ބުރުކީނާ ފާސޯގެ ލީޑަރު ކެޕްޓަން އިބްރާހީމް ތަރައުރޭ، އީރާނަށް ފުރިހަމަ އަސްކަރީ އެހީ ފޯރުކޮށްދިނުމަށް ތައްޔާރަށް ހުންނެވި ކަމަށް ވިދާޅުވެ، ހުޅަނގުގެ ބާރުތަކަށް ވަރުގަދަ އިންޒާރެއް ދެއްވައިފިއެވެ.
ތަރައުރޭ ވިދާޅުވީ، އީރާނުން އެދިއްޖެ ނަމަ، ބުރުކީނާ ފާސޯގެ އަސްކަރިއްޔާ އެ ގައުމުގެ ދިފާއުގައި ނުކުތުމަށް ތައްޔާރަށް ހުރި ކަމަށެވެ. ހަމަ އެ ހިތާ، ދުނިޔޭގެ އެކި ކަންކޮޅުތަކުގައި، ހުޅަނގުގެ ބޮޑެތި ބާރުތަކުން، ހާއްސަކޮށް އެމެރިކާ، އަމިއްލަ ފައިދާއަށް ހިންގަމުންދިޔަ ކަންކަމުގެ ދުވަސްތައް ނިމުމަކަށް ހިނގައްޖެ ކަމަށް ތަރައުރޭ ވިދާޅުވިއެވެ.
މި ބަޔާން ތަރައުރޭ ދެއްވީ، ދެ ގައުމުގެ ދެމެދު ގުޅުން ބަދަހިވަމުންދާ ދަނޑިވަޅެއްގައެވެ. ދާދި ފަހުން ބުރުކީނާ ފާސޯގެ ޑިފެންސް މިނިސްޓަރު އީރާނަށް ކުރެއްވި ރަސްމީ ދަތުރުފުޅުގައި، ދެ ގައުމުގެ ދެމެދު އަސްކަރީ އަދި އިގްތިސާދީ ގުޅުން ބަދަހިކުރުމާ ގުޅޭ ގޮތުން ވަރަށް ފުޅާ ދާއިރާއެއްގައި މަޝްވަރާ ކޮށްފައިވެއެވެ.
ތަޖްރިބާކާރުން ފާހަގަ ކުރައްވާ ގޮތުގައި، ފަހަކަށް އައިސް ފްރާންސާ އަދި އެމެރިކާގެ އަސްކަރީ ނުފޫޒުން ދުރަށް ޖެހި، ސިޔާދަތު ހިމާޔަތް ކުރުމަށް ގިނަ ކަންތައްތަކެއް ކުރަމުން ގެންދާ ބުރުކީނާ ފާސޯ، ހުޅަނގާ ދެކޮޅަށް ގޮންޖެހުން ދަނީ ބަދަހިވަމުންނެވެ.
ތަރައުރޭގެ މި ވާހަކަތަކަކީ ބައިނަލްއަގުވާމީ ސިޔާސީ ދާއިރާ ބައްޓަންވަމުންދާ ގޮތުގެ ސާފު ހެއްކެއް ކަމަށް ދިރާސާ ކުރައްވާ ފަރާތްތަކުން ދެކެވަޑައިގަންނަވައެވެ.
