އީރާނުގެ އެންމެ މަތީ ލީޑަރު އަވަހާރަވުމާ ގުޅިގެން، އެ ގައުމުގެ ދެން އަންނަ ލީޑަރަކު ހޮވުމުގެ މަރުހަލާގައި އެމެރިކާއިން އަމަލީ ގޮތުން ބައިވެރިވާން ޖެހޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
އެކްސިއޯސްއަށް ދެއްވި ޚާއްސަ އިންޓަވިއުއެއްގައި ޓްރަމްޕް ވިދާޅުވީ، އެމެރިކާގެ ބައިވެރިވުމެއް ނެތި އީރާނުން އައު ލީޑަރަކު އައްޔަން ކުރަން މަސައްކަތް ކުރުމަކީ ވަގުތު ބޭކާރު ކުރުން ކަމަށެވެ. މިއީ ޒަމާނީ ތާރީޚުގައި އެމެރިކާގެ ރައީސަކު މިފަދަ ސީދާ ގޮތެއްގައި އެހެން ގައުމެއްގެ ވެރިކަމުގެ ބާރު ބަދަލުވުމުގެ ތެރެއަށް ވަންނަން ބޭނުންފުޅުވާ ކަމަށް ވިދާޅުވި ފުރަތަމަ ފަހަރެވެ.
އަވަހާރަކޮށްލާފައިވާ އީރާނުގެ ރޫހާނީ ލީޑަރު އަލީ ޚާމަނާއީގެ ދަރިކަލުން މުޖުތަބާ ޚާމަނާއީއަކީ އެ މަގާމަށް އައުމަށް އެންމެ ގާތް ބޭފުޅާ ކަމަށް ގިނަ ބަޔަކު ދެކުނު ނަމަވެސް، އެ ކަން ގަބޫލުނުކުރައްވާނެ ކަމަށް ޓްރަމްޕް ވަނީ ސާފުކޮށް ވިދާޅުވެފައެވެ.
”ޚާމަނާއީގެ ދަރިކަލަކީ އެކަމަށް އެކަށީގެންވާ ވަރުގެ ބޭފުޅެއް ނޫން. އެ މަގާމަށް މީހަކު އައްޔަން ކުރުމުގައި އަހަރެން ބައިވެރިވާން ޖެހޭނެ،“ ޓްރަމްޕް ވިދާޅުވިއެވެ.
އީރާނުގެ މުސްތަގުބަލާ ގުޅޭގޮތުން އިތުރަށް ވާހަކަ ދައްކަވަމުން ޓްރަމްޕް ވިދާޅުވީ، އެމަނިކުފާނު ބޭނުންފުޅުވަނީ އީރާނަށް އަމާންކަމާއި ސުލްހަވެރިކަން ގެނެސްދޭނެ ލީޑަރެއް ކަމަށެވެ.
ޓްރަމްޕް ވަނީ އީރާނަށް ސީދާ އިންޒާރުތަކެއް ދެއްވާފައެވެ. އެގޮތުން، ކުރީގެ ލީޑަރޝިޕްގެ ސިޔާސަތުތައް ދަމަހައްޓާ އެއްވެސް ލީޑަރަކު އީރާނުން އައްޔަންކޮށްފިނަމަ އެމެރިކާއިން އެކަން ބަލައިނުގަންނާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، އެފަދަ ގޮތަކަށް ކަންތައް ވެއްޖެނަމަ، ކުރިއަށް އޮތް ފަސް އަހަރު ތެރޭގައި އެމެރިކާއާއެކު އަލުން ކުރިމަތިލުމަކަށް ދިއުމުގެ ބިރު އޮތް ކަމަށްވެސް ޓްރަމްޕް ފާހަގަކުރެއްވިއެވެ.
މި ވާހަކަފުޅާ ގުޅިގެން، އެހެން ގައުމެއްގެ ދާޚިލީ ކަންކަމުގެ ތެރެއަށް ބޭރު ގައުމަކުން ވަނުމުގެ ހައްގު އޮތްތޯ ބައިނަލްއަޤުވާމީ މައިދާނުގައި ބޮޑު ބަހުސެއް ވަނީ އުފެދިފައެވެ. ބައިނަލްއަޤުވާމީ ޤާނޫނުގެ ދަށުން، ކޮންމެ ގައުމަކަށްވެސް އެ ގައުމެއްގެ ވެރިން ހޮވުމުގެ ފުރިހަމަ އިޚްތިޔާރު ލިބިގެންވެއެވެ.
މި ވާހަކަތަކާއެކު އީރާނުގެ ދާޚިލީ ކަންކަމުގެ ތެރެއަށް އެމެރިކާއިން ވަންނަން އުޅޭ ކަމުގެ ކަންބޮޑުވުން ވަނީ ބައިނަލްއަޤުވާމީ މުޖުތަމައުގައި އިތުރުވެފައެވެ. މެދުއިރުމަތީގެ ސިޔާސީ މަސްރަހު އިތުރަށް ނުތަނަވަސްވެދާނެ ކަމުގެ ބިރު ބައެއް މުހައްލިލުން ވަނީ ފާޅުކުރައްވާފައެވެ.
