އީރާނުން އަވަށްޓެރި ގައުމުތަކަށް އަމާން ދިނަސް، އެ ގައުމަށް ވަރުގަދަ ހަމަލާތަކެއް ދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ، އަވަށްޓެރި ގައުމުތަކުން އެމެރިކާ މެދުވެރިކޮށް އިސްވެ ހަމަލާ ނުދޭ ނަމަ، އީރާނުން ވެސް އެ ގައުމުތަކަށް ހަމަލާ ނުދޭން ވަގުތީ ހިންގާ މަޖިލީހުން ނިންމާފައިވާ ކަމަށެވެ. ހަމަ އެ ހިނދު، ހިނގި ހަފްތާއެއްހާ ދުވަހު ދެވުނު ހަމަލާތަކާ ގުޅިގެން ވަނީ މާފަށްވެސް އެދިވަޑައިގެންފަ އެވެ.
ނަމަވެސް ޓްރަމްޕް، "ޓްރުތު ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ހަމަލާތައް ހުއްޓާ ލައްވާނީ ޝަރުތަކާ ނުލައި އީރާނުން އަމާން ދިނުމުން ކަމަށެވެ.
"އީރާނުގެ ނުބައި އަމަލުތަކުގެ ސަބަބުން، މިހާތަނަށް އަމާޒުކުުރަން ވިސްނާފައިނުވާ ސަރަހައްދުތަކާއި ތަންތަންވެސް ފުރިހަމައަށް ނައްތާލުމަށް ސީރިއަސްކަމާ އެކު އެބަ ވިސްނަމުން ގެންދަން" ޓްރަމްޕް ވިދާޅުވި އެވެ.
އީރާނުގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނީ ހަމަލާ ދިނުން ކުރިއަށް ގެންދާ ނަމަ، އެމެރިކާ އާއި އިސްރާއީލުގެ ހުރިހާ އަސްކަރީ މަރުކަޒުތަކަށް ހަމަލާ ދޭނެ ކަމަށެވެ.
އީރާންގެ ރައީސް ވަނީ އެ ގައުމުން ދުވަހަކުވެސް އެމެރިކާ އަދި އިސްރާއީލަށް އަމާން ނުދޭނެ ކަމަށް ވިދާޅުވެފައެވެ.
"އީރާނުން ޝަރުތަކާ ނުލައި އަމާން ދިނުމަށް ދުޝްމަނުން ދެކޭ ހުވަފެނައިގެން ކަށްވަޅަށް ދޭ،" އީރާނަށް ހަމަލާ ދިނުން ހުއްޓާލާނީ ޝަރުތަކާ ނުލައި އަމާން ދިނުމުން ކަމަށް އެމެރިކާގެ ރައީސް ޓްރަމްޕް ދެއްކި ވާހަކަތަކަށް ރައްދު ދެއްވައި އީރާންގެ ރައީސް ވިދާޅުވިއެވެ.
މިދިޔަ ހޮނިހިރު ދުވަހު އެމެރިކާ އާއި އިސްރާއީލް ގުޅިގެން އީރާނަށް ހަމަލާދޭން ފަށައި އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އައިއާރުޖީސީ އަދި އަސްކަރިއްޔާގެ އިސްވެރިންތަކެއް ވަނީ އަވަހާރަކޮށްލައިފައެވެ. ހަނގުރާމައިގައި މިހާތަނަށް އައިއިރު، އީރާނުން ހާހަކަށް ވުރެ ގިނަ މީހުން ވަނީ މަރުވެފައެވެ.
