އިޒްރޭލާއި އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގެ ތެރެއަށް ނުވަނުމަށާއި، މަސްލަހަތު އިސްކުރުމަށް ތުރުކީން ގަލްފުގެ ގައުމުތަކަށް ގޮވާލައިފިއެވެ.
ބްލޫމްބާގް ނިއުސް އެޖެންސީން ރިޕޯޓްކޮށްފައިވާ ގޮތުގައި، ސަރަހައްދީ ހަމަނުޖެހުން ބޮޑުވިޔަ ނުދިނުމަށްޓަކައި ތުރުކީން ދަނީ ގަލްފުގެ ގައުމުތަކާއެކު ވަރުގަދަ ޑިޕްލޮމެޓިކް މަސައްކަތްތަކެއް ކުރަމުންނެވެ.
މި މަސައްކަތުގެ ދަށުން ތުރުކީގެ ފޮރިން މިނިސްޓަރު ހަކާން ފިދާން ވަނީ ސައުދީ އަރަބިއްޔާ، ޔުނައިޓެޑް އަރަބް އެމިރޭޓްސް (ޔޫއޭއީ) އަދި ގަތަރު ފަދަ ގައުމުތަކަށް ޒިޔާރަތްކުރައްވައި، އެ ގައުމުތަކުގެ އިސްވެރިންނާ މަޝްވަރާ ކުރައްވާފައެވެ. ތުރުކީގެ އަމާޒަކީ މި ހަނގުރާމައިގެ ސަބަބުން މުޅި މެދުއިރުމައްޗަށް ކުރިމަތިވެދާނެ ނުރައްކަލަކުން ސަލާމަތްވުމަށް ބާރުއެޅުމެވެ.
ތުރުކީގެ ރައީސް ރަޖަބް ތައްޔިބު އުރުދުޣާން ވަނީ މި މައްސަލައިގައި ފާޅުގައި ވާހަކަދައްކަވައި، ހަމަނުޖެހުންތައް ކުޑަކުރުމަށް ގޮވާލައްވާފައެވެ. "މި ހަނގުރާމަ އިތުރަށް ފުޅާވެގެން ދިއުމަކީ މުޅި ސަރަހައްދުގެ ހަމަޖެހުމަށް އޮތް ބޮޑު ނުރައްކަލެއް،" ކަމަށް ވިދާޅުވެ، އުރުދުޣާން ވަނީ ހުރިހާ ފަރާތްތަކަކުން ވެސް ކެތްތެރިކަން އިސްކުރުމަށް ބާރުއަޅުއްވާފައެވެ.
ރޮއިޓާސް ފަދަ ބައިނަލްއަގުވާމީ މީޑިއާތަކުން ރިޕޯޓްކުރާ ގޮތުގައި، އަންކާރާއިން މިފަދަ މަސައްކަތްތަކެއް ފަށާފައިވަނީ ސަރަހައްދުގައި ހަމަލާތައް ބަދަލުކުރުން އިތުރުވެފައިވާ ދަނޑިވަޅެއްގައެވެ.
ތުރުކީގެ މި އިސްނެގުމަކީ ގަލްފުގެ ގައުމުތަކުން މި ހަނގުރާމައިގެ ތެރެއަށް ވަނުން ހުއްޓުވައި، ސަރަހައްދީ ސުލްހަ ގާއިމުކުރުމަށް ކުރެވޭ މުހިންމު މަސައްކަތެއްގެ ގޮތުގައި މުހައްލިލުން ދެކެވަޑައިގަންނަވައެވެ.
