ވޮޝިންޓަން (މާރިޗު 21) – އެމެރިކާގެ ރައީސް ޑޮނަލްޑް ޓްރަމްޕް އީރާނާ ދެކޮޅަށް ފެށި ހަނގުރާމައަށް ތިން ހަފުތާ ވެގެންދާއިރު، މަސްރަހު އޭނާގެ ބާރުގެ ދަށުން ނެއްޓެމުންދާ ކަމުގެ ނިޝާންތައް ފެންނަން ފަށައިފިއެވެ.

ދުނިޔޭގެ ބާޒާރުގައި ހަކަތައިގެ އަގުތައް އިންތިހާއަށް އުފުލެމުންދާއިރު، އެމެރިކާގެ ބައިވެރިންގެ އެހީތެރިކަން ނުލިބި އެމެރިކާ ވަނީ އެކަހެރިވެފައެވެ. މީގެ އިތުރުން، މިއީ ކުރު މުއްދަތެއްގެ ކަމެއް ކަމަށް ވިދާޅުވި ނަމަވެސް، އިތުރު ސިފައިން ހަނގުރާމައަށް ފޮނުވުމަށް މިހާރު ދަނީ ތައްޔާރުވަމުންނެވެ.

އެމެރިކާ އާއި އިސްރާއީލުން ދެމުންދާ ހަމަލާތަކަށް އީރާނުން ދަނީ ގޮންޖަހަމުންނެވެ. ހޮރްމޫޒް ކަނޑުއޮޅި ބަލަހައްޓަން އެހީތެރިވުމަށް ނޭޓޯގެ ގައުމުތަކުން ދެކޮޅު ހެދުމުން، ޓްރަމްޕް ވަނީ އެ ގައުމުތަކަކީ "ފިނޑި" ބައެއްގެ ގޮތުގައި ސިފަ ކުރައްވާފައެވެ.

ހަނގުރާމަ ކުރިއަށްދަނީ ރޭވިފައިވާ ގޮތަށް ކަމަށް ޓްރަމްޕް ވިދާޅުވި ނަމަވެސް، އީރާނުން ދަނީ ތެލާއި ގޭސް ސަޕްލައި ހުއްޓުވައި، ސަރަހައްދުގެ އެކި ތަންތަނަށް މިސައިލް ހަމަލާތައް ދެމުންނެވެ.

ސިޔާސީ ގޮތުން ކުރިމަތިވަމުންދާ ގޮންޖެހުންތައް

ބޭރުގެ ހަނގުރާމަތަކުގެ ތެރެއަށް އެމެރިކާ ނުވައްދާނެ ކަމަށް ވައުދުވެވަޑައިގެން ވެރިކަމަށް ވަޑައިގެންނެވި ޓްރަމްޕަށް، މިހާރު މި ހަނގުރާމައިން ނުކުންނާނެ ސާފު ގޮތެއް ނޭނގޭ ކަމަށް މުހައްލިލުން ބުނެއެވެ.

"ޓްރަމްޕް އަމިއްލައަށް މިވަނީ އީރާނު ހަނގުރާމައިގެ ކޮށިގަނޑަކަށް ވަދެފައި، އޭގެއިން ނުކުންނާނެ ގޮތެއް އޭނާއަކަށް ނޭނގެ،" މެދުއިރުމަތީގެ ކުރީގެ މަޝްވަރާވެރިޔާ އެރޮން ޑޭވިޑް މިލާ ވިދާޅުވިއެވެ.

މި ހަނގުރާމައިގެ ސަބަބުން ނޮވެމްބަރު މަހު ބޭއްވުމަށް ހަމަޖެހިފައިވާ މިޑްޓާމް އިންތިޚާބުގައި ރިޕަބްލިކަން ޕާޓީއަށް އޮތް ތާއީދު ކުޑަވެދާނެ ކަމުގެ ބިރު ވަނީ ހީވެފައެވެ. ވަކި ގޮތެއް ނުނިމި ދިގުލައިގެންދާ ހަނގުރާމައާއި ތެލުގެ އަގު އުފުލުމަކީ ޓްރަމްޕްގެ ސިޔާސީ މުސްތަގުބަލަށް އޮތް ނުރައްކަލެކެވެ.

ވައިޓް ހައުސްގެ ދިފާއު

ވައިޓް ހައުސްގެ އޮފިޝަލަކު ވަނީ މި ހަނގުރާމައަކީ އަސްކަރީ ގޮތުން ލިބުނު ބޮޑު ކާމިޔާބީއެއްގެ ގޮތުގައި ސިފަކުރައްވާފައެވެ. އޭނާ ވިދާޅުވި ގޮތުގައި އީރާނުގެ އިސް ލީޑަރުންތަކެއް މަރާލައި، އެ ގައުމުގެ ކަނޑުގެ ސިފައިންގެ ބޮޑު ބައެއް ވަނީ ފައްތާލާފައެވެ. އަދި އީރާނުގެ މިސައިލް ގުދަންތަކުގެ ބޮޑު ބައެއްވެސް ވަނީ ހަލާކުކޮށްލާފައެވެ.

ނަމަވެސް، ބައިނަލްއަގުވާމީ މައިދާނުގައި އެމެރިކާގެ ބާރު ކުޑަވަމުންދާކަން މިދިޔަ ހަފުތާގައި ވަނީ ހާމަވެފައެވެ. ހޮރްމޫޒް ކަނޑުއޮޅި ސަލާމަތްކުރުމަށް އެމެރިކާއާ ގުޅުމަށް ނޭޓޯގެ ބައިވެރިން ދެކޮޅު ހެދުމަކީ ޓްރަމްޕަށް ލިބުނު ކުއްލި ސިހުމެއް ކަމަށް ރިޕޯޓްތައް ބުނެއެވެ.