ދުޅަހެޔޮ ޖީލެއް ބިނާކުރުމަށްޓަކައި ރާއްޖޭގައި ޝީޝާ މަނާކުރުމާއި ހަކުރުން ޓެކްސް ނެގުމުގެ އިތުރުން ހަކުރަށް ދޭ ސަބްސިޑީ ކަނޑާލުމާ ގުޅޭ މަޝްވަރާތައް ކުރެވެމުންދާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.
ހެލްތު މިނިސްޓްރީން މިއަދު ބޭއްވި ޕްރެސް ކޮންފަރެންސްގައި ވާހަކަފުޅު ދައްކަވަމުން މިނިސްޓަރު ނާޒިމް ވިދާޅުވީ ދުންފަތުގެ އިތުރު ބާވަތްތައް މަނާކުރުމާއި ހަކުރު އެކުލެވޭ ބާވަތްތަކުން ޓެކްސް ނެގުމަކީ އާއްމުންގެ ދިރިއުޅުމުގެ ވައްޓަފާޅިއާ ގުޅޭ ކަމެއް ކަމަށެވެ. އެހެންކަމުން އެ ކަންތައްތައް ވަކި އުސޫލެއްގެ ތެރެއިން ރެގިއުލޭޓް ކުރަމުން އަންނަ ކަމަށް އެ މަނިކުފާނު ވިދާޅުވި އެވެ.
«މިހާރު އަޅުގަނޑުމެން ވަރަށް މަޝްވަރާކުރާ ކަންތައްތަކުގެ ވާހަކަ ތި ދަންނަވާލީ ޝީޝާ އާއި ހަކުރާ" ނާޒިމް ވިދާޅުވި އެވެ.
ނަމަވެސް މިނިސްޓަރު ފާހަގަކުރެއްވި ގޮތުގައި ހަކުރު ބާވަތްތަކުން ޓެކްސް ނެގުމާއި ސަބްސިޑީ ކަނޑާލުމަކީ ހަމައެކަނި ހެލްތު މިނިސްޓްރީއަށް ނެގޭނެ ނިންމުމެއް ނޫނެވެ. އެހެންނަމަވެސް އެ ފިޔަވަޅު އެޅޭނެ ދުވަހަކަށް ހެލްތު ސެކްޓާއިން އިންތިޒާރުކުރާ ކަމަށް ވެސް ނާޒިމް ވިދާޅުވި އެވެ.
މި މަޝްވަރާތައް ކުރެވެމުންދާއިރު، ޑޮކްޓަރުންގެ ޖަމިއްޔާއިން ވެސް ވަނީ މި ފިޔަވަޅުތަކަށް ތާއީދުކޮށްފަ އެވެ. އެ ޖަމިއްޔާއިން ވަނީ ޝީޝާ މަނާކުރުމާއި ހަކުރު އެކުލެވޭ ބުއިންތަކުން ނަގާ ޓެކްސް އިތުރުކުރުމަށް ގޮވާލައިފަ އެވެ.
