އިސްރާއީލުގެ އުދުވާނީ ހަމަލަތަކާ ދެކޮޅަށް، އީރާނަށް ފުރިހަމަ އަސްކަރީ އެހީ ފޯރުކޮށްދިނުމަށް ތައްޔާރަށް ހުރިކަން، އުތުރު ކޮރެއާގެ ލީޑަރު ކިމް ޖޮންގް އުން ހާމަ ކުރައްވައިފިއެވެ.
އުތުރު ކޮރެއާގެ އަސްކަރީ އިސްވެރިންނާ ބޭއްވި ބައްދަލުވުމެއްގައި ވާހަކަ ދައްކަވަމުން ކިމް ވިދާޅުވީ، އީރާނުން އެދިއްޖެ ނަމަ، އިސްރާއީލާ ދެކޮޅަށް ބޭނުންކުރެވޭ ފެންވަރުގެ އެންމެ ޒަމާނީ މިސައިލްތައް ވަގުތުން ފޯރުކޮށްދެވޭނެ ކަމަށެވެ.
ހަމަ އެ ބައްދަލުވުމުގައި ކިމް ވިދާޅުވީ، އިސްރާއީލަކީ ދުނިޔޭގެ ޗާޓުން ފޮހެލަންޖެހޭ ތަނެއް ކަމަށާއި، އެކަމަށް އެންމެ މިސައިލެއްވެސް ފުދޭނެ ކަމަށެވެ.
ތަޖުރިބާކާރުން ސިފަ ކުރައްވާ ގޮތުގައި، ފަހުގެ ތާރީހެއްގައި، މެދުއިރުމަތީ މަސްރަހާ ގުޅުވައިގެން، އިސްރާއީލާއި އެމެރިކާއަށް، އުތުރު ކޮރެއާ ދިން އެންމެ ވަރުގަދަ ބިރު ދެއްކުމެވެ.
ކިމް ވިދާޅުވީ، އެމެރިކާ އާއި އިސްރާއީލުން ގުޅިގެން އީރާނާ ދެކޮޅަށް ހިންގަމުންދާ ލާއިންސާނީ ހަމަލަތަކަކީ، ދުނިޔޭގެ ހަމައިގެ ހިތަކަށް ބަލައިގަނެވޭނެ ކަންކަމެއް ނޫން ކަމަށެވެ. އަދި، ކޮންމެ ހާލަތެއްގައިވެސް، އިސްލާމީ ގައުމުތަކުގެ ދިފާއުގައި ތެދުވުމަށް، އުތުރު ކޮރެއާ އޮތީ ސީދާ ތައްޔާރަށްކަން ކިމް ފާހަގަ ކުރެއްވިއެވެ.
މި ނިންމުމާ ގުޅިގެން ހުޅަނގުގެ ގައުމުތަކަށް ވަނީ ބޮޑު ސިހުމެއް ލިބިފައެވެ. ދިރާސާ ކުރައްވާ ފަރާތްތަކުން ދެކޭ ގޮތުގައި، އީރާނާއި އުތުރު ކޮރެއާގެ އަސްކަރީ ގުޅުން ވަރުގަދަ ވުމަކީ، ސަރަހައްދީ ބާރުގެ ހިނގުން ބަދަލުކޮށްލާފާނެ ކަމެކެވެ. އީރާނުން ރަސްމީ ބަހެއް ހާމަ ކޮށްފައި ނުވި ނަމަވެސް، ދެ ގައުމުގެ ގުޅުން ބަދަހި ވަމުން ދިއުމަކީ ސަރަހައްދީ ހަމަ ޖެހުމަށް އިތުރު ނުރައްކަލެއް ކަމަށް ދުނިޔޭގެ ތަޖްރިބާކާރުން ފާހަގަ ކުރައްވައެވެ.
