ޖަޕާނުގެ ކަނަކާވާ ޕްރިފެކްޗާގެ އައްސޭރިފަށުގެ ސިޓީއެއް ކަމަށްވާ ފުޖިސާވާގެ މިއަހާރާ ސަރަހައްދުގައި ބޮޑު މިސްކިތެއް އެޅުމަށް ރޭވުމާ ގުޅިގެން، އެ ސަރަހައްދުގެ އެތައް ހާސް ރައްޔިތުންނެއް ވަނީ މަގުތަކަށް ނުކުމެ މުޒާހަރާކޮށްފައެވެ.

މިއީ އެ ސިޓީގައި ބިނާކުރާ ފުރަތަމަ ބޮޑު މިސްކިތަށް ވާއިރު، މީގެ ކުރިންވެސް މި މަޝްރޫޢާ ގުޅިގެން އެކި ފަހަރުމަތިން ނުތަނަވަސްކަން އުފެދިފައިވެއެވެ.

މުޒާހަރާގެ ބައިވެރިން ފާހަގަކުރާ ގޮތުގައި އެމީހުން ބިރުގަންނަނީ މިސްކިތުގެ ސަބަބުން އެމީހުންގެ ސަގާފީ އައިޑެންޓިޓީ އަށް ގެއްލުން ވެދާނެތީއެވެ.

މި މިސްކިތް ބިނާކުރާ ސަރަހައްދާ ކައިރީގައި ޖަޕާނުގެ ދީނީ ބިނާއެއް ކަމަށްވާ "ޝިންޓޯ ޝްރައިން" އެއް ހުރެއެވެ. މިސްކިތުގެ ސައިޒު އެތަނަށްވުރެ ބޮޑުވުމުން، ސަރަހައްދުގެ ސަގާފީ ސިފަ ގެއްލިދާނެ ކަމަށް ރައްޔިތުން ދަނީ ބުނަމުންނެވެ.

ބައެއް ރައްޔިތުން ކަންބޮޑުވަނީ ބަންގީގެ އަޑު ބޭރަށް އިވޭނެތީއެވެ. ނަމަވެސް، މިސްކިތުގެ އިސްވެރިން ބުނެފައިވަނީ ބަންގީގެ އަޑު ހުންނާނީ ހަމައެކަނި އެތެރެއަށް އިވޭ ގޮތަށް ކަމަށެވެ.

ނަމާދު ވަގުތުތަކުގައި ގިނަ އަދަދެއްގެ މީހުން އެ ސަރަހައްދަށް އެއްވުމުން ދަތުރުފަތުރަށް ދަތިވާނެ ކަމުގެ ބިރުވެސް އޮތް ކަމަށް އެމީހުން ބުނެއެވެ.

މި މައްސަލަ ކުރިމަތިވެފައިވަނީ ޖަޕާނުގައި މުސްލިމް އާބާދީ ވަރަށް ހަލުވިކަމާއެކު އިތުރުވަމުންދާ ދަނޑިވަޅެއްގައެވެ. ތަފާސްހިސާބުތަކުން ދައްކާގޮތުގައި:
* 2010 ވަނަ އަހަރު ޖަޕާނުގައި ތިބީ ގާތްގަނޑަކަށް 110,00 މުސްލިމުންނެވެ.
* 2024 ވަނަ އަހަރުގެ ނިޔަލަށް މި އަދަދު ވަނީ 420,000އަށް އަރާފައެވެ.
* މީގެ ތެރޭގައި ގިނައީ އިންޑޮނޭޝިއާ، ޕާކިސްތާން އަދި ބަންގްލަދޭޝް ފަދަ ގައުމުތަކުން މަސައްކަތް ކުރަން ގޮސް އުޅޭ މީހުންނެވެ.

ފުޖިސާވާ ސިޓީގެ ކައުންސިލުން ބުނެފައިވަނީ، މިސްކިތް އެޅުމުގެ މަޝްރޫޢަކީ ޖަޕާނުގެ ޒޯނިންގް އަދި އިމާރާތްކުރުމުގެ ގަވާއިދުތަކާ އެއްގޮތަށް ކުރިއަށްދާ މަޝްރޫޢެއް ކަމަށެވެ. އެހެންކަމުން، ރައްޔިތުންގެ މުޒާހަރާތައް ހުރި ނަމަވެސް، ގާނޫނީ ގޮތުން އެކަން ހުއްޓުވުމުގެ ބާރު ސަރުކާރަށް ނެތް ކަމަށް އޮފިޝަލުން ވަނީ ވިދާޅުވެފައެވެ.

ޖަޕާނަކީ ދީނީ މިނިވަންކަން އޮންނަ ގައުމަކަށް ވީނަމަވެސް، ގައުމުގެ އާބާދީގެ ބޮޑުބައެއް ބިދޭސީންނަށް ވަމުންދާތީ، އާންމު ރައްޔިތުންގެ މެދުގައި ވަނީ ނުތަނަވަސްކަން އުފެދިފައެވެ. މި މައްސަލައަކީ ހަމައެކަނި ދީނީ މައްސަލައެއް ނޫން ކަމަށާއި، މިއީ ޖަޕާނުގެ ސަގާފަތް ހިމާޔަތްކުރުމުގެ ބަހުސެއް ކަމަށް މުޒާހަރާގެ ބައިވެރިން ގަބޫލުކުރެއެވެ.