މާފަންނު ރިމްލާސްގޭގައި ރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން އެގޭގައި ދިރިއުޅޭ އާއިލާއަށް، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)ން ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަން ފޯރުކޮށްދީފިއެވެ.
އެންޑީއެމްއޭއިން ބުނީ ރޭގެ އަލިފާނުގެ ހާދިސާއާ ގުޅިގެން އެ ގޭގައި ދިރި ނޫޅެވޭ ވަރަށް އެ ގެ އަނދާފައިވާ ކަމަށެވެ.
އެހެންކަމުން އެގޭގެ ވެރިފަރާތުގެ އާއިލާގެ 7 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށާއި، އެއީ 18 އަހަރުން ދަށުގެ 3 ކުޑަކުދިންނާއި، އަންހެނަކާއި 3 ފިރިހެނުން ކަމަށްވެސް ބުނެފައިވެއެވެ.
މި އާއިލާއަށް ވަގުތީ ބޯހިޔާވަހިކަން ފޯރު ކޮށްދީފައިވަނީ 5 ދުވަހުގެ މުއްދަތަކަށް ކަމަށް އެންޑީއެމްއޭއިން ބުނެޏެވެ.
މޯލްޑިވްސް ނޭޝަނަލް ޑިފެންސް ފޯސް، (އެމްއެންޑީއެފް) އިން ބުނީ ރޭގެ އަލިފާނުގެ ހާދިސާގެ ރިޕޯޓް ލިބުނީ މެންދަމު 03:06 ހާއިރު ކަމަށެވެ. މި ރިޕޯޓް ލިބުމާއެކު އެމްއެންޑީއެފް ފަޔާ އެންޑް ރެސްކިޔު ސާވިސްގެ މާލޭ ފަޔާ ސްޓޭޝަނުގެ ފަޔާ ފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކުރިއެވެ. ސިފައިން ކުރި މަސައްކަތުން ރޯވި އަލިފާން އެއްކޮށް ނިއްވާލެވުނީ ފަތިހު 04:12 ހާއިރެވެ.
މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައިވާ ކަމުގެ މައުލޫމާތެއް ނުލިބެއެވެ.
