ދުނިޔޭގެ ހޫނުމިން ރެކޯޑް މިންވަރަކަށް މަތިވުމަށް މެދުވެރިވާ މޫސުމީ ހާލަތު ކަމަށްވާ "އެލް ނީނޯ" މިއަހަރުގެ މެދުތެރޭގައި އަލުން ފެށިދާނެ ކަމުގެ އިންޒާރު އދ. އިން ދީފިއެވެ.

އދ. ގެ މޫސުމާ ބެހޭ އިދާރާ، ވޯލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިއުއެމްއޯ) އިން ނެރުނު ބަޔާނެއްގައި ބުނެފައިވަނީ، މިއަހަރުގެ މޭ މަހާއި ޖުލައި މަހާ ދެމެދު އެލް ނީނޯގެ އަސަރުތައް ފެންނަން ފަށާނެ ކަމަށެވެ.

އަދި މިހާރު ފެންނަ ނިޝާންތަކަށް ބަލާއިރު، މިއީ ވަރަށް ބާރުގަދަ އިވެންޓަކަށް ވުމުގެ ފުރުސަތު ބޮޑު ކަމަށް ވެސް އެ އިދާރާއިން ވަނީ ބުނެފައެވެ.

އެލް ނީނޯއަކީ ކަނޑުގެ ސަތަހައިގެ ހޫނުމިން އާދަޔާ ހިލާފަށް މަތިވުމުގެ ސަބަބުން ކުރިމަތިވާ ގުދުރަތީ މޫސުމީ ހާލަތެކެވެ. މީގެ ސަބަބުން ޕެސިފިކް ކަނޑުގެ އިރުމައްޗާއި މެދުތެރޭގެ ސަތަހައިގެ ހޫނުމިން މަތިވެ،

ދުނިޔޭގެ ވައިގެ ދައުރުވުމާއި، ޕްރެޝަރާއި، ވާރޭ ވެހޭ ގޮތަށް ބޮޑެތި ބަދަލުތަކެއް އާދެއެވެ. އާންމުގޮތެއްގައި މި ހާލަތު 9 މަހާއި 12 މަހާ ދެމެދުގެ މުއްދަތަކަށް ދެމިގެންދެއެވެ.

ޑަބްލިއުއެމްއޯގެ ކްލައިމެޓް ޕްރެޑިކްޝަން ޗީފް ވިލްފްރަން މޫފޫމާ-އޮކިއާ ވިދާޅުވީ، މިއަހަރުގެ ކުރީކޮޅު މޫސުން "ނިއުޓްރަލް" ކޮށް އޮތުމަށް ފަހު، މިހާރު ފެންނަނީ އެލް ނީނޯ އުފެދި އިތުރަށް ވަރުގަދަވަމުންދާ މަންޒަރު ކަމަށެވެ.

އޭނާ އިތުރަށް ފާހަގަކުރެއްވި ގޮތުގައި، 2024 ވަނަ އަހަރަކީ ދުނިޔޭގެ ތާރީޚުގައި ވެސް އެންމެ ހޫނުގަދަ އަހަރަށް ވީ، 2023-2024 ގައި އައި ވަރުގަދަ "އެލް ނީނޯ" އާއި އިންސާނުންގެ ހަރަކާތްތަކުގެ ސަބަބުން ކުރިމަތިވެފައިވާ މޫސުމީ ބަދަލުތައް މަސްހުނިވުމުގެ ސަބަބުންނެވެ.

އދ. ގެ މޫސުމާ ބެހޭ އިދާރާއިން މިފަދަ އިންޒާރެއް ދިނުމުގެ މައިގަނޑު ބޭނުމަކީ، ދަނޑުވެރިކަމާއި، ފެނުގެ ވަސީލަތްތައް ބެލެހެއްޓުމާއި، ހަކަތަ އަދި ސިއްހީ ދާއިރާތަކުން ކުރިއާލާ ތައްޔާރުވުމަށް ފުރުސަތު ދިނުމެވެ.

އެލް ނީނޯގެ ސަބަބުން ދުނިޔޭގެ އެކި ހިސާބުތަކަށް ކުރާނެ ނޭދެވޭ އަސަރުތައް ކުޑަކުރުމަށްޓަކައި ދުރާލާ ފިޔަވަޅު އެޅުމަކީ މުހިންމު ކަމެއް ކަމަށް އެ އިދާރާއިން ވަނީ ބުނެފައެވެ.