ރިޒާ ޕަހްލަވީ އަކީ އީރާނުގެ އެންމެ ފަހުގެ ރަސްގެފާނު (ޝާހް) ގެ ދޮށީ ދަރިކަލުންނެވެ. 40 އަހަރަށްވުރެ ގިނަ ދުވަހު އަރުވާލެވިގެން ގައުމުން ބޭރުގައި ދިރިއުޅުއްވި ނަމަވެސް، އޭނާ އަކީ މެދުއިރުމަތީގެ ސިޔާސީ މަސްރަހުގައި އަދިވެސް ނުފޫޒު ގަދަ ބޭފުޅެކެވެ.

ރިޒާ ޕަހްލަވީ އަކީ އީރާނުގެ ކުރީގެ ވަލީއަހުދެވެ. 1960 ވަނަ އަހަރު އުފަންވި ރިޒާ އަކީ އީރާނުގެ ތަހުތުގެ ވާރިސެވެ. ނަމަވެސް 1979 ވަނަ އަހަރު އައި އީރާނުގެ އިންގިލާބުގައި އޭނާގެ ބައްޕަ، މުހައްމަދު ރިޒާ ޕަހްލަވީގެ ރަސްކަން ވައްޓާލައި، އާޔަތުﷲ ހުމައިނީގެ ލީޑަރޝިޕްގެ ދަށުން ދީނީ ސަރުކާރެއް ގާއިމުކުރެވުނެވެ.

1979 އިން ފެށިގެން އޭނާ ދިރިއުޅުއްވަނީ އެމެރިކާގައެވެ. އޭނާ އަކީ އެމެރިކާއިން ތަމްރީނު ވެފައިވާ ފައިޓަރ ޕައިލެޓެއްގެ އިތުރުން ސިޔާސީ ދާއިރާއިން މަތީ ތައުލީމު ހާސިލު ކުރައްވާފައިވާ ބޭފުޅެކެވެ.

އޭނާއަކީ އީރާނުގައި ސެކިއުލާ (ދީނާއި ދައުލަތް ވަކިވެފައިވާ) ޑިމޮކްރެޓިކް ސަރުކާރެއް ގާއިމުކުރުމަށް ވަކާލާތު ކުރައްވާ ބޭފުޅެކެވެ.

އީރާނުގެ މިހާރުގެ ސަރުކާރާ ހިލާފަށް، ޕަހްލަވީ ދެކެވަޑައިގަންނަވާ ގޮތުގައި އެމެރިކާ އާއި އިސްރާއީލަކީ އީރާނުގެ ވަރަށް ގާތް މިތުރުންނެވެ.

އޭނާ ގަބޫލު ކުރައްވާ ގޮތުގައި އީރާނުގެ މިހާރުގެ ސަރުކާރުން ގެންގުޅޭ "އައިޑިއޮލޮޖިކަލް" ސިޔާސަތުތަކުގެ ސަބަބުން ގައުމު އޮތީ އިގްތިސާދީ ގޮތުން ބަނގުރޫޓުވެ، ދުނިޔެއާ އެކަހެރިވެފައެވެ.

އޭނާގެ ބައްޕަގެ ރަސްކަމުގައިވެސް އީރާނަކީ އެމެރިކާ އާއި އިސްރާއީލާ ވަރަށް ގާތް އަސްކަރީ އަދި އިގްތިސާދީ ގުޅުމެއް ބޭއްވި ގައުމެކެވެ. ޕަހްލަވީ ބޭނުންވަނީ އެ ގުޅުން އަލުން އިއާދަކުރުމަށެވެ.

އޭނާ ވިދާޅުވާ ގޮތުގައި އީރާނުގައި ޑިމޮކްރެޓިކް ސަރުކާރެއް އޮވެއްޖެނަމަ، ނިއުކްލިއާ ހަތިޔާރު އުފެއްދުމުގެ ބަދަލުގައި ދުނިޔޭގެ އިގްތިސާދުގެ ތެރެއަށް އީރާނު ވަދެ، ސަރަހައްދީ ސަލާމަތަށް މަސައްކަތް ކުރެވޭނެއެވެ. އޭނާ ވެރިކަމަށް ގެންނަން އެމެރިކާ ބޭނުންވާކަމަށް ބައެއް ރިޕޯޓްތައް ބުނެއެވެ.

މިއީ ވަރަށް ބޮޑަށް ބަހުސް ކުރެވޭ މައުޟޫއެކެވެ. އެމެރިކާގެ ގިނަ ސިޔާސީވެރިން އޭނާއަށް ތާއީދުކުރެއެވެ.އެމެރިކާގެ ބައެއް އިސް ފަރާތްތަކުން ދެކޭ ގޮތުގައި ޕަހްލަވީއަކީ ހުޅަނގުގެ އުސޫލުތައް ދަންނަ، އަދި އީރާނުގެ މިހާރުގެ ސަރުކާރަށް އޮތް އެންމެ ރަނގަޅު ބަދަލެވެ. އެމެރިކާގެ ރަސްމީ ސިޔާސަތަކީ އީރާނުގެ ވެރިކަމަށް ވަކި ބޭފުޅަކު "އިސްކުރުމެއް" ނޫނެވެ.

އޭގެ ބަދަލުގައި އެމެރިކާއިން ބޭނުންވަނީ އީރާނުގެ ރައްޔިތުން އަމިއްލައަށް އެމީހުންގެ ލީޑަރެއް ހޮވުމަށެވެ. ޕަހްލަވީވެސް ވިދާޅުވަނީ އޭނާ ބޭނުން ވަނީ ހަމައެކަނި "ބްރިޖެއްގެ" ދައުރު އަދާކުރައްވަން ކަމަށެވެ.

އިރާގާއި އަފްޣާނިސްތާނުގެ ތަޖުރިބާއަށްފަހު، ބޭރުގެ ގައުމަކުން މީހަކު ގެނެސް ވެރިކަމަށް އިސްކުރުމަކީ އެމެރިކާއިން މިހާރު ވަރަށް ބޮޑަށް ޖެހިލުންވާ ކަމެކެވެ.

ޕަހްލަވީއަށް ތާއީދުކުރާ ގިނަ ބަޔަކު އީރާނުގައި ތިބި ނަމަވެސް، ބައެއް ގޮންޖެހުންތައް އެބަހުއްޓެވެ. އިދިކޮޅު ފަރާތްތަކުގެ މެދުގައި އޮތް ބައިބައިވުން އެބައޮތެވެ. އީރާނުގެ އިދިކޮޅު ހުރިހާ ޖަމާއަތްތަކަކީ އޭނާއަށް ތާއީދުކުރާ ބައެއް ނޫނެވެ.

47 އަހަރު ވަންދެން ގައުމުން ބޭރުގައި އުޅުއްވުމުން، އީރާނުގެ އެތެރޭގެ ހާލަތު އޭނާއަށް އެންމެ ފުރިހަމައަށް އެނގޭނެތޯ ބައެއް މީހުން ސުވާލު އުފައްދައެވެ.