ކެމިސްޓްރީގެ ދާއިރާގައި 1950ގެ އަހަރުތަކުން ފެށިގެން ސައިންސްވެރިން ހައްލު ހޯދުމަށް މަސައްކަތްކުރަމުން އައި ބޮޑު އިލްމީ އަރަތެއް، އިންޑިއާގެ ދިރާސާވެރިން ހައްލުކޮށްފިއެވެ.

ފެރޯސީން (Ferrocene) އަކީ ދަގަނޑު އެޓަމެއް ދެ ކާބަން ރިންގުގެ ދެމެދުގައި "ސޭންޑްވިޗް" ވެފައި ހުންނަ ޚާއްސަ ސްޓްރަކްޗާއެއް ހުންނަ މޮލިކިއުލްއެކެވެ. މިއީ ބޭސްވެރިކަމާއި، ބެޓެރީ އުފެއްދުމާއި، އެޑްވާންސް މެޓީރިއަލްސް އަދި އިލެކްޓްރޯނިކްސްގައި ފުޅާ ދާއިރާއެއްގައި ބޭނުންކުރާ ވަރަށް މުހިންމު އެއްޗެކެވެ.

ދިހަވަރަކަށް އަހަރު ވަންދެން ސައިންސްވެރިން މަސައްކަތްކުރަމުން އައީ، ކާބަން ބޭނުން ނުކޮށް މިފަދަ ޚާއްސަ ސްޓްރަކްޗާއެއް އެހެން އެލިމެންޓްތައް ބޭނުންކޮށްގެން އުފެއްދޭތޯއެވެ. ނަމަވެސް، މިކަން ކާމިޔާބުވެފައި ވަނީ މިހާރުއެވެ.

މި މޮލިކިއުލްގައި ދަގަނޑުގެ ބަދަލުގައި އޮސްމިއަމް (osmium) މެދުގައި ބަހައްޓައި، ކާބަން ރިންގުގެ ބަދަލުގައި ބޮރޮން (boron) އިން ހަދާފައިވާ ދެ ރިންގުގެ ދެމެދުގައި ވަނީ "ސޭންޑްވިޗް" ކޮށްފައެވެ.
މިއީ މުޅިން ކާބަން ފްރީ މޮލިކިއުލްއެކެވެ. އަދި އޮސްމިއަމް އާއި ބޮރޮން ރިންގްތަކާ ދެމެދު ހުންނަ ގުޅުން ވަރަށް ވަރުގަދަ ކަމުން، މިއީ ފެރޯސީންއަށް ވުރެ ވެސް ހަރުދަނާ މޮލިކިއުލްއަކަށް ވުމުގެ ފުރުސަތު އެބައޮތެވެ.

މި ހޯދުން ވަނީ ދުނިޔޭގެ އެންމެ މަޝްހޫރު އެއް ސައިންޓިފިކް ޖާނަލް ކަމަށްވާ "ސައިންސް" ގައި ޝާއިއުކޮށްފައެވެ. މި ހޯދުމަކީ ކެމިސްޓްރީގެ އަސާސީ ފިލާވަޅުތަކަށް އައި ބޮޑު ކުރިއެރުމެއް ކަމަށާއި، މީގެ ސަބަބުން ޚާއްސަ ގާބިލުކަން ލިބިފައިވާ އާ މެޓީރިއަލްތައް ފަރުމާ ކުރުމަށް އާ ދޮރުތަކެއް ހުޅުވިގެންދާނެ ކަމަށް ދިރާސާވެރިން ފާހަގަކުރެއެވެ