ސަރުކާރުން ހިންގާ އެންމެނަށް ބޯހިޔާވަހިކަމުގެ މަޝްރޫއުގެ ދަށުން "ބިންވެރިޔާ" ހާއްސަ ސްކީމެއްގެ ދަށުން ގޯތި ދޭ އުސޫލު މިއަދު އާންމުކޮށްފިއެވެ.
ހައުސިން މިނިސްޓްރީން މިއަދު އާއްމުކުރި "ބިންވެރިޔާ" ހާއްސަ ސްކީމްގައިވާ ގޮތުން، މި އުސޫލުގެ ދަށުން ގޯތި ދޫކުރެވޭނީ ރަސްމާލެއިންނެވެ.
ދޫކުރާނެ ގޯތީގެ ބޮޑުމިނަކީ 1,250 (ބާރަ ސަތޭކަ ފަންސާސް) ގޯތީގެ ބޮޑުމިން އަކަފޫޓެވެ.
"ބިންވެރިޔާ" ހާއްސަ ސްކީމްގައިވެސް ދެ ކެޓަގަރީއެއް ހިމެނެއެވެ.
ކެޓަގަރީ އެކެއްގައި ހިމެނެނީ، ބިންވެރިޔާ ސްކީމުގެ ދަށުން ޖޮއިންޓް އެޕްލިކޭޝަން ހުށަހަޅައިގެން ގޯތި ލިބިފައިވާ ފަރާތްތަކެވެ. ދެވަނަ ކެޓަގަރީގައި ހިމެނެނީ، ފުލެޓެއް ލިބިފައި އޮތުމުގެ ސަބަބުން ބިންވެރިޔާ ސްކީމަށް ކުރިމަތި ނުލެވުނު ފަރާތްތަކެވެ.
މި ސްކީމަށް ކުރިމަތިލާ ފަރާތްތަކުގެ ޝަރުތުތަކާއި، ޕޮއިންޓް ލިބޭނެ ގޮތްތަކާއި، ހުށަހެޅޭނެ ލިއުންތަކާއި ހުށަނޭޅޭނެ ލިއުންތައް ވަނީ މި އުސޫލާއެއްކޮށް ސަރުކާރުގެ ގެސެޓްގައި ޝާއިއު ކޮށްފައެވެ.
