ތައިލެންޑުގެ ވެރިރަށް ބެންކޮކްގެ "ހީޓް އިންޑެކްސް" ނުވަތަ އިހުސާސް ކުރެވޭ ހޫނުމިން، ނުރައްކާތެރި މިންވަރަކަށް މައްޗަށް ގޮސްފައިވާތީ، ކޮންމެހެން ބޭނުން ޖެހިގެން ނޫނީ ބޭރަށް ނުނިކުތުމަށް އެ ގައުމުގެ ކަމާބެހޭ ފަރާތްތަކުން އިންޒާރު ދީފިއެވެ.

ބެންކޮކްގެ ސިޓީ އެޑްމިނިސްޓްރޭޝަނުން ނެރުނު ބަޔާނެއްގައި ބުނެފައިވަނީ، ހޫނުމިން ހުރީ 52 ޑިގްރީ ސެލްސިއަސް އަށް ވުރެ މަތީގައި ކަމަށާއި، މިއީ "އެކްސްޓްރީމް ޑޭންޖަރ" ނުވަތަ އިންތިހާއަށް ނުރައްކާތެރި ދަރަޖައެއް ކަމަށެވެ. މިފަދަ ހޫނުމިނެއްގައި ބޭރުގައި ގިނަވަގުތު އުޅުމަކީ ހީޓް ސްޓްރޯކް ޖެހުމުގެ ފުރުސަތު ބޮޑުވާނެ ކަމެއް ކަމަށް އެ އިދާރާއިން ފާހަގަކުރެއެވެ.

ތައިލެންޑުގެ މޫސުމާ ބެހޭ އިދާރާއިން މައުލޫމާތު ދޭ ގޮތުގައި، މި ދުވަސްވަރު އެ ގައުމަށް ކުރިމަތިވެފައިވާ ގަދަ ހޫނުގެ ސަބަބުން އާންމު ސިއްހަތަށް ބޮޑެތި ނުރައްކާތަކެއް އެބަހުއްޓެވެ. ހާއްސަކޮށް އުމުރުން ދުވަސްވީ މީހުންނާއި، ކުޑަކުދިން އަދި ބޭރުގައި މަސައްކަތްކުރާ މީހުން ސަމާލުވުމަށް ވަނީ އަންގާފައެވެ.

ހޫނުމިން މައްޗަށް ދިއުމާ ގުޅިގެން ސިއްހީ މާހިރުން ދޭ ލަފާގެ ތެރޭގައި ހިމެނެނީ:
* ވީހާވެސް ގިނައިން ފެން ބުއިން.
* ގަދަ އަވީގައި ކަސްރަތު ކުރުމާއި ބުރަ މަސައްކަތް ކުރުމުން ދުރުހެލިވުން.
* ލުއި އަދި ފަސޭހަ ހެދުން އެޅުން.
* ހިޔާލިބޭ ފިނި ތަންތަނުގައި ވަގުތު ހޭދަކުރުން.

މި އަހަރަކީ ތައިލެންޑަށް ރެކޯޑް މިންވަރަކަށް ހޫނުގަދަ އަހަރެއްގެ ގޮތުގައި ފާހަގަ ކުރެވިފައި ވާއިރު، މިއީ މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ކަމެއް ކަމަށް ތަޖުރިބާކާރުން ބުނެއެވެ. ބެންކޮކްގެ އިތުރުން ތައިލެންޑުގެ އެހެން ސަރަހައްދުތަކުގައި ވެސް ހޫނުމިން ހުރީ އާންމު މިންގަނޑަށް ވުރެ މަތީގައެވެ.