ބައިނަލްއަގުވާމީ ކަނޑުދަތުރުފަތުރުގެ ސަލާމަތީ ގަވާއިދުތަކާ ހިލާފުވި ކަމަށް ބުނެ، ހުރްމުޒް ކަނޑުއޮޅިން ދަތުރުކުރި އެމެރިކާގެ އަސްކަރީ އުޅަނދަކަށް އީރާނުގެ ކަނޑުގެ ސިފައިން ވަރުގަދަ މިސައިލް ހަމަލާތަކެއް ދީފިއެވެ.

އީރާނުގެ ރަސްމީ މަސްދަރުތަކުން ހާމަކުރި ގޮތުގައި، މި ހަމަލާ ދީފައިވަނީ އީރާނުގެ ދެކުނުން، ގަލްފް އޮފް އޮމާންގައި އޮންނަ ޖަސްކް އައިލެންޑް ކައިރިންނެވެ. އީރާނުގެ ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނީ، އީރާނުގެ އަސްކަރިއްޔާއިން ދިން ވަރުގަދަ ހަމަލާތަކުގެ ސަބަބުން އެމެރިކާގެ މަނަވަރަށް މަޖުބޫރުވީ ފަހަތަށް އެނބުރި ދިއުމަށެވެ. އަދި އީރާނުގެ ސަރަހައްދުން އެ އުޅަނދު ފިލައިގެން ދިޔައީ ކަމަށްވެސް ތެހެރާނުން ވަނީ ބުނެފައެވެ. ނަމަވެސް، އެމެރިކާގެ ސެންޓްރަލް ކޮމާންޑުން ވަނީ އީރާނުގެ މި ވާހަކަތައް ދޮގުކޮށްފައެވެ.

މި ހަމަލާތަކުގެ ފަހަތުގައި ވަނީ މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން އީރާނަށް އަމާޒުކޮށް ދިން ހަމަލާތަކެވެ. އެކަމުގެ ބަދަލުހިފުމުގެ ގޮތުން އީރާނުން ވަނީ ގަލްފުގައި ތިބި އެމެރިކާގެ އެކުވެރި ގައުމުތަކާ ދެކޮޅަށް ފިޔަވަޅު އަޅައި، ދުނިޔޭގެ ތެލުގެ ވިޔަފާރީގެ މުހިންމު މަގު ކަމަށްވާ ހުރްމުޒް ކަނޑުއޮޅި ބަންދުކޮށްފައެވެ. މީގެ އިތުރުން، އޭޕްރީލް 13 ވަނަ ދުވަހުން ފެށިގެން އެމެރިކާއިން ވެސް ދަނީ އީރާނަށް ވަދެނުކުމެ އުޅޭ އުޅަނދުތަކަށް ހުރަސްއަޅައި ފިއްތުންތައް ކުރިމަތިކުރަމުންނެވެ.

މި ނުރައްކާތެރި ހާލަތު ހައްލުކުރުމަށް ޕާކިސްތާނުން ދަނީ މެދުވެރިއެއްގެ ދައުރު އަދާކޮށް ބޮޑެތި މަސައްކަތްތަކެއް ކުރަމުންނެވެ. އެގޮތުން އޭޕްރީލް 8 ވަނަ ދުވަހު ދެ ހަފްތާގެ މުއްދަތަށް ހަނގުރާމަ ހުއްޓާލުމަށް އިއުލާންކޮށް، އޭޕްރީލް 11 ގައި އިސްލާމްއާބާދުގައި ސީދާ މަޝްވަރާތަކެއް ކުރިއަށް ގެންގޮސްފައިވެއެވެ. ނަމަވެސް، މިހާތަނަށް ދާއިމީ ހައްލަކަށް ނުވަތަ ރަސްމީ އެއްބަސްވުމަކަށް އާދެވިފައެއް ނުވެއެވެ.

އެހެންނަމަވެސް، ޕާކިސްތާނުގެ އެދުމުގެ މަތިން އެމެރިކާގެ ރައީސް ވަނީ، މިހާރު އިއުލާންކޮށްފައިވާ ހަނގުރާމަ ހުއްޓާލުމުގެ މުއްދަތު، ވަކި މުއްދަތެއް ނެތް ގޮތަށް އިތުރުކޮށްދެއްވާފައެވެ. މިއީ ސަރަހައްދީ ހަމަޖެހުމަށް ލިބުނު ކުޑަ އުންމީދެއް ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.