ސްރީ ލަންކާގެ ދެކުނު އައްސޭރި ފަށާ ކައިރި ގައްލޭ ކަނޑުގެ ސަރަހައްދުގައި، އީރާނުގެ ނޭވީ ފްރިގޭޓެއް ކަމަށްވާ ’އައިރިސް ޑެނާ' ގައި ގޮވުމެއް ގޮވައި، ބޯޓު ފެތުމުން ލަންކާ ކަނޑުގެ ސިފައިންނާއި ވައިގެ ސިފައިން ގުޅިގެން ބިޔަ ސަލާމަތް ކުރުމުގެ އޮޕަރޭޝަނެއް ހިންގައިފިއެވެ.

ލަންކާގެ ދިފާއީ ވުޒާރާއިން ބުނީ މަނަވަރުގައި ދެން ތިބި ފަޅުވެރިން ހޯދުމުގެ މަސައްކަތް ކުރަމުން އަންނަ ކަމަށާއި އެ އުޅަނދު އަޑިއަށް ދިޔައީ ލަންކާގެ ދެކުނުން 40 ކިލޯމީޓަރު (25 މޭލު) ބޭރަށް ކަމަށެވެ.

ލަންކާ ޚާރިޖީ ވަޒީރު ވިޖިތާ ހެރަތު ވިދާޅުވީ، 180 ފަޅުވެރިންގެ ޖާގައިގެ ބޯޓުގައި ވަރަށް ބޮޑަށް ޒަޚަމްވެފައިވާ 32 ފަޅުވެރިން ސަލާމަތްކޮށްފައިވާ ކަމަށެވެ. ސަލާމަތްވީ ފަޅުވެރިން ލަންކާ ދެކުނުގެ ކަރަޕަތިޔާ ހޮސްޕިޓަލަށް ގެންގޮސް ފަރުވާ ދެމުން ގެންދާ ކަމަށްވެސް ހެރަތު ވިދާޅުވިއެވެ.

ލަންކާ ކަނޑުގެ ސިފައިންގެ ބޭފުޅަކު ޑެއިލީ މިރާ ނޫހަށް މައުލޫމާތު ދިން ގޮތުގައި، ހާދިސާ ހިނގީ ލަންކާ ފަޅު ތެރޭގައި ކަމަށްވާތީ ވަގުތުން ސިފައިން ހަރަކާތްތެރިވި ކަމަށެވެ. ލަންކާ ދިފާއީ ވުޒާރާ ވިދާޅުވީ ބޯޓުގައި ދެން ތިބި ފަޅުވެރިން ހޯދުމަށް ހޯދާ ފެނުމުގެ ޢަމަލިއްޔާތު ކުރިޔަށް ދާ ކަމަށެވެ.

އައިރިސް ޑެނާ ނިސްބަތްވަނީ މޫޖް ކްލާހު ފްރިގޭޓް ބާވަތަށެވެ. އޭގައި ޚިދުމަތްދެނީ އީރާނު ކަނޑުގެ ސިފައިންގެ ދެކުނު ފްލީޓް ގައެވެ.

ހާދިސާ ހިނގުމުގެ ކުރިން، 'އައިރިސް ޑެނާ' ވަނީ އިންޑިއާ ގެ ވިސާކަޕަޓްނަމްގައި ބޭއްވި މިލާން 2026 މަލްޓިނޭޝަނަލް ނޭވަލް އެކްސަސައިޒް (ފްލީޓް ރިވިއު) ގައި ބައިވެރިވެފައެވެ.

ލަންކާ މަޖިލީހުގެ އިދިކޮޅު މެންބަރަކު ވަނީ މިއީ އީރާނާ ދެކޮޅަށް އެމެރިކާއާއި އިސްރާއީލުން ދެމުން ގެންދާ ހަމަލާތަކުގައި ބޮން އަޅައި ފައްތާލި މަނަވަރެއްތޯ ސުވާލުކުރައްވާފައެވެ. ނަމަވެސް އެ ސުވާލަށް ލަންކާ ސަރުކާރުން ޖަވާބެއް ނުދެއެވެ.

އެމެރިކާއާއި އިސްރާއީލު ގުޅިގެން އީރާނަށް ހަމަލާ ދެމުން އަންނައިރު، އީރާނުންވެސް އަންނަނީ ރައްދުގައި ވަރުގަދަ ހަމަލާތަކެއް ދެމުންނެވެ.