އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ތަރުޖަމާނު އަދި އެކްޓިންގ ޗީފް އޮފް ސްޓާފް ޒިވް އަގްމޮން މަގާމުން އިސްތިއުފާ ދީފިއެވެ.
އޭނާ އިސްތިއުފާ ދީފައިވަނީ ނަތަންޔާހޫއާއި އޭނާ ނިސްބަތްވާ ލިކޫޑް ޕާޓީއަށް ވަރަށް ބޮޑަށް ފާޑުކިޔާފައިވާ އޯޑިއޯތަކެއް ލީކުވުމާ ގުޅިގެންނެވެ.
އިޒްރޭލުގެ ޗެނަލް 12 އިން ރިޕޯޓްކޮށްފައިވާ ގޮތުގައި، ލީކުވި އޯޑިއޯތަކަކީ އޮކްޓޯބަރު 7 ގެ ހަމަލާތަކަށްފަހު އަގްމޮން ދައްކާފައިވާ އަމިއްލަ ވާހަކަތަކެކެވެ. މި އޯޑިއޯތަކުގައި އޭނާ ވަނީ ނަތަންޔާހޫއަކީ "މުސްކުޅި" އަދި "ނިމިފައިވާ" (finished) މީހެއްގެ ގޮތުގައި ސިފަކޮށްފައެވެ.
އަދި ލިކޫޑް ޕާޓީގެ ދުވަސްވެސް މިހާރު ނިމިއްޖެ ކަމަށާއި، ކުރިމަތިވި ނާކާމިޔާބީތަކުގެ ޒިންމާ ނަތަންޔާހޫ އުފުލަންޖެހޭނެ ކަމަށް އޭނާ ބުނެފައިވެއެވެ.
މީގެ އިތުރުން، އެ އޯޑިއޯގައި މިޒްރާހީ ދަރިކޮޅުގެ ޔަހޫދީންނާއި ލިކޫޑް ޕާޓީގެ މެންބަރުންނާ މެދު ނަސްލީ ތަފާތުކުރުމުގެ ބަސްތައް ބޭނުންކޮށްފައިވާ ކަމަށްވެސް ރިޕޯޓްތައް ބުނެއެވެ. އެގޮތުން ބައެއް މެންބަރުންނަށް ނިސްބަތްކޮށް "ބަބޫނުން" ފަދަ އިހާނެތި ބަސްތައް ބޭނުންކޮށްފައިވާ ކަމަށް ތުހުމަތު ކުރެވެއެވެ.
މިދިޔަ ބުދަ ދުވަހު މަގާމުން އިސްތިއުފާ ދެމުން އަގްމޮން ވަނީ އޭނާއާ މެދު ކުރެވޭ ނަސްލީ ތަފާތުކުރުމުގެ ތުހުމަތުތައް ދޮގުކޮށްފައެވެ.
އޭނާ ފާހަގަކުރި ގޮތުގައި އޭނާއަކީ އަމިއްލައަށްވެސް މޮރޮކޯ ދަރިކޮޅަށް ނިސްބަތްވާ މީހެކެވެ. އަދި ލީކުވެފައިވާ ވާހަކަތަކަކީ އޭނާގެ ރަހުމަތްތެރިއަކު، އޭނާއާއި ބޮޑުވަޒީރަށް ގެއްލުން ދިނުމުގެ ނިޔަތުގައި އޭގެ އަސްލު މާނަ އޮޅޭގޮތަށް ފަތުރާފައިވާ ވާހަކަތަކެއް ކަމަށް އޭނާ ބުންޏެވެ.
މި ހާދިސާއާ ގުޅިގެން ސޯޝަލް މީޑިއާގެ ބައެއް މަންސަތަކުގައި ނަތަންޔާހޫ ހޭނެތިގެން ވެއްޓުނު ކަމަށާއި އިޒްރޭލު ނިމުމަކަށް އައީ ކަމަށް ބުނެ ފަތުރަމުންދާ ޚަބަރުތަކަކީ އެއްވެސް އަސާސެއް ނެތް ޚަބަރުތަކެއް ކަމަށް މުހައްލިލުން ބުނެއެވެ. ނަތަންޔާހޫގެ ސިއްހީ ހާލަތާ ގުޅޭގޮތުން ފެތުރުނު އަޑުތައް ދޮގުކުރުމަށް އޭނާގެ އޮފީހުން ވަނީ ދާދި ފަހުން ވީޑިއޯތަކެއްވެސް އާންމުކޮށްފައެވެ.
މި މައްސަލައަކީ އިޒްރޭލުގެ ސަރުކާރުގެ އެތެރޭގައި އުފެދިފައިވާ ނުތަނަވަސްކަމާއި، އޮކްޓޯބަރު 7 ގެ ހާދިސާއަށްފަހު އިސްވެރިންގެ މެދުގައި އޮތް އިތުބާރު ކުޑަވެފައިވާ މިންވަރު ހާމަކޮށްދޭ ކަމެއްގެ ގޮތުގައި ބެލެވެއެވެ
