އެމެރިކާގެ އަސްކަރިއްޔާއިން އީރާނުގެ އިގްތިސާދު ހުއްޓުވުމަށްޓަކައި އެގައުމުގެ ބަނދަރުތައް ހިސާރުކޮށް، ކަނޑުމަގުން ކުރާ ވިޔަފާރިތައް ހުއްޓުވުމުގެ ވަރުގަދަ އޮޕަރޭޝަނެއް ފަށައިފިއެވެ.
އެންބީސީ ނިއުސް އިން ރިޕޯޓްކޮށްފައިވާ ގޮތުގައި، މިއީ މެދުއިރުމަތީގެ މަސްރަހު ނުތަނަވަސްވެ، ބޮޑު ކުރިމަތިލުމަކަށް މަގުފަހިވެދާނެ ފަދަ ނުރައްކާތެރި ފިޔަވަޅެކެވެ.
އީރާނުގެ ބަނދަރުތައް ބަންދުކޮށް، ކަނޑުމަގުން އެއްވެސް މުދަލެއް އެތެރެވިޔަ ނުދިނުމަށްޓަކައި އެމެރިކާއިން ވަނީ ބޮޑު ސިފައިންގެ ލަޝްކަރެއް ނެރެފައެވެ.
މި އޮޕަރޭޝަންގައި 10،000 އަށްވުރެ ގިނަ އެމެރިކާ ސިފައިން ދަނީ އަމަލީ ގޮތުން ބައިވެރިވަމުންނެވެ.
މީގެ މަގުސަދަކީ އީރާނަށް ވަންނަ އަދި އެގައުމުން ބޭރުވާ ހުރިހާ އިގްތިސާދީ މުއާމަލާތްތަކެއް ކަނޑުމަގުން ހުއްޓުވުމެވެ. ޕެންޓަގަނުން ހާމަކުރި ގޮތުގައި، ދާދި ފަހުން 13 އުޅަނދެއް ވަނީ "ސްޓްރެއިޓް އޮފް ހޯރްމޫޒް" އަށް ވަންނަން އުޅެނިކޮށް ހުއްޓުވައި، އަނބުރާ ފޮނުވާލާފައެވެ.
އެމެރިކާގެ މި ފިޔަވަޅުތަކާއެކު އީރާނުން ވަނީ ވަރުގަދަ އިންޒާރެއް ދީފައެވެ. އެގައުމުން ބުނާ ގޮތުގައި އެމެރިކާގެ މި ހިސާރުކުރުން ކުރިއަށްދާނަމަ، ދުނިޔޭގެ ތެލުގެ ވިޔަފާރިއަށް ބޮޑު ގުޑުމެއް އަރާނެއެވެ.
އީރާނުން ވަނީ ޕާޝިއަން ގަލްފުން ދަތުރުކުރާ ހުރިހާ އުޅަނދުފަހަރެއް ހުއްޓުވާނެ ކަމުގެ އިންޒާރު ދީފައެވެ.
ހަމައެކަނި ޕާޝިއަން ގަލްފެއް ނޫނެވެ؛ ރަތްކަނޑުގެ ދަތުރުފަތުރަށްވެސް ހުރަސް އަޅާނެ ކަމަށް އީރާނުން ބުނެއެވެ. އީރާނުގެ ޚާރިޖީ ވުޒާރާއިން ބުނެފައިވަނީ، އީރާނަށް ވިޔަފާރި ނުކުރެވޭނަމަ، އެހެން އެއްވެސް ގައުމަކަށް އެ ސަރަހައްދުގެ ކަނޑުތަކުން އަމާންކަމާއެކު ވިޔަފާރި ނުކުރެވޭނެ ކަމަށެވެ.
މި ނުތަނަވަސްކަމުގެ ސަބަބުން ބައިނަލްއަގުވާމީ ބާޒާރުގައި އަނެއްކާވެސް ތެލުގެ އަގު އުފުލި، މުޅި ދުނިޔޭގެ އިގްތިސާދަށް އޭގެ ނޭދެވޭ އަސަރު ކުރުމުގެ ބިރު ވަނީ ބޮޑުވެފައެވެ. "ސްޓްރެއިޓް އޮފް ހޯރްމޫޒް" އަކީ ދުނިޔޭގެ ތެލުގެ ހަތަރުބައިކުޅަ އެއްބައި ދަތުރުކުރާ މައި މަގަށް ވުމާއެކު، މި މަގު ބަންދުވެއްޖެނަމަ ދުނިޔޭގެ ހަކަތައިގެ ބާޒާރަށް ބޮޑު ލޮޅުމެއް އަންނާނެއެވެ.
މިހާރުގެ ހާލަތަށް ބަލާއިރު، ދެ ގައުމުގެ ދެމެދުގައި އޮތް މި ނުތަނަވަސްކަން ހައްލުކުރުމަށް ބައިނަލްއަގުވާމީ މުޖުތަމައުން ދަނީ މަސައްކަތް ކުރަމުންނެވެ. ނަމަވެސް އެމެރިކާގެ އަސްކަރީ ހަރަކާތްތަކަށް ބަލާއިރު، މި ހިސާރުކުރުން އަދިވެސް ދަނީ އިތުރަށް ވަރުގަދަވަމުންނެވެ.
