ޕްރިމިއާ ލީގުގެ ތަށި ހޯދުމުގެ ވާދަވެރި ރޭހުގައި، މެންޗެސްޓަރ ސިޓީން އާސެނަލްގެ މައްޗަށް 2-1 އިން ކުރިހޯދައި، ތަށި ދިފާއުކުރުމުގެ ރޭހަށް ދިރުން ގެނެސްފިއެވެ. ދެ ޓީމު ދެމެދު ފޯރިގަދަ ކުޅުމެއް ފެނިގެންދިޔަ މި މެޗަށްފަހު، ތާވަލުގެ ކުރީ ދެ ޓީމު ދެމެދު އޮތް ފަރަގު ވަނީ ތިން ޕޮއިންޓަށް ހަނިވެފައެވެ.

އިއްތިހާދު ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި ރަޔާން ޗެރްކީ ވަނީ އާސެނަލްގެ ޑިފެންޑަރުން ކައިރިން ނައްޓާލުމަށްފަހު ހިތްގައިމު ލަނޑެއް ޖަހައި ސިޓީއަށް ކުރިހޯދައިދީފަ އެވެ. ނަމަވެސް، ސިޓީގެ ކީޕަރު ޖިއަންލުއިޖީ ޑޮނަރުއްމާ ހެދި ގޯހެއްގެ ފައިދާ ނަގައި، އާސެނަލްގެ ކައި ހާވާޓްޒް ވަނީ ލަނޑެއް ޖަހައި ނަތީޖާ އެއްވަރުކޮށްފަ އެވެ.

ދެވަނަ ހާފުގައި ދެ ޓީމުވެސް ލަނޑު ޖެހުމަށް ގިނަ މަސައްކަތްތަކެއް ކުރިއެވެ. އާސެނަލްގެ އެބެރެޗީ އެޒޭ ފޮނުވާލި ހަމަލާ ގޯލުގެ ދަނޑިއަށް އެރުމުން ސިޓީީ ސަލާމަތްވިއިރު، ހާވަރްޓްޒްއަށް ލިބުނު ފުރުސަތުތައް ޑޮނަރުއްމާ ވަނީ ހުށިޔާރުކަމާއެކު ދިފާއު ކޮށްފައެވެ. ހާލަންޑް މި ލަނޑު ޖެހީ އާސެނަލްގެ ޑިފެންޑަރު ގަބްރިއެލްއާއެކު ދަނޑުމަތީގައި ބޮޑު ކުރިމަތިލުމެއް ހިނގަމުން ދަނިކޮށެވެ. މި ކުރިމަތިލުމުގެ ތެރޭގައި ގަބްރިއެލް ވަނީ ހާލަންޑްގެ ޖާޒީގެ އަތްވައްޓާލާފަ އެވެ. އަދި ދެ ކުޅުންތެރިން ބޮލާއި ބޯ ޖައްސައި ހިންގި ހަމަނުޖެހުމާ ގުޅިގެން ރެފްރީ ވަނީ ދެ ކުޅުންތެރިންނަށް ރަތް ކާޑުގެ ބަދަލުގައި ރީނދޫ ކާޑެއް ދައްކާފަ އެވެ.

މި ނަތީޖާއާއެކު، އާސެނަލް މިވަނީ ތާވަލުގެ އެއްވަނައިގައި ނުރައްކަލެއްގެ ތެރޭގަ އެވެ. ސިޓީއަށް އާސެނަލަށްވުރެ އެއް މެޗު މަދުން ކުޅެން އޮތްއިރު، އަންނަ ބުދަ ދުވަހުގެރޭ ބާންލީއާ ބައްދަލުކުރާ މެޗުން މޮޅުވެއްޖެނަމަ ޕެޕް ގާޑިއޯލާގެ ޓީމަށް ތާވަލުގެ އެއްވަނައަށް އެރުމުގެ ފުރުސަތު އެބައޮތެވެ.

އާސެނަލްގެ ކޯޗު މިކޭލް އާޓެޓާގެ ޓީމުން މި މެޗުގައި ރަނގަޅު ކުޅުމެއް ދެއްކި ނަމަވެސް، ނަތީޖާ ނެރުމުގައި ނަސީބު އެހީތެރިއެއް ނުވި އެވެ. އާސެނަލްގެ ދެން އޮތް މެޗަކީ އަންނަ ހޮނިހިރު ދުވަހު ނިއުކާސަލް ޔުނައިޓެޑާ ދެކޮޅަށް ކުޅޭ މެޗެވެ. އެ މެޗަށް ނުކުންނައިރު އާސެނަލް ތާވަލުގެ ދެވަނައަށް ވެއްޓުމުގެ ބިރު މިހާރު ވަނީ ބޮޑުވެފަ އެވެ.