އީރާނާއި، އެމެރިކާ އަދި އިޒްރޭލާ ދެމެދު ހިނގަމުންދާ ހަނގުރާމައިގެ މަޝްރަހު ދިރާސާކުރާ ފަރާތްތަކުން ބުނާ ގޮތުގައި، މި ކުރިމަތިލުން މިހާރު ބަދަލުވެފައިވަނީ "ކާކަށްތޯ އެންމެ ގިނަ ދުވަހު ކެތްކުރެވޭނީ" ބަލާ އިމްތިހާނަކަށެވެ.

މިއީ ހަމައެކަނި އަސްކަރީ ކުރިމަތިލުމެއް ނޫނެވެ. މިއީ އިގްތިސާދީ ގޮތުންނާއި ނަފްސާނީ ގޮތުން އެންމެ ވަރުގަދައީ ކޮން ފަރާތެއްތޯ ބަލާ "ވޯ އޮފް އެޓްރިޝަން" އެކެވެ.

މި ހަނގުރާމައިގައި އީރާނަށް އޮތް އެންމެ ބޮޑު ބާރަކީ ދުނިޔޭގެ ބާޒާރުގައި ތެލުގެ އަގު އުފުލުމެވެ. އީރާނުން ދަނީ ހޮރްމޫޒް ކަނޑުއޮޅިން ދަތުރުކުރާ އާގުބޯޓުތަކަށް ހަމަލާދީ، ދުނިޔޭގެ ހަކަތައިގެ ސަޕްލައިއަށް ބުރޫއަރުވަމުންނެވެ.

ތެލުގެ އަގު ފީފާއަކަށް 120 ޑޮލަރަށްވުރެ މައްޗަށް އަރައިގެން ދިއުމަކީ އެމެރިކާގެ ރައީސް ޑޮނަލްޑް ޓްރަމްޕަށާއި އެމެރިކާގެ އިގްތިސާދަށް އޮތް އެންމެ ބޮޑު ބިރެވެ. އީރާނުގެ އުންމީދަކީ ތެލުގެ އަގު އުފުލި، އެމެރިކާގެ ރައްޔިތުންނަށް އޭގެ ތަދު އިހުސާސް ކުރެވި، ހަނގުރާމަ ހުއްޓާލުމަށް ސަރުކާރަށް ފިއްތުންތައް ކުރިމަތިވުމެވެ.

އެމެރިކާ އާއި އިޒްރޭލުގެ ސްޓްރެޓެޖީ
އަނެއްކޮޅުން، އެމެރިކާ އާއި އިޒްރޭލުން ދަނީ އީރާނުގެ އަސްކަރީ މަރުކަޒުތަކަށާއި، މިސައިލް އުފައްދާ ތަންތަނަށް ހުއްޓުމެއް ނެތް ވައިގެ ހަމަލާތަކެއް ދެމުންނެވެ. އީރާނުގެ މަތިންދާބޯޓު ދިފާއީ ނިޒާމުތައް ބަލިކަށިވެފައިވާއިރު، މި ހަމަލާތަކުން ސަލާމަތްވުމުގެ ބާރު އީރާނަށް ވަނީ ކުޑަވެފައެވެ.

އީރާނުގެ ކުރީގެ ސުޕްރީމް ލީޑަރު އާޔަތުﷲ އަލީ ޚާމަނާއީ އަވަހާރަވުމަށްފަހު، އެ ގައުމުގެ ލީޑަރޝިޕަށް ވެސް ވަނީ ބޮޑެތި ލޮޅުންތަކެއް އަރާފައެވެ. އިޒްރޭލާއި އެމެރިކާގެ މަގްސަދަކީ އީރާނުގެ އަސްކަރީ ގާބިލްކަން މުޅިން ނައްތާލައި، އެ ގައުމުގެ ވެރިކަން ބަދަލުކުރުމެވެ.

މި ހަނގުރާމައިގެ ސަބަބުން މުޅި މެދުއިރުމަތީގެ ހަމަޖެހުން ވަނީ ގެއްލިފައެވެ. ދުބާއީ އިންޓަނޭޝަނަލް އެއާޕޯޓާއި، ސަރަހައްދީ ބޭންކުތަކަށް އަމާޒުކޮށް އީރާނުން ދެމުންދާ އިންޒާރުތަކުގެ ސަބަބުން، ބައިނަލްއަގުވާމީ ވިޔަފާރިއާއި ދަތުރުފަތުރަށް ވަނީ ބޮޑެތި ހުރަސްތަކެއް ކުރިމަތިވެފައެވެ. އެމެރިކާގެ ރައްޔިތުންގެ މެދުގައި ކުރެވުނު ސާވޭތަކުން ދައްކާ ގޮތުގައި، ގިނަ ބަޔަކު މި ހަނގުރާމައާ މެދު ކަންބޮޑުވުން ފާޅުކުރެއެވެ. ޚާއްސަކޮށް ތެލުގެ އަގު އުފުލުމުގެ ސަބަބުން ދިރިއުޅުމުގެ ޚަރަދު ބޮޑުވުމަކީ އެމެރިކާގެ ސިޔާސީ މަޝްރަހަށް އޭގެ އަސަރު ފޯރާނެ ކަމެކެވެ.

މި ހަނގުރާމަ ނިމޭނެ ސީދާ ތާރީޚެއް ނުވަތަ ގޮތެއް އެއްވެސް ފަރާތަކަށް އަދި ބުނާކަށް ނޭނގެއެވެ. މިއީ ދެ ފަރާތުން ވެސް "އެންމެ ފަހު ވަގުތާ ޖެހެންދެން" ހިފަހައްޓާލުމުގެ ރޭހެކެވެ. އީރާނުން ބޭނުންވަނީ އިގްތިސާދީ ގޮތުން އެމެރިކާ ބަލިކުރާށެވެ. އެމެރިކާ އާއި އިޒްރޭލުން ބޭނުންވަނީ އަސްކަރީ ބާރުން އީރާނުގެ ސަރުކާރު ކުޑަ ކަކޫޖައްސާށެވެ. އެންމެ ފަހުން މޮޅުވާނީ ކޮން ފަރާތެއްކަން ބިނާވެފައި އޮތީ، ލިބޭ ގެއްލުންތަކަށް އެންމެ ގިނަ ދުވަހު ކެތްކުރެވޭ ބައެއްގެ މައްޗަށެވެ.