އީރާނުން މިހާރު ވަނީ ހޯމުޒް ކަނޑުއޮޅީގެ ފުރިހަމަ ކޮންޓްރޯލް ނަގާފައެވެ. އެމެރިކާއަށް އެ ސަރަހައްދު ހުޅުވަން ކުރި މަސައްކަތް ނާކާމިޔާބުވެ، މިހާރު އެތަނުން ދަތުރުކުރާ ކޮންމެ ތެޔޮ ޓޭންކަރަކުން އީރާނަށް 2 މިލިއަން ޑޮލަރު (ޗައިނާ ޔުއާން އިން) ދައްކަން ޖެހެއެވެ. މިއީ އީރާނުގެ އިގްތިސާދަށް ލިބުނު ބޮޑު ބާރެކެވެ.

އެމެރިކާއާއި އިސްރާއީލުން އުއްމީދު ކުރީ އީރާނުގެ އިސްވެރިން އަވަހާރަ ކޮށްލުމުން ނުވަތަ ބޮން އެޅުމުން އެ ގައުމުގެ ނިޒާމު ރޫޅިގެންދާނެ ކަމަށެވެ. ނަމަވެސް، އިރާގާއި ލީބިޔާއާ ޚިލާފަށް އީރާނުގެ މުއައްސަސާތައް ވަރުގަދަވެ، ހަނގުރާމައިގެ ތެރޭގައިވެސް ސަރުކާރުގެ ކޮންޓްރޯލް ދެމެހެއްޓިފައިވާކަން ލިޔުމުގައި ފާހަގަ ކޮށްފައިވެއެވެ.

އިސްރާއީލުގެ އުދުވާންތަކުގެ ސަބަބުން، ކުރިން އީރާނާ ދެކޮޅަށް ތިބި އަރަބި ގައުމުތަކުގެ އާންމު ރައްޔިތުންގެ މެދުގައިވެސް އިސްރާއީލާ މެދު ނަފުރަތު އިތުރުވެ، ފަލަސްތީނުގެ ހައްގުގައި އީރާނުން ކުރާ މަސައްކަތަށް ތާއީދު އިތުރު ވެފައިވެއެވެ. އިސްރާއީލުން އަރަބި ގައުމުތަކާއެކު ގާއިމު ކުރަން އުޅުނު "އިބްރާހިމީ އެއްބަސްވުން" މިހާރު ވަނީ ނާކާމިޔާބު ވެފައެވެ.

ހަނގުރާމައިގެ ސަބަބުން ދުނިޔޭގެ ބާޒާރުގައި ތެލާއި ގޭހުގެ އަގު ވަނީ އިންތިހާއަށް އުފުލިފައެވެ. ޚާއްސަކޮށް ޔޫރަޕްގައި ޑީސަލްގެ އަގު %30 އަށް ވުރެ މައްޗަށް ގޮސްފައިވެއެވެ. މިއީ އީރާނުން މުޅި ދުނިޔެއަށް ދިން އިގްތިސާދީ ލޮޅުމެކެވެ.

ސައުދީ އަރަބިއްޔާއާއި ޔޫއޭއީ ފަދަ ގައުމުތަކުން އެމެރިކާއަށް ކުރި އިތުބާރު ވަނީ ކުޑަވެފައެވެ. އެމެރިކާގެ އަސްކަރީ މަރުކަޒުތައް އެ ގައުމުތަކުގައި ހުއްޓަސް، އީރާނުގެ ހަމަލާތަކުން އެ ގައުމުތަކުގެ އިންފްރާސްޓްރަކްޗާ ރައްކާތެރި ނުކުރެވުމުން، އެ ގައުމުތަކުން މިހާރު ބޮޑަށް ބަލަނީ ޗައިނާއާ ދިމާލަށެވެ.

ޑޮނަލްޑް ޓްރަމްޕާއި ބެންޖަމިން ނަތަންޔާހޫ އީރާނު ހަލާކުކޮށްލަން ކުރި މަސައްކަތުން ނުކުތީ އިދިކޮޅު ނަތީޖާއެކެވެ. އީރާނު މިހާރު ވަނީ މެދުއިރުމަތީގެ ހުރިހާ "ކާޑެއް" ނުވަތަ ބާރެއް އަތަށް ނަގާފައެވެ. އަދި މި ހަނގުރާމަ ހުއްޓާލި ކަމުގައި ވިޔަސް، އީރާނުން ހޯމުޒް ކަނޑުއޮޅީގެ ކޮންޓްރޯލް ދޫކޮށްލާނީ އެ ގައުމަށް ވަރަށް ބޮޑެތި މާލީ އަދި ސިޔާސީ ފައިދާތަކެއް ލިބޭ ގޮތަށް ކަމަށް މި ރިޕޯޓުގައި ބުނެފައިވެއެވެ.