ކުރިއަށް އޮތް ލޯކަލް ކައުންސިލް އިންތިހާބުގައި އިދިކޮޅަށް ކައުންސިލްތައް ދީފިނަމަ، ރައީސްގެ ސްޕީޑުގައި ތަރައްގީގެ މަޝްރޫތައް ކުރިއަށް ނުގެންދެވޭނެ ކަމަށް ވިލިމާލެ ދާއިރާގެ މެމްބަރު މުހައްމަދު އިސްމާއިލް ވިދާޅުވެއްޖެ އެވެ.
ކޮންގްރެސް ޕާޓީގެ ހދ. އަތޮޅުގެ މާލެ ޖަގަހަ ރަސްމީކޮށް ހުޅުވުމަށް ބޭއްވި ހަފްލާގައި ވާހަކަދައްކަވަމުން، ވިލިމާލެ ދާއިރާ މެމްބަރު ވިދާޅުވީ ސަރުކާރަށް ތާއިދުކުރާ ކައުންސިލްތަކެއް ނެތިއްޖެ ނަމަ، ސަރުކާރަށާއި ރައްޔިތުންނަށްވެސް ތަރައްގީ ގެނައުމުގައި ލަސްތަކާ ކުރިމަތިލާން ޖެހޭނެ ކަމަށެވެ.
މި ސަރުކާރުން ރަށްރަށުގައި ޕްރޮޖެކްތައް ހިންގުމަށް ބިން ހޯދަން ހުށަހެޅުމުން، ކައުންސިލްތަކުން ދަތިތައް ކުރިމަތިކޮށްފައިވާ ކަމަށް ވިދާޅުވި އެވެ. ހާއްސަ ގޮތެއްގައި، އެ ހުރަސްތައް ކުރިމަތިވެފައިވަނީ އެމްޑީޕީ ކައުންސިލްތައް ހިންގަމުންދިޔަ ރަށްރަށުން ކަމަށާއި، ސަރުކާރުގެ ކުރިއެރުން ހުއްޓުވުމަށް ކައުންސިލްތަކުން ކުރި ޖެއްސުންތައް ރައްޔިތުންނަށް ހާމަ ގޮތެއްގައި ފެންނަ ކަމަށް ވިދާޅުވިއެވެ.
ކުރިއަށް އޮތް ކައުންސިލް އިންތިހާބު ސަރުކާރަށް ކާމިޔާބު ކޮށްދިނުމަށް ރައްޔިތުންނަށް ގޮވާލައްވަމުން، ތަރައްގީ ދެމިއޮންނާނީ ސަރުކާރާ ގުޅިގެން ކައުންސިލްތައް ހިންގިގެން ކަމަށް ވިދާޅުވި އެވެ.
މުހައްމަދު އިސްމާއިލް ވިދާޅުވީ ރައީސްގެ ތަރައްގީގެ ތަސައްވުރު ހާސިލް ކުރުމަށް ސަރުކާރަށް ކުރިއަށް އޮތް ކައުންސިލް އިންތިހާބު އެކީ ދޭން ޖެހޭ ކަމަށެވެ.
އެ ހަފްލާގައި ވާހަކަ ދައްކަވަމުން، ރައީސްގެ ލީޑަރޝިޕްއަށް ޝުކުރު ދަންނަވަމުން، ކެމްޕެއިން ހަރަކާތްތައް ހިންގުމުގައި ކުރިޔާ ބަލާ ލިބިފައިވާ ލުއި ފަސޭހަތައް ފާހަގަ ކުރެއްވިއެވެ.
އެގޮތުން އޭނާ ވިދާޅުވީ ކަންކަން ކުރުމުގައި މިހާރު ވަރަށް ބޮޑަށް ފަސޭހަވެފައިވާ ކަމަށާއި، މިދިޔަ ސަރުކާރުތަކުގައި ކެމްޕެއިން ހަރަކާތްތައްވެސް ގެންދަން އުނދަގޫ ކަމަށެވެ. އެހެންނަމަވެސް ރައީސްގެ އިރުޝާދުގެ ދަށުން ކަންކަން ރޭވިފައިވާ ގޮތް އަދި ކެމްޕެއިން މަސައްކަތްތައް ކުރުމުގައި ބޮޑެތި ލުއި ފަސޭހަތަކެއް ހުރިކަަމަށް ވިދާޅުވިއެވެ.
