މިމަހުގެ 18 ވަނަ ދުވަހަކީ ފިތުރު ޢީދު ދުވަސް ކަމަށްވާތީ، ސަރުކާރުން ފަށަން ނިންމާފައިވާ ޓެކްސީ ލައިންގެ ޚިދުމަތް އެ ދުވަހު ތަޢާރަފް ކުރެވޭތޯ ޓްރާސްޕޯޓް މިނިސްޓްރީ ތައްޔާރު ވަމުންދާ ކަމަށް ޓްރާސްޕޯޓް މިނިސްޓަރ މުޙައްމަދު އަމީން ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ ޓްރާސްޕޯޓް މިނިސްޓްރީގެ ހާލަތާ ގުޅޭ ތަފްސީލުތައް ހިއްސާ ކުރެއްވުމަށް ބޭއްވި ނޫސްވެރިންގެ ބައްދަލުވުމެއްގަ އެވެ.
ޚިދުމަތް ފެށުން ލަސްވެ ދިޔައީ ރާއްޖޭގެ ތިމާވެށީގެ ޙާލަތަށް ތައްޔާރު ވުމަށްޓަކައި ޓެކްސީ ވެހިކަލްތަކަށް ވަކި ބަދަލުތަކެއް ގެންނަން ޖެހިގެން ކަމަށް މިނިސްޓަރ ވިދާޅުވި އެވެ. ރާއްޖޭގައި ޚިދުމަތް ދޭން ޖެހެނީ ކަނޑާ ވަރަށް ކައިރީގައި ކަމުން، ވަކި ޚާއްޞަ ތައްޔާރީތަކެއް ވާންޖެހޭ ކަމަށްވެސް ވިދާޅުވި އެވެ.
ޓެކްސީ ލައިނުގައި ތިން ބާވަތެއްގެ ކާރު ބޭނުން ކުރުމަށް ހަމަޖެހިފައިވެ އެވެ. އޭގެ ތެރެއިން އެއް ބާވަތް ތައިލެންޑުން ގެންނައިރު، ދެ ބާވަތް ގެންނާނީ ޗައިނާ އިންނެވެ. ކާރުތައް ރާއްޖެ ގެންނާނީ ދެ ބެޗަކަށް ކަމަށާ، ފުރަތަމަ ބެޗުގެ ކާރުތައް ލަންކާ ޕޯޓަށް ވަދެ، މި މަހުގެ 11 ވަނަ ދުވަހު ރާއްޖެ ގެނެވޭނެ ކަމަށް އެމްޓީސީސީ ބުނެ ފައިވާ ކަމަށް ވިދާޅުވި އެވެ. ދެ ވަނަ ބެޗުގެ ތާރީޚް އަންނަ ހުކުރު ދުވަހު ކަށަވަރު ވާނެ ކަމަށްވެސް ވިދާޅުވި އެވެ.
ފުރަތަމަ ބުރުގައި ގެންނަ ކާރުގެ ޖުމްލަ ޢަދަދަކީ 150 ކަމަށް ސަރުކާރުން ކަށަވަރު ކޮށްދީފައިވެ އެވެ.
މިނިސްޓަރު ވިދާޅުވި ގޮތުގައި އެ ޙިދުމަތް އިފްތިތާހުކޮށް ލިމިޑެޓް ޚިދުމަތްތަކެއް މިމަހުގެ 18 ވަނަ ދުވަހު ފެށުމަށް ތައްޔާރުވަމުންދާ ކަމަށެވެ. އަދި ވިދާޅުވީ އެމްޓީސީސީގެ އަމާޒަކީ ޢީދު ދުވަހަށް އެ ޚިދުމަތް ފެށުން ކަމުގައި ވިދާޅުވި އެވެ. "އަޅުގަނޑުމެން މި ބަލަނީ މިހާރު މިއޮތް ތާވަލާއި އެއްގޮތަށް މިކަން ކުރެވޭތޯ," މިނިސްޓަރު ވިދާޅުވި އެވެ.
ސަރުކާރުން ޕްލޭން ކޮށްފައި އޮތީ ފުރަތަމަ ބުރުގައި 150 ކާރު ގެނެސް ޓެކްސީގެ ޚިދުމަތް ފެށުމެވެ. އެމްޓީސީސީއިން ޓެކްސީ ލައިންގެ ޚިދުމަތަށް ނަގަނީ 407 ޑްރައިވަރުންނެވެ. އޭގެތެރެއިން 122 ޑްރައިވަރުން ހަމަޖައްސާނީ ފުލްޓައިމްކޮށެވެ.
އެމްޓީސީސީން ބުނީ ޓެކްސީ ލައިނުގެ ޚިދުމަތް ދޭނީ އިލެކްޓްރިކް ވެހިކަލް (އީވީ) ބޭނުންކޮށްގެން ކަމަށެވެ. ޚިދުމަތް ދޭނީ އެކަމަށް ޚާއްޞަ އެޕްލިކޭޝަނެއް ތައްޔާރުކޮށް ރާއްޖޭން ބޭރުގައި ބޭނުންކުރާ ކާމިޔާބު ބައެއް ޚިދުމަތްތައް ދޭ ގޮތަށެވެ. ރާއްޖޭގައި އަލަށް ފަށާ ޓެކްސީ ލައިނުގެ ޚިދުމަތް 24 ގަޑިއިރު ދޭނެކަމަށް ސަރުކާރުން ވަނީ ބުނެފައެވެ.
