ވޭތުވެދިޔަ އެތައް އަހަރެއްގެ ތެރޭގައި ސައިންސްވެރިންނާއި ލިޔުންތެރިން ގަބޫލު ކުރަމުން އައީ، އިންސާނުންގެ އީޖާދުތަކާއި، ޓެކްނޮލޮޖީ އަދި ތަހުޒީބީ ދިރިއުޅުމުގެ ސަބަބުން، އިންސާނާގެ ބަޔޮލޮޖިކަލް ބަދަލުވުންތައް ނުވަތަ 'އިވޮލިއުޝަން' ހުއްޓިފައި ނުވަތަ ވަރަށް ބޮޑަށް ލަސްވެފައިވާ ކަމަށެވެ.

ގިނަ ބަޔަކު ދެކުނު ގޮތުގައި ބޭސްވެރިކަމާއި، އިޖުތިމާއީ ނިޒާމުތަކުގެ ސަބަބުން ތަބީޢީ ހޮވުމުގެ ބާރުތަކުން އިންސާނުން ވަނީ ސަލާމަތްވެފައެވެ. ނަމަވެސް، ދާދިފަހުން ނެރުނު ސައިންސީ ދިރާސާ އަކުން މި ގަބޫލު ކުރުންތައް ވަނީ މުޅިން ބަދަލު ކޮށްލާފައެވެ. މިކަމާ ބެހޭގޮތުން މަޝްހޫރު ސައިންސް މަޖައްލާ 'ނޭޗާ' ގައި އިންގިލާބީ ދިރާސާއެއް ވަނީ ޝާއިރު ކޮށްފައެވެ .

އަލީ އަކްބަރީ އަދި ޑޭވިޑް ރީކް އިސްވެ ތިއްބަވައިގެން ހެއްދެވި މި ދިރާސާގައި، ވޭތުވެދިޔަ 18،000 އަހަރުގެ ތެރޭގައި ޔޫރަޕާއި އޭޝިއާ ސަރަހައްދުގައި ދިރިއުޅުނު 15،000 އަށްވުރެ ގިނަ އިންސާނުންގެ 'އޭންޝަންޓް ޑީއެންއޭ' ތަހުލީލު ކޮށްފައިވެއެވެ.

މި ދިރާސާގެ އެންމެ މުހިންމު ހޯދުމަކީ، ވޭތުވެދިޔަ 10،000 އަހަރުގެ ތެރޭގައި (އިންސާނުން ދަނޑުވެރިކަން ކުރަން ފަށައި، ސިޓީތައް ބިނާ ކުރަން ފެށި ފަހުން) އިންސާނާގެ ނަސްލަށް އައި ބަދަލުތައް މަޑުޖެހުމުގެ ބަދަލުގައި، މުޅިން އާ މިސްރާބަކަށް ހަލުވިކަމާއެކު ދަތުރުކުރަން ފެށިކަމެވެ.

އިންސާނުންގެ އަމިއްލަ ސަގާފަތާއި ތަހުޒީބަކީ އިވޮލިއުޝަން ހުއްޓުވި އެއްޗެއް ނޫނެވެ. އޭގެ ބަދަލުގައި، ތަހުޒީބަކީ އިންސާނާގެ ޖީންތަކަށް ބަދަލުތައް ގެނުވި އެންމެ ބާރުގަދަ 'އިންޖީނު' ކަމުގައި ވެގެންދިޔައެވެ. ދަނޑުވެރިކަމަށް ހިޖުރަކުރުމާއެކު އިންސާނުންގެ ކާނާގެ ނިޒާމަށް ބޮޑެތި ބަދަލުތަކެއް އައެވެ. ކާބޯހައިޑްރޭޓް ގިނަ ކާނާ ކާންޖެހުމާއި، ތޮއްޖެހިފައިވާ ރަށްތަކާއި ސިޓީތަކުގައި ދިރިއުޅެން ޖެހުމާއި، އަދި ގެންގުޅޭ ޖަނަވާރުންގެ ފަރާތުން އާ ބަލިތައް ފެތުރެން ފެށުމުން، އިންސާނާގެ ހަށިގަނޑަށް އާ ގޮންޖެހުންތަކާ ކުރިމަތިވިއެވެ.

މި ދިރާސާއިން ދައްކާ ގޮތުގައި، މި ބަދަލުތަކާ ގުޅިގެން އިންސާނުންގެ ޖީންތަކުން 479 ބަދަލެއް ވަނީ ފާހަގަ ކުރެވިފައެވެ. މީގެ ތެރޭގައި ޖުޒާމް ބަލި އާއި އެޗް.އައި.ވީ ފަދަ ވައިރަސްތަކާ ދެކޮޅަށް ހަށިގަނޑުގެ ދިފާއީ ނިޒާމު ވަރުގަދަކޮށްދޭ ޖީންތައް ހިމެނެއެވެ. މީގެ އިތުރުން، އިންފްލެމޭޓަރީ އަދި އޮޓޯއިމިއުން ބަލިތަކާ ގުޅުންހުރި ޖީންތަކަށްވެސް ބޮޑެތި ބަދަލުތަކެއް އައިސްފައިވާކަން މި ދިރާސާއިން އެނގެއެވެ.

މި ހޯދުންތަކަކީ ހަމައެކަނި ތާރީޚީ ކަމެއް ނޫނެވެ. މިއީ މިއަދުގެ ބޭސްވެރިކަމަށްވެސް ނުހަނު މުހިންމު މަޢުލޫމާތު ތަކެކެވެ. މިއަދު އިންސާނުންނަށް ދިމާވާ ބައެއް ބަލިތަކަކީ، މީގެ އެތައް ހާސް އަހަރެއް ކުރިން އިންސާނުން ބޮޑެތި ބަލިމަޑުކަންތަކުން ނުވަތަ ބަނޑުހައިހޫނު ކަމުން ސަލާމަތް ވުމަށްޓަކައި ހަށިގަނޑަށް އައި ބަދަލުތަކެއްގެ ނަތީޖާއެވެ. މިސާލަކަށް، އެ ޒަމާނުގައި އިންފެކްޝަންތަކުން ސަލާމަތްވުމަށް ހަށިގަނޑުގެ ދިފާއީ ނިޒާމު މަސައްކަތްކުރި ގޮތުގެ ސަބަބުން، މިއަދުގެ އިންސާނުންނަށް 'އޮޓޯއިމިއުން' ބަލިތަކާއި، ފަލަވުމުގެ މައްސަލަތައް ކުރިމަތިވުމަށް މަގުފަހިވެއެވެ.

މި ދިރާސާއިން ލިބިދޭ އެންމެ ފުން މެސެޖަކީ، އިންސާނުންނަކީ ދުނިޔޭގެ ތަބީޢީ ގާނޫނުތަކުން ނުވަތަ އިވޮލިއުޝަންގެ ދާއިރާއިން ބޭރުވެފައިވާ ބައެއް ނޫންކަމެވެ. އަޅުގަނޑުމެންގެ ސިޓީތަކާއި، ލިޔަންކިޔަން ދަތުމާއި، ދަނޑުވެރިކަމާއި، ސަރުކާރުތަކުގެ ސަބަބުން އިވޮލިއުޝަން ހުއްޓުމަކަށް ނާދެއެވެ. އޭގެ ބަދަލުގައި، އިންސާނާގެ ތާރީޚަކީ ސަގާފީ އަދި ބަޔޮލޮޖިކަލް ގޮތުން އެކިއެކި ބަދަލުތައް އެކުއެކީގައި އަންނަމުންދާ ދިގު ދަތުރެކެވެ. އިންސާނުން އަދިވެސް ދަނީ ބަދަލުވަމުންނެވެ—އަދި ކުރިއަށްވުރެ މާ ހަލުވިކޮށެވެ