މައްކާގެ މަސްޖިދުލް ޙަރާމްގެ ގޯތިތެރެއަށް މިހާރު ގެންނަމުންދާ ބަދަލުތަކަކީ، ރޫޙާނީ އާދަކާދަތަކާއި އެންމެ ފަހުގެ އިންޖިނިއަރިންގް ފަންނުވެރިކަން އެއްކޮށްލައިގެން ގެންނަ ހެޔޮ ބަދަލުތަކެކެވެ.

މައްކާގެ ގަދަ އަވީގައި ޠަވާފުކުރުމާއި، ބޭރު ގޯތިތެރޭގައި ނަމާދުކުރަން ތިބޭ ޙައްޖާޖީންނާއި ޢުމްރާވެރިންނަށް، މި އޮޓޮމެޓިކް ކުޑަތަކަކީ ހަމައެކަނި އިމާރާތްކުރުމުގެ ފުރިހަމަ ކަމެއް ނޫނެވެ. މިއީ އެތައް މިލިއަން ބަޔަކަށް ލިބިގެންދާނެ ވަރަށް ބޮޑު ތަސައްލީއެކެވެ.

މަދީނާގެ މަސްޖިދުއް ނަބަވީގައި ހުންނަ މަޝްހޫރު ކުޑަތަކުން މިސާލު ނަގައިގެން ފަރުމާކޮށްފައިވާ މި ކުޑަތަކުގެ މަޤްޞަދަކީ، ހޫނުގަދަ ގޯތިތެރެ ފިނި އަދި ހިތްފަސޭހަ ތަނަކަށް ބަދަލު ކޮށްލުމެވެ.

މަދީނާއާ އަޅާބަލާއިރު މައްކާގައި މިފަދަ ކުޑަތަކެއް ހަރުކުރުމަކީ ގޮންޖެހުންތައް ބޮޑު ކަމެކެވެ. އެއީ މައްކާގައި ކުޑަ ހަރުކުރަންޖެހޭ ސަރަޙައްދު އިންތިހާއަށް ބޮޑުވުމާއި، މައްކާގެ ވާދީއަށް ޚާއްޞަ ވައިގެ ދައުރުވުން ހުންނަ ގޮތުގެ ސަބަބުންނެވެ.

މިއީ އަޅުގަނޑުމެން އާންމުކޮށް ބޭނުންކުރާ ކުޑަތަކެއް ނޫނެވެ. ކޮންމެ ކުޑައެއް ފުރިހަމައަށް ހުޅުވުމުން އެތައް ސަތޭކަ އަކަ މީޓަރަކަށް ހިޔާ ފޯރުކޮށްދެއެވެ.

މި ކުޑަތަކުގެ ފޮތި ތައްޔާރުކޮށްފައިވަނީ ޚާއްޞަ ޓެފްލޮން ފޮތިންނެވެ. މިއީ އިރުގެ ނުރައްކާތެރި ދޯދިތަކަށް ނުވަދެވޭ، އަލިފާން ނުހިފާ، އަދި ގަދަ ހޫނުގައިވެސް ހަލާކުނުވާ ގޮތަށް ފަރުމާކޮށްފައިވާ ފޮތިގަނޑެކެވެ.

މަދީނާގެ ކުޑަތަކެކޭ އެއްފަދައިން، މި ކުޑަތަކުގައިވެސް ފަންކާއާއި ފެން ބުރުވާ ނިޒާމް ހަރުކުރެވިފައިވެއެވެ. މީގެ ސަބަބުން ވަށައިގެންވާ މާޙައުލުގެ ހޫނުމިން ވަރަށް ބޮޑަށް ދަށްކޮށްދެއެވެ.

"ﷲގެ މެހެމާނުންނަށް" ލުއިފަސޭހަ ކޮށްދިނުމަކީ ދެ ހަރަމްފުޅުގެ ކަންތައްތަކާ ބެހޭ އިދާރާގެ އެންމެ ބޮޑު މަޤްޞަދެވެ. މި ކުޑަތަކުގެ ސަބަބުން އެތައް ފައިދާތަކެއް ލިބޭނެއެވެ.

އޭގެ ތެރޭގައި އަވީގެ ހޫނުން ރައްކާތެރި ކޮށްދޭނެއެވެ. މައްކާގެ ހޫނުމިން އާންމުކޮށް 45 ޑިގްރީ ސެލްސިއަސް އަށްވުރެ މައްޗަށް ދާއިރު، މި ހިޔަލުގެ ސަބަބުން ހޫނު ގަދަވުމުން ޖެހޭ ބަލިތަކުން މީހުން ސަލާމަތްކޮށްދެއެވެ.

އަދި ނަމާދުކުރާނެ ޖާގަ ވެސް އިތުރުވެގެން ދާނެއެވެ .ދުވާލުގެ އެންމެ ހޫނުގަދަ ވަގުތުތަކުގައި ބޭރު ގޯތިތެރޭގައި މަޑުކޮށްލެވޭ ވަރުވުމުން، އެތެރޭގެ އޭސީ ހޯލްތަކަށް ބާރުބޮޑުވުން ކުޑަވެގެން ދެއެވެ.

މަލެއް ފޮޅޭ ގޮތަށް ފަރުމާކޮށްފައިވާ މި ކުޑަތަކުގެ ސަބަބުން، ހަރަމްފުޅުގެ މާތްކަމާއި ހައިބަތަށް އިތުރު ފުރިހަމަކަމެއް ލިބިގެންދެއެވެ.

ޙަރަމްފުޅުގެ ހިޔާ ބޮޑުކުރުމަކީ ހަމައެކަނި އިމާރާތް ކުރުމުގެ މަސައްކަތެއް ނޫނެވެ. އެއީ 21 ވަނަ ގަރުނުގެ އެންމެ ފަހުގެ ޓެކްނޮލޮޖީ ބޭނުން ކޮށްގެން، މިލިއަނުން އަންނަ މީހުންނަށް އެންމެ ފެންވަރު ރަގަނޅު ޚިދުމަތެއް ދިނުމެވެ.

މި މަޝްރޫޢަކީ ސައުދީ އަރަބިއްޔާގެ ވިޜަން 2030 ގެ މުހިންމު ބައެކެވެ. މި ތަޞައްވުރުގެ އަމާޒަކީ އަހަރަކު 30 މިލިއަން ޢުމްރާވެރިންނަށް ޚިދުމަތް ދިނުމެވެ.

ޖަރުމަނުގެ އިންޖިނިއަރިންގް އާއި އެންމެ ފަހުގެ ވަސީލަތްތައް ބޭނުންކޮށްގެން، ސައުދީ ސަރުކާރުން ކަށަވަރުކުރަނީ ޒިޔާރަތްކުރާ ކޮންމެ މީހަކަށްވެސް އަމާން އަދި ހިތްފަސޭހަ މާޙައުލެއް އޮތުމެވެ.