ޒަކާތު ފަންޑުގެ އެހީގައި ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލްކުރުމަށް ބޭނުންވާ ދިވެހި ދަރިވަރުންނަށް ސްކޮލަރޝިޕާއި ޚާއްސަ ސްކޮލަރޝިޕްގެ ފުރުސަތުތަކެއް މޯލްޑިވްސް ޒަކާތު ހައުސްއިން ހުޅުވާލައިފިއެވެ. ޖުމްލަ 30 ފުރުސަތު ހިމެނޭ މި ސްކީމުގެ ދަށުން، ރާއްޖޭގައި ކިޔެވުމަށް 10 ފުރުސަތާއި، ރާއްޖެއިން ބޭރުން ކިޔެވުމަށް 20 ފުރުސަތު ވަނީ ކަނޑައެޅިފައެވެ.
ރާއްޖޭގެ ތަޢުލީމީ މަރުކަޒުތަކުގެ ތެރޭގައި ހިމެނޭ އިސްލާމިކް ޔުނިވަރސިޓީ، ޤައުމީ ޔުނިވަރސިޓީ، ވިލާ ކޮލެޖް، އެވިޑް ކޮލެޖް، އަދި ޒިކުރާ ކޮލެޖުން މާސްޓަރސް އަދި ޕީ.އެޗް.ޑީ ފެންވަރަށް ކިޔެވުމުގެ ފުރުސަތު ވަނީ ހިމެނިފައެވެ. ފުރުސަތު ލިބޭ ދާއިރާތަކުގެ ތެރޭގައި އިސްލާމިކް ޝަރީޢާ، ޤުރުއާނިކް ސައިންސެސް، އަދި އިސްލާމިކް ބޭންކިންގ ހިމެނެއެވެ. ރާއްޖެއިން ބޭރުން ކިޔެވުމަށް ހުޅުވާލެވިފައިވަނީ މެލޭޝިއާ، ބްރޫނާއި، އަދި ޕާކިސްތާނުގެ ނަން މަޝްހޫރު އިސްލާމީ ޔުނިވަރސިޓީތަކުން ޑިގްރީ، މާސްޓަރސް، އަދި ޕީ.އެޗް.ޑީ ފެންވަރަށް ކިޔެވުމުގެ ފުރުސަތެވެ.
މި ސްކީމުގެ ތެރެއިން ޚާއްސަ ސްކޮލަރޝިޕްތަކެއް ވެސް ވަނީ ތަޢާރަފުކޮށްފައެވެ. ސާކް ޤައުމުތަކުގައި އަންހެނުންގެ ޚާއްސަ ބަލިތަކަށް ޚިދުމަތްދޭ ދާއިރާ ކިޔަވާ ދިވެހި އަންހެން ޑޮކްޓަރުން ތަމްރީނު ކުރުމަށް 5 ޚާއްސަ ސްކޮލަރޝިޕެއް ވަނީ ހަމަޖެހިފައެވެ. ހަމައެއާއެކު، ސަޢުދީ ޢަރަބިއްޔާ އާއި މިސްރުގައި އިސްލާމީ ދާއިރާތަކުން ތަޢުލީމު ހާސިލްކުރަމުންދާ، ޔުނިވަރސިޓީ ހޮސްޓަލްގެ ބޭރުގައި އާއިލާއާއެކު ދިރިއުޅޭ ދަރިވަރުންނަށް 5 ސްޓައިޕެންޑް އެހީ ވެސް ވަނީ ހާއްސަ ކުރެވިފައެވެ.
މި ސްކޮލަރޝިޕަށް ކުރިމަތިލެވޭނީ، 18 އަހަރު ފުރިފައިވާ، ކިޔެވުމުގެ މާލީ ފުދުންތެރިކަން ނެތް ދިވެހިންނަށެވެ. ދައުލަތުގެ ސްކޮލަރޝިޕެއް ނުވަތަ ލޯނެއްގެ ތެރެއިން ކިޔެވުމަށް ފައިސާ ލިބެމުންދާ ފަރާތްތަކަށް ކުރިމަތިނުލެވޭނެ ކަމަށް ޒަކާތު ހައުސްއިން ފާހަގަ ކުރެއެވެ. ހަމައެއާއެކު، ކިޔަވަން ހުށަހަޅާ ކޯހަކީ އިސްލާމިކް މޮޑިއުލްތައް ހިމެނޭ ކޯހަކަށް ވާންޖެހޭނެ ކަމުގައިވެސް ވަނީ ކަނޑައެޅިފައެވެ.
ސްކޮލަރޝިޕަށް ކުރިމަތިލުމުގެ ސުންގަޑިއަކީ 16 ޖުލައި 2026 ވާ ބުރާސްފަތި ދުވަހުގެ މެންދުރުފަހު 2:00 ކަމަށް ޒަކާތު ހައުސްއިން ބުނެއެވެ. ފޯމާއި ހުރިހާ ލިޔެކިޔުންތަކެއް ހުށަހަޅަންޖެހޭނީ [email protected] އަށް އީމެއިލް ކުރައްވައިގެންނެވެ. ސްކޮލަރޝިޕާ ބެހޭ އިތުރު މަޢުލޫމާތު ސާފުކުރެއްވުމަށް ޒަކާތު ހައުސްގެ ނަންބަރު 3021414 އަށް ގުޅުއްވުމަށް އިލްތިމާސްކޮށްފައިވެއެވެ.
