އެމެރިކާގެ ސްޓޭޓް ޑިޕާޓްމަންޓުން ހިންގާ "ރިވޯޑްސް ފޯ ޖަސްޓިސް" (Rewards for Justice) ޕްރޮގްރާމުގެ ދަށުން، އީރާނުގެ އިސްވެރިންނާއި އައި.އާރް.ޖީ.ސީގެ އިސް މެންބަރުންގެ މަޢުލޫމާތު ފޯރުކޮށްދޭ ފަރާތްތަކަށް 10 މިލިއަން ޑޮލަރާ ހަމައަށް އިނާމު ދޭނެކަން މިއަދު އިޢުލާން ކޮށްފިއެވެ.

މި އިނާމު ހުށަހަޅާފައިވާ މީހުންގެ ތެރޭގައި އީރާނުގެ އެންމެ މަތީ ރޫޙާނީ ލީޑަރުގެ ދަރިކަލުން، އާޔަތުﷲ މުޖުތަބާ ޚާމަނާއީ ހިމެނެއެވެ. އެމެރިކާގެ ސްޓޭޓް ޑިޕާޓްމަންޓުން މުޖުތަބާ ޚާމަނާއީ އާއި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ބައެއް އިސް ބޭފުޅުން ސިފަކޮށްފައި ވަނީ "ޓެރަރިސްޓް ލީޑަރުން" ގެ ގޮތުގައެވެ.

މި ޕްރޮގްރާމުގެ ދަށުން މި ފިޔަވަޅު އަޅާފައިވަނީ އެ ފަރާތްތަކާ ބެހޭ މުހިންމު މަޢުލޫމާތު ހޯދުމަށެވެ. މީގެ ތެރޭގައި އެ ފަރާތް ތަކުގެ މާލީ ވަޞީލަތްތަކާއި، އެމީހުން ހިންގާ ޙަރަކާތްތަކުގެ މަޢުލޫމާތު ހިމެނެއެވެ.

މިއީ އެމެރިކާގެ ޤައުމީ ސަލާމަތަށް ހުރި ނުރައްކާތައް ކުޑަ ކުރުމަށާއި، ބައިނަލްއަޤްވާމީ ގޮތުން ހޯދަން ބޭނުންވާ ފަރާތްތައް ދެނެގަތުމަށް ކުރިއަށްގެންދާ މަސައްކަތެއް ކަމަށް އެމެރިކާއިން ބުނެއެވެ.

އެމެރިކާގެ ޚާރިޖީ ވުޒާރާއިން ހާމަކޮށްފައިވާ ގޮތުގައި، މި އިނާމަކީ އީރާނުގެ ނުފޫޒު ގަދަ ލީޑަރުންނާއި އެ ޤައުމުގެ އަސްކަރީ އިސް ފަރާތްތަކާ ދެކޮޅަށް އެމެރިކާއިން ކުރަމުންދާ މަސައްކަތުގެ ބައެކެވެ. "ރިވޯޑްސް ފޯ ޖަސްޓިސް" ޕްރޮގްރާމަކީ އެމެރިކާއިން ޓެރަރިޒަމާ ދެކޮޅަށް ކުރާ މަސައްކަތުގައި ބޭނުންކުރާ މުހިންމު ވަޞީލަތެކެވެ.