީ އިންޒާރެއް ކަމަށާއި، އިޒްރޭލުން އިތުރަށް ހަމަލާދީފިނަމަ މުޅި ސަރަހައްދުގައި ހުރި އެމެރިކާ އާއި އިޒްރޭލުގެ އަމާޒުތަކަށް ހަމަލާދޭނެ ކަމަށް ބުނެފައެވެ.

ޓްރަމްޕްގެ މެދުވެރިވުން:

މި ހަމަލާތަކާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް ގުޅުއްވައި، އިތުރު ރައްދު ހަމަލާއެއް ނުދިނުމަށް އަންގަވާފައެވެ. ޓްރަމްޕް ވިދާޅުވީ "އިޒްރޭލުން ހަމަލާ ދީފި، އީރާނުންވެސް ހަމަލާ ދީފި. ދެން އިތުރު ހަމަލާއެއް ބޭނުމެއް ނުވޭ". ކަމަށެވެ.

އީރާނަށް ޓްރަމްޕް ދެއްވި މެސެޖަކީ މިހާރު ހަމަލާތައް ދެވިއްޖެ ކަމަށާއި، އެނބުރި މަޝްވަރާގެ މޭޒަށް އައިސް އެއްބަސްވުމަކަށް ދިއުމަށެވެ.

އިޒްރޭލުގެ އަސްކަރިއްޔާގެ ޗީފް އޮފް ސްޓާފް ލެފްޓިނަންޓް ޖެނެރަލް އީޔާލް ޒަމީރު ވިދާޅުވީ، ސަރުކާރުން ހުއްދަ ދިންހާ އަވަހަކަށް ދުޝްމަނުންނަށް ވަރުގަދަ ހަމަލާއެއް ދިނުމަށް ތައްޔާރަށް އޮތް ކަމަށެވެ. ނަމަވެސް ޓްރަމްޕްގެ ފޯނު ކޯލަށްފަހު ނަތަންޔާހޫ މިހާރު ދަނީ ސަލާމަތީ އިސްވެރިންނާއެކު މަޝްވަރާ ކުރަމުން ކަމަށް ރިޕޯޓްތައް ބުނެއެވެ.

މަސްރަހު ދިރާސާކުރާ ފަރާތްތަކުގެ ނަޒަރު:

ސަރަހައްދީ މަސްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި، މިއީ އީރާނުގެ "ރެޑް ލައިން" ނުވަތަ ހުރަސްކޮށްގެން ނުވާނެ ރަތް ރޮނގުތައް އިޒްރޭލުން ޓެސްޓު ކުރުމުގެ ނަތީޖާއެވެ. ސިނާ ތޫސީ ފާހަގަކުރެއްވި ގޮތުގައި، ބެއިރޫތަށް ހަމަލާދީފިނަމަ ރައްދު ދޭނެ ކަމަށް އީރާނުން އޮތީ ކުރިންވެސް އިންޒާރު ދީފައެވެ. އެހެންކަމުން މި ހަމަލާއަކީ އީރާނުގެ ބަހުގެ އިތުބާރު ދެމެހެއްޓުމަށް ދިން ހަމަލާއެކެވެ.

ކުއިންސީ އިންސްޓިޓިއުޓްގެ ޓްރިޓާ ޕާސީ ވިދާޅުވީ، މިއީ އީރާނުގެ ފަސްގަނޑަށް ނޫން އެހެން ގައުމަކަށް (ލުބުނާނަށް) އިޒްރޭލުން ދިން ހަމަލާއަކާ ގުޅިގެން އީރާނުން ސީދާ އިޒްރޭލަށް ހަމަލާދިން ފުރަތަމަ ފަހަރު ކަމަށެވެ. މީގެ މާނައަކީ ހަނގުރާމައިގެ އުސޫލުތައް ބަދަލުވެ، ލުބުނާނަށް ދޭ ހަމަލާތަކަށްވެސް އީރާނުން ސީދާ ރައްދު ދޭނެކަން ސާބިތުކޮށްދިނުން ކަމަށް އޭނާ ވިދާޅުވިއެވެ.