ވޭތުވެދިޔަ ދެތިން އަހަރު ދުނިޔޭގެ މުއްސަނދިންގެ އެންމެ މަޤުބޫލު މަންޒިލަކަށް ވެފައި އޮތް ދުބާއީގެ މަޤާމަށް ބޮޑު ލޮޅުމެއް އަރައިފިއެވެ.
މެދުއިރުމަތީގެ މަސްލަހަތު ގޯސްވެ، މިދިޔަ ހަފުތާގައި ޔޫއޭއީއަށް އަމާޒުވި މިސައިލް އަދި ޑްރޯން ހަމަލާތަކާ ގުޅިގެން، އެ ސަރަހައްދަކީ "ސޭފް ހެވަން" އެއް ނޫން ކަމަށް ބުނެ އޭޝިއާގެ ބިލިއަނަރުން އެމީހުންގެ މުދަލާއި ފައިސާ ބަދަލު ކުރަން ފަށައިފިއެވެ.
މީގެ ކުރިން ދުބާއީއަށް މީހުން ދަނީ އެތަނުގެ ޓެކްސް އިނާޔަތްތަކާއި، ލުއި ޤަވާއިދުތަކުގެ ބޭނުން ހިފުމަށެވެ. ނަމަވެސް، މިހާރު ކުރިމަތިވެފައިވާ ހަނގުރާމައިގެ ބިރުވެރިކަމާ އެކު، މުއްސަނދިންގެ ވިސްނުން މިވަނީ ބަދަލުވެފައެވެ.
ސިންގަޕޫރުގެ ގާނޫނީ ވަކީލެއް ކަމަށްވާ ރަޔަން ލިން ބުނި ގޮތުގައި، އޭނާގެ ކްލައިންޓުންގެ ތެރެއިން ދުބާއީގައި ތިބި، ކޮންމެ މީހެއްގެ މިލްކިއްޔާތުގައި 50 މިލިއަން ޑޮލަރަށް ވުރެ ގިނައިން ހުރި 6-7 މީހަކު ވަނީ މި ހަފުތާގައި ކުއްލި ގޮތަކަށް އެމީހުންގެ އެސެޓްތައް ސިންގަޕޫރަށް ބަދަލު ކުރަން އެދިފައެވެ.
ވެލްތު އެޑްވައިޒަރުން ބުނާ ގޮތުގައި ސިންގަޕޫރުގެ ފެމިލީ އޮފީސްތަކަށް މިހާރު ވަނީ ނުކަތާ ވަރަށް ހުށަހެޅުންތައް ލިބެން ފަށާފައެވެ. "އެންޑަސަން ގްލޯބަލް" ފަދަ ކުންފުނިތަކަށް މި ހަފުތާގެ ތެރޭގައި އެކަނިވެސް 10 އާއި 20 އާ ދެމެދުގެ އަދަދަކަށް ފެމިލީ އޮފީސްތަކުން ވަނީ މަޢުލޫމާތު ސާފުކޮށްފައެވެ. މީގެ ތެރޭގައި ގިނައީ ޗައިނާ އަދި އިންޑިއާގެ ނުފޫޒު ގަދަ ވިޔަފާރިވެރިންނެވެ.
އީރާނާއި އެހެން ބާރުތަކުގެ މެދުގައި ހިނގަމުންދާ ހަމަނުޖެހުން ތަކުގެ ސީދާ އަސަރު ދުބާއީ އާއި އަބޫދާބީއަށް މި ވަނީކުރަން ފެށާފައެވެ.
މުއްސަނދިންނަކީ އެމީހުންގެ އާއިލާ އާއި މުދަލުގެ ސަލާމަތަށްޓަކައި ކޮންމެ ފަދަ ޚަރަދެއްވެސް ކުރާނެ ބައެކެވެ. ސިންގަޕޫރުގެ ޤަވާއިދުތައް ހަރުކަށި ނަމަވެސް، އެތަނުގެ އަމާން ކަމަށް މިހާރު ބޮޑުތަނުން އިތުބާރު ކުރެވެއެވެ. ދުބާއީގެ އެއާޕޯޓް ތަކަށާއި މުހިންމު ތަންތަނަށް ހަމަލާ އަމާޒުވުމަކީ ވިޔަފާރީގެ މުސްތަޤުބަލަށް އޮތް ބިރެއް ކަމަށް އެމީހުން ދެކެއެވެ.
ދުބާއީއަކީ 2025 ވަނަ އަހަރު ދުނިޔޭގެ އެންމެ ގިނަ މިލިއަނަރުން ހިޖުރަކުރި ސިޓީއަށް ވީ ނަމަވެސް، 2026 ގެ މި ފެށުމަކީ އެ ސިޓީގެ މާލީ ދާއިރާއަށް ކުރިމަތިވާނެ އެންމެ ބޮޑު ގޮންޖެހުމަށް ވެގެންދާނެއެވެ. "ފައިސާއަކީ ބިރުގަންނަ އެއްޗެއް" ކަމަށް ބުނާ ބީދައިން، ރައްކާތެރިކަމެއް ނެތް ތަނަކުން ފައިސާ ފިލައިގެން ދިއުމަކީ ހައިރާންވާންޖެހޭ ކަމެއް ނޫނެވެ.
