އީރާނުގެ އެންމެ މަތީ ލީޑަރު މުޖުތަބާ ޚާމަނައީ، ފާރިސީ އައު އަހަރު (ނައުރޫޒް) ގެ މުނާސަބަތުގައި ސްޓޭޓް ޓީވީ މެދުވެރިކޮށް އިއްވެވި މެސެޖެއްގައި ވިދާޅުވީ، އެމެރިކާ އާއި އިސްރާއީލުގެ ހަމަލާތަކަށް ފަހު އީރާނުގެ ރައްޔިތުން ސަރުކާރު ވައްޓާލާނެ ކަމަށް އެ ދެ ގައުމުން ކުރި އުންމީދަކީ "ބޮޑު ގޯސް ހިސާބެއް" ކަމަށް ވިދާޅުވެ، ތުރުކީ އާއި އޮމާނަށް ދެވުނު ހަމަލާތަކުގެ ޒިންމާ އީރާނުން ނަގަންޖެހޭ ކަމަށް ކުރެވޭ ތުހުމަތުތައް ދޮގު ކުރައްވައިފިއެވެ.

ޚާމަނައީގެ ސިއްހީ ހާލުކޮޅާ ގުޅޭ ގޮތުން ތަފާތު އެކި އަޑުތައް ފެތުރިފައިވާ ދަނޑިވަޅެއްގައި ދެއްވި މި މެސެޖު ފާހަގަ ކުރެވެނީ، ސީދާ ޓީވީން ފެނިވަޑައިނުގެން، ލިޔުމެއްގެ ސިފައިގައި އިއްވެވި މެސެޖެއްގެ ގޮތުގައެވެ.

އެމެރިކާ އާއި އިސްރާއީލުގެ ވައިގެ ހަމަލާތަކަށް ފަހު، އީރާނުގެ ލީޑަރޝިޕުގެ ހާލަތާ މެދު ބައިނަލްއަގުވާމީ މީޑިއާގައި ގިނަ ސުވާލުތަކެއް އުފެދިފައިވީ ނަމަވެސް، މި މެސެޖުން ލީޑަރު ގައުމުގެ ކަންކަން ބައްލަވަމުން ގެންދަވާކަން ދައްކުވައިދޭން މަސައްކަތް ކުރައްވާފައިވާކަން ފާހަގަ ކުރެވެއެވެ.

ހަމަލާތަކަށް ފަހު "ރައްޔިތުން ދެއްކީ އެއްބައިވަންތަކަން"

ޚާމަނައީގެ މެސެޖުގައި އެންމެ ބޮޑަށް ފާހަގަ ކުރެއްވީ، އެމެރިކާ އާއި އިސްރާއީލުން ކުރި ހަމަލާތަކުގެ ސިޔާސީ މަގުސަދު ނާކާމިޔާބު ވެފައިވާ ކަމެވެ. ޚާމަނައީ ވިދާޅުވީ އެ ދެ ގައުމުން ގަބޫލުކުރީ އެއް ދުވަސް ނުވަތަ ދެ ދުވަހުގެ ހަމަލާތަކަށް ފަހު އީރާނުގެ ރައްޔިތުން ނުކުމެ ސަރުކާރު ވައްޓާލާނެ ކަމަށް ކަމަށެވެ.

"އެއީ ބޮޑުކޮށް ނުބައި ހިސާބެއް. އީރާނުގެ ރައްޔިތުންގެ އެއްބައިވަންތަކަމުން ވަނީ ދުޝްމަނުން ބަލިކޮށްފައި." ޚާމަނާއީ ވިދާޅުވިއެވެ.

މި މެސެޖުގައި ޚާމަނައީ ވަނީ ހަމަލާތަކުގެ ދަނޑިވަޅުގައި އީރާނުގެ ރައްޔިތުން ދެއްކެވި ސާބިތުކަމާއި ކެތްތެރިކަމަށް ތައުރީފު ކުރައްވާފައެވެ.

ބޭރުގެ ބާރުތަކުން ކިތަންމެ ވަރުގަދަ ހަމަލާތަކެއް ދިން ނަމަވެސް، ގައުމުގެ ދާޚިލީ ހަމަޖެހުން ގެއްލުވައި ނުލެވޭނެ ކަމަށް ވިދާޅުވެ، އީރާނުގެ ގައުމީ އެއްބައިވަންތަ ކަމުގެ ނެރެޓިވް ވަރުގަދަކުރެއްވިއެވެ.

ތުރުކީ އާއި އޮމާނުގެ ހާދިސާތައް "ފޯލްސް ފްލެގް" ކަމަށް ސިފަ ކުރެއްވުން

ޚާމަނައީގެ މެސެޖުގައި ދެން އެންމެ ބޮޑަށް ފާހަގަ ކުރެވުނު ނުކުތާއަކީ، ފަހަކަށް އައިސް ތުރުކީ އާއި އޮމާނަށް އަމާޒުވި ހަމަލާތަކުގެ ޒިންމާ އީރާނުގެ ބޮލުގައި އެޅުވުމާ ދެކޮޅަށް ދެއްކެވި ވާހަކަފުޅެވެ.

ޚާމަނައީ ސާފު އިބާރާތުން ވިދާޅުވީ، އެ ހަމަލާތަކަކީ "އެއްވެސް ގޮތަކުން އީރާނުގެ ސިފައިން" ނުވަތަ އީރާނާ ގުޅުން ހުރި ޖަމާއަތްތަކުން ދީފައިވާ ހަމަލާތަކެއް ނޫން ކަމަށެވެ.

އެ ހާދިސާތައް ސިފަކުރައްވައި ޚާމަނައީ ވިދާޅުވީ، އެއީ އީރާނުގެ ދުޝްމަނުން ރާވައިގެން ހިންގި "ފޯލްސް ފްލެގް" ހާދިސާތަކެއް ކަމަށެވެ. މީގެ ބޭނުމަކީ ސަރަހައްދީ ގައުމުތަކާ އީރާނާ ދެމެދު އޮންނަ ގުޅުން ހީނަރުކޮށް، އީރާނު އެކަހެރިކުރުން ކަމަށް އެ މެސެޖުގައި ދޭހަވެއެވެ.

ވަކިން ހާއްސަކޮށް ތުރުކީ އާއި އޮމާނަކީ ސަރަހައްދީ މަސްރަހުގައި އީރާނާ ސީދާ ހަނގުރާމައެއްގެ ތެރެއަށް ނުވަދެ، މެދުމިނުގެ ގުޅުންތައް ދެމެހެއްޓުމަށް މަސައްކަތްކޮށްފައިވާ ގައުމުތަކަށް ވާތީ، އެ ތުހުމަތުތައް ދޮގުކުރެއްވުމަކީ ޑިޕްލޮމެޓިކް ގޮތުން މުހިންމު ފިޔަވަޅެއް ކަމަށް މުހައްލިލުން ދެކެވަޑައިގަންނަވައެވެ.

ސިއްހީ ހާލުކޮޅާ ގުޅޭ ސުވާލުތައް

ނައުރޫޒް ފަދަ ބޮޑު މުނާސަބަތެއްގައި ސީދާ ޓީވީން ފެނިވަޑައިނުގެން، ލިޔުމެއް އިއްވެވުމުން، ޚާމަނައީގެ ސިއްހީ ހާލުކޮޅާ ގުޅޭ ގޮތުން ކުރިންވެސް ފެތުރެމުން ދިޔަ އަޑުތައް އިތުރަށް ގަދަވާނެ ކަމަށް ބެލެވެއެވެ.

އެމެރިކާ އާއި އިސްރާއީލުން އީރާނަށް ދިން ވައިގެ ހަމަލާތަކުގައި ލީޑަރޝިޕުގެ އިންފްރާސްޓްރަކްޗާ އަށް އަމާޒުކޮށްފައިވާ ކަމުގެ ރިޕޯޓުތައް ކުރިން ފެތުރިފައިވީ ނަމަވެސް، އީރާނުގެ ރަސްމީ ފަރާތްތަކުން މިހާތަނަށް އެ ރިޕޯޓުތައް ވަނީ ދޮގުކޮށްފައެވެ.

ނަމަވެސް، ގައުމެއްގެ އެންމެ މަތީ ލީޑަރު ޓީވީން ސީދާ ފެނިވަޑައިނުގެންނެވުމަކީ، ވަކިން ހާއްސަކޮށް ހަނގުރާމައިގެ ހާލަތެއްގެ ތެރެއިން، ދާޚިލީ ގޮތުންނާއި ބައިނަލްއަގުވާމީ ގޮތުން ކަންބޮޑުވުން އުފެދޭ ކަމެކެވެ.

ސަރަހައްދީ މަސްރަހަށް ކުރާ އަސަރު

ޚާމަނައީގެ މި މެސެޖުން ދޭހަވާ ސިޔާސީ މެސެޖު ބެހެވެނީ ދެ ބަޔަކަށެވެ. ފުރަތަމަ ކަމަކީ ދާޚިލީ ގޮތުން، ހަމަލާތަކުގެ ސަބަބުން ސަރުކާރު ބަލިކަށިވެފައި ނުވާ ކަމާއި ރައްޔިތުންގެ ތާއީދު ލީޑަރޝިޕަށް އެބައޮތްކަން ދެއްކެވުމެވެ.

ދެވަނަ ކަމަކީ ބައިނަލްއަގުވާމީ ގޮތުން، ތުރުކީ އާއި އޮމާން ފަދަ ގައުމުތަކާ ގުޅުން ކެނޑިފައި ނުވާ ކަމާއި، އެ ގައުމުތަކަށް ދެވުނު ހަމަލާތަކުގެ ޒިންމާ އީރާނާ ހަވާލު ކުރުމަށް ކުރެވޭ މަސައްކަތަކީ ބޭއިންސާފެއް ކަމަށް ދެއްކެވުމެވެ.

ޚާއްސަކޮށް "ފޯލްސް ފްލެގް" މި ލަފުޒު ބޭނުން ކުރެއްވުމަކީ ބައިނަލްއަގުވާމީ މަސްރަހުގައި ބޮޑެތި ތުހުމަތުތަކެއް އެކުލެވޭ ވާހަކަފުޅެކެވެ. އީރާނުގެ ދުޝްމަނުން ގަސްތުގައި ހަމަލާތައް ރާވައި، އީރާނުގެ ބޮލުގައި އެ ޒިންމާ އެޅުވުމަށް މަސައްކަތްކުރާ ކަމަށް ތުހުމަތު ކުރެއްވުމުން، މި މައްސަލައިގެ ތަހުގީގު އިތުރަށް ފުޅާވެ، ސަރަހައްދީ ގައުމުތަކުގެ މެދުގައި ނުތަނަވަސްކަން އިތުރުވެދާނެ ކަމަށް ބެލެވެއެވެ.

މި ހާދިސާތައް ކުރިއަށް ދާ ގޮތް ގާތުން ބެލެމުންދާއިރު، އީރާނުގެ ލީޑަރޝިޕުގެ ހާލަތާ ގުޅޭ ގޮތުން އިތުރު ތަފުސީލުތައް ލިބެމުންދާ ވަރަކަށް ރިޕޯޓު ކުރެވޭނެއެވެ.