އީރާނާއި އެމެރިކާއާ ދެމެދު ހިނގަމުންދާ ހަނގުރާމައިގައި އީރާނަށް "ތާރީޚީ" ކާމިޔާބީއެއް ލިބިފައިވާ ކަމަށާއި، ކުރިއަށް އޮތް މަޝްވަރާތަކުގެ ކުރިން އީރާނުން ހުށަހެޅި 10 ނުކުތާގެ ހުށަހެޅުން އެމެރިކާއިން ގަބޫލުކޮށްފައިވާ ކަމަށް އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލުން މިއަދު ބުނެފިއެވެ.
އީރާނުގެ ސަލާމަތީ މަޖިލީހުން ނެރުނު ބަޔާނެއްގައި ބުނެފައިވަނީ، އީރާނުގެ ހުށަހެޅުމުގައި ހިމެނޭ މައިގަނޑު ކަންތައްތަކުގެ ތެރޭގައި އެކަކު އަނެކަކަށް ހަމަލާނުދިނުމުގެ ޔަގީންކަން ދިނުމާއި، ހޮރްމޫޒް ކަނޑުއޮޅީގެ ކޮންޓްރޯލް އީރާނަށް އޮތުމާއި، ދަތިކުރުމުގެ ފިޔަވަޅުތައް އުވާލުމާއި، ސަރަހައްދުން އެމެރިކާ ސިފައިން ބޭލުމުގެ އިތުރުން ހަނގުރާމައިގެ ބަދަލު ދިނުން ހިމެނޭ ކަމަށެވެ.
ޕާކިސްތާނުގެ އިސްލާމްއާބާދުގައި ހުކުރު ދުވަހު ފެށުމަށް ހަމަޖެހިފައިވާ މަޝްވަރާތަކުގައި މައިގަނޑު ގޮތެއްގައި ބަލާނީ މިކަންކަމުގެ ތަފްސީލްތައް ފައިނަލް ކުރުމަށް ކަމަށް އެ ބަޔާނުގައިވެއެވެ. ނަމަވެސް، މަޝްވަރާތައް ފެށުމަކީ ހަނގުރާމަ އެއްކޮށް ނިމުމެއް ނޫން ކަމަށްވެސް އީރާނުން އިންޒާރު ދީފައިވެއެވެ.
މި ބަޔާން ނެރެފައިވަނީ، ޑިޕްލޮމަސީއަށް ފުރުސަތު ދިނުމުގެ ގޮތުން އީރާނަށް ދެމުންދާ ހަމަލާތައް ދެ ހަފުތާއަށް މެދުކަނޑާލުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވިކަން އިއުލާނު ކުރެއްވިތާ އެއް ދުވަސް ފަހުންނެވެ. ޓްރަމްޕް މި ނިންމެވުން ސިފަކުރެއްވީ ހޮރްމޫޒް ކަނޑުއޮޅި އަލުން ހުޅުވާލުމާ ގުޅިފައިވާ "ދެފަރާތުން އެއްބަސްވާ ހަމަލާ ބަދަލުކުރުން ހުއްޓާލުމެއް" ގެ ގޮތުގައެވެ. އަދި އީރާނުގެ 10 ނުކުތާގެ ހުށަހެޅުމަކީ މަޝްވަރާތަކަށް އެކަށީގެންވާ އަސާސެއް ކަމަށްވެސް ޓްރަމްޕް ވިދާޅުވިއެވެ.
އީރާނުގެ ސަލާމަތީ މަޖިލީހުން ބުނީ، އެމެރިކާއަށް މި ހުށަހެޅުން ހުށަހެޅީ ޕާކިސްތާން މެދުވެރިކޮށް ކަމަށާއި، ވޮޝިންގޓަނުން މި ހުށަހެޅުމުގެ އަސާސްތައް ގަބޫލުކޮށްފައިވާ ކަމަށެވެ. އަދި އީރާނުގެ ޑިމާންޑްތައް ފުރިހަމައަށް ގަބޫލުނުކުރާނަމަ އަސްކަރީ ހަރަކާތްތައް ކުރިއަށް ގެންދާނެ ކަމަށްވެސް އެ ގައުމުން ބުނެފައިވެއެވެ.
ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވަނީ ހަނގުރާމަ ހުއްޓާލައި މަޝްވަރާގެ މަގު އިޚްތިޔާރު ކުރުމަށް ބާރުއަޅުއްވައި، މިކަމުގައި މުހިންމު ދައުރެއް އަދާކުރައްވާފައެވެ.
މި މަޝްވަރާތައް ގާތްގަނޑަކަށް 15 ދުވަހަށް ދެމިގެންދާނެ ކަމަށް ބެލެވޭއިރު، މީގެ ސަބަބުން މެދުއިރުމަތީގެ މަސްރަހަށް ބޮޑު ބަދަލެއް އަންނާނެ ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
