އިރާނުގެ ޖާސޫސީ އިދާރާތަކަށް ސިއްރު މައުލޫމާތު ފޯރުކޮށްދިން ކަމުގެ ބޮޑު ތުހުމަތުގައި އިޒްރޭލުގެ ސިފައިންގެ ތިން މީހަކާއި އާންމު ރައްޔިތަކު ހައްޔަރުކޮށް، މިއަދު ރަސްމީކޮށް ދައުވާ އުފުލައިފިއެވެ.
އިޒްރޭލުގެ މީޑިއާތަކުން ރިޕޯޓުކޮށްފައިވާ ގޮތުގައި މި ހަތަރު މީހުން ހައްޔަރުކޮށްފައިވަނީ މިއަހަރުގެ މާޗު މަހުގެ ތެރޭގައެވެ. ނަމަވެސް އެ ގައުމުގެ އެޓާނީ ޖެނެރަލްގެ އޮފީހުން އެ މީހުންގެ މައްޗަށް ރަސްމީކޮށް ދައުވާ އުފުލާފައިވަނީ މިއަދުއެވެ. ރިޕޯޓުތައް ބުނާ ގޮތުގައި މި މީހުން އިރާނަށް މަސައްކަތް ކޮށްދޭން ފަށާފައިވަނީ ކުޑަކުދިންގެ ގޮތުގައި ތިބި ދުވަސްވަރުއެވެ.
އިޒްރޭލުގެ ދާޚިލީ ސަލާމަތީ އިދާރާ 'ޝިން ބެޓް' އާއި އެގައުމުގެ ފުލުހުން ބުނެފައިވާ ގޮތުގައި، މި މީހުންގެ މައްޗަށް ކުރެވޭ މައިގަނޑު ތުހުމަތަކީ ސަލާމަތީ ގޮތުން ނާޒުކު ސަރަހައްދުތަކުގެ ފޮޓޯ އާއި ވީޑިއޯ ނަގައި އިރާނަށް ފޯރުކޮށްދިނުމެވެ. މީގެ ތެރޭގައި އިޒްރޭލުގެ އެއަރ ފޯސްގެ ތަމްރީނު މަރުކަޒެއްގެ މައުލޫމާތު ހިމެނޭ ކަމަށާއި، ހައްޔަރުކުރި ބައެއް މީހުންނަކީ އެ މަރުކަޒުގައި ތައުލީމު ހާސިލުކުރި ބައެއް ކަމަށް ވެސް އިދާރާތަކުން ބުނެއެވެ.
ކަމާ ބެހޭ ފަރާތްތަކުން ހާމަކޮށްފައިވާ ގޮތުގައި، މީގެ ތެރެއިން ބައެއް މީހުންނަކީ އެއްވެސް މަޖުބޫރުކަމެއް ނެތި، އަމިއްލަ އިސްނެގުމުގެ މަތިން އިރާނުގެ އެޖެންޓުންނާ ގުޅުން ގާއިމުކުރި ބައެކެވެ.
