ފައިނޭންޝަލް ޓައިމްސް (އެފް.ޓީ) އިން ޝާއިޢުކޮށްފައިވާ އާދަޔާ ޚިލާފު ރިޕޯޓެއް ބުނާގޮތުން، މެދުއިރުމަތީގެ ޖިއޯޕޮލިޓިކަލް މަސްރަޙަށް ބޮޑު ބަދަލެއް އަންނަ ފަދަ ނިންމުމެއް ނިންމުމަށް، އެމެރިކާގެ ސަރަޙައްދީ މުހިންމު ހަތަރު ބައިވެރިއަކު ދަނީ ވިސްނަމުންނެވެ.
އެ ގައުމުތަކުން ވިސްނަމުންދާ ކަމަކީ، އެމެރިކާގައި މިހާރު ހުރި ކޮންޓްރެކްޓްތަކާއި ކުރިއަށް އޮތް އިންވެސްޓްމަންޓްތައް މުރާޖަޢާކޮށް، މާލީ އިލްތިޒާމް ތަކުން ވަކިވުމަށެވެ.
ބުދަ ދުވަހުގެ ފަހުގެ ވަގުތެއްގައި ޝާއިޢުކުރި މި ރިޕޯޓުގައިވާ ގޮތުން، ސައުދީ ޢަރަބިއްޔާ، ޔުނައިޓެޑް ޢަރަބް އެމިރޭޓްސް (ޔޫ.އޭ.އީ)، ކުވައިތު، އަދި ޤަޠަރުގެ އިސް މަސްއޫލުވެރިން ދަނީ، ރޭވިފައިވާ އެތައް ބިލިއަން ޑޮލަރެއްގެ އިންވެސްޓްމަންޓްތަކާއި ވިޔަފާރީގެ އެއްބަސްވުންތައް އުވާލުމަށްޓަކައި، ޤާނޫނީ މަގުތައް ހޯދަމުންނެވެ. ޚާއްޞަކޮށް، މަޖުބޫރީ ޙާލަތުގެ މާއްދާތަކަށް އެ ބޭފުޅުން ސަމާލުކަން ދެއްވައެވެ.
މި ނިންމުމަކީ ސިޔާސީ އިންޒާރަކަށްވުރެ ބޮޑަށް، ސްޓްރެޓީޖިކް ގޮތުން މަޖުބޫރު ވެގެން ނިންމާ ނިންމުމެއްގެ ގޮތުގައި މަސްދަރު ތަކުން ސިފަކުރެއެވެ. މިއީ ފެބްރުއަރީ މަހުގެ ފަހުކޮޅު އެމެރިކާ އިސްވެ އޮވެ އީރާނާއެކު ފެށި ހަނގުރާމައިގެ ސަބަބުން ގަލްފުގެ ޤައުމުތަކުގެ އިޤްތިޞާދަށް ކުރިމަތިވެފައިވާ ބޮޑު ދަތިތަކާ ގުޅިގެން ނިންމި ނިންމުމެކެވެ.
މި ހަނގުރާމައިގެ ސަބަބުން ސަރަޙައްދުގެ އިޤްތިޞާދީ ބިންގާ ވަނީ ފުނޑުފުނޑު ވެފައެވެ. ހޯރްމުޒް ކަނޑުއޮޅި ބަންދުވުމާއި، އީރާނުން ދިން ބަދަލުހިފުމުގެ ޙަމަލާތަކުގެ ސަބަބުން، ޤަޠަރު އެނަރޖީގެ ފެސިލިޓީތަކާއި ސައުދީ އަރަމްކޯގެ މުހިންމު ރިފައިނަރީ ތަކަށް ބޮޑެތި ގެއްލުންތަކެއް ލިބިފައިވެއެވެ. މިކަމުގެ ސަބަބުން ގަލްފުން ތެލާއި ދިޔާ ކުރި ގޭސް (އެލް.އެން.ޖީ) ބޭރު ކުރުން ވަނީ މުޅިން ހުއްޓިފައެވެ. މިއީ މި ހަތަރު ޤައުމުގެވެސް މައިގަނޑު އާމްދަނީގެ މަސްދަރެވެ.
މީގެއިތުރުން، މި ޤައުމުތަކުގެ ސަރުކާރު ތަކުން ދަނީ ޤައުމުގެ އެތެރޭގެ ޚަރަދުތައް އިންތިހާއަށް އިތުރުވަމުންދާ މައްސަލައާ ކުރިމަތި ލަމުންނެވެ. އީރާނުގެ މިސައިލްތަކާއި ޑްރޯންތައް ހުއްޓުވުމަށް ބޭނުންކުރާ ޒަމާނީ އެއާ ޑިފެންސް ނިޒާމުތައް ހިންގުމަށް ބޮޑު ޚަރަދެއް ކުރަން ޖެހިފައިވާއިރު، ޤައުމުގެ ދިގު މުއްދަތުގެ ދެމިއޮތުމަށް މުހިންމު ހަކަތައިގެ އޮނިގަނޑު މަރާމާތު ކުރުމުގެ މާލީ ބުރަވެސް ވަނީ އުފުލަން ޖެހިފައެވެ.
މި މަޝްވަރާތަކާ ގާތް މަސްއޫލުވެރިއަކު ފައިނޭންޝަލް ޓައިމްސްއަށް ބުނެފައިވަނީ، "ބަޖެޓަށް ކުރިމަތިވެފައިވާ ދަތިތަކަކީ" ކޮންޓްރޯލް ނުކުރެވޭނެ ފަދަ ދަތިތަކެއް ކަމަށެވެ.
ރިޕޯޓްތައް ބުނާގޮތުން، މި މުރާޖަޢާގެ ދަށުން އެމެރިކާގެ ސްޓޭޓްތަކަށާއި އަމިއްލަ ކުންފުނިތަކަށް ދިނުމަށް ނިންމާފައިވާ އިންވެސްޓްމަންޓްތަކާއި، މިހާރު ހުރި ވިޔަފާރީގެ ޙިއްޞާތައް ވިއްކާލުމާއި، އަދި ބައިނަލްއަޤްވާމީ ބޮޑެތި ބްރޭންޑިންގ އަދި ކުޅިވަރު ސްޕޮންސަރޝިޕް އެއްބަސްވުންތައްވެސް ހިމެނެއެވެ.
ކޮންޓްރޯލް ނުކުރެވޭ ކާރިސާތަކުގެ ސަބަބުން އެއްބަސްވުން ތަކުން ވަކިވުމުގެ ޤާނޫނީ މަފްހޫމް ބޭނުން ކުރުމަކީ އުނދަގޫ ކަމެއް ނަމަވެސް، މި މުއްސަނދި ޤައުމުތަކުން މި ގޮތްތައް ބަލަމުން ދާކަމީ މި ނާޒުކު ޙާލަތުގެ ބޮޑުކަން ހާމަކޮށްދޭ ކަމެކެވެ.
މިއީ މި ހަނގުރާމައިގެ އިޤްތިޞާދީ ނޭދެވޭ އަސަރު ތަކުގެ ސަބަބުން، އެމެރިކާގެ އެންމެ ގާތް ސަރަޙައްދީ ބައިވެރިންގެ ދާޚިލީ ހަމަޖެހުމަށް ނުރައްކާ ވަމުންދާކަމުގެ ސިގްނަލެކެވެ. އަދި ދިގު މުއްދަތުގެ ޚާރިޖީ އިލްތިޒާމް ތަކަށްވުރެ، ޤައުމުގެ ސަލާމަތަށް އިސްކަންދޭން ޖެހިފައިވާކަން ހާމަކޮށްދޭ ކަމެކެވެ.
ވައިޓް ހައުސްއިންނާއި ސްޓޭޓް ޑިޕާޓްމަންޓުންވެސް ފައިނޭންޝަލް ޓައިމްސްގެ މި ރިޕޯޓާ ގުޅޭގޮތުން އަދި ވަކި އެއްޗެއް ބުނެފައެއް ނުވެއެވެ.
