އެމެރިކާގެ ރައީސް ޑޮނަލްޑް ޓްރަމްޕް، އީރާނާ ދެކޮޅަށް ފަށާފައިވާ "ރައިޗަސް މިޝަން" ނުވަތަ އިންސާފުވެރި މަސައްކަތް ހުރިހާ މަގްސަދުތަކެއް ހާސިލްވަންދެން ކުރިއަށް ގެންދަވާނެ ކަމަށް ވައުދުވެވަޑައިގެންފިއެވެ.
އަދި މި ކުރިމަތިލުންތަކުގެ ތެރޭގައި އިތުރު އެމެރިކާ ސިފައިން މަރުވުމަކީ އެކަށީގެންވާ ކަމެއް ކަމަށްވެސް އެމަނިކުފާނު ވިދާޅުވިއެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ 'ޓްރޫތު ސޯޝަލް' ގައި އާންމުކުރެއްވި ވީޑިއޯއެއްގައި ވިދާޅުވީ، ދުރު ރާސްތާގެ މިސައިލާއި ނިއުކްލިއާ ހަތިޔާރު ހުރި އީރާނުގެ ސަރުކާރަކީ ކޮންމެ އެމެރިކާ ރައްޔިތަކަށް އޮތް ބިރެއް ކަމަށެވެ. މި ހަމަލާތަކަކީ އެމެރިކާއަށް އޮތް ނުރައްކަލަކުން ސަލާމަތްވުމަށް ކުރާ ކަމެއްގެ ގޮތުގައި ޓްރަމްޕް ވަނީ ސިފަކުރައްވާފައެވެ.
މިދިޔަ ހޮނިހިރު ދުވަހު އެމެރިކާއިން ދިން ހަމަލާތަކުގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އާއި އެ ގައުމުގެ އިސް ވެރިންތަކެއް ވަނީ އަވަހާރަކޮށްލާފައެވެ. ނަމަވެސް، އީރާނުން އެމެރިކާއަށް ހަމަލާދެވޭ ފަދަ ދުރު ރާސްތާގެ މިސައިލް އުފައްދާ ކަމުގެ ނުވަތަ ނިއުކްލިއާ ހަތިޔާރާ ގާތަށް ގޮސްފައިވާ ކަމުގެ އެއްވެސް ހެއްކެއް މިހާތަނަށް އެމެރިކާއިން ދައްކާފައެއް ނުވެއެވެ.
އީރާނުން ބަދަލުހިފުމުގެ ގޮތުން ދިން ހަމަލާތަކުގައި އެމެރިކާގެ ތިން ސިފައިން މަރުވެފައިވާކަން ކަށަވަރުވެފައިވާއިރު، ޓްރަމްޕް ވަނީ އެމީހުންގެ ވަކިވުމާ މެދު ހިތާމަފާޅުކުރައްވާފައެވެ. "މި ކަން ނިމުމުގެ ކުރިން ހިތާމައާއެކު ބުނަންޖެހެނީ އިތުރު ސިފައިން މަރުވުން އެކަށީގެންވާ ކަމަށް،" ޓްރަމްޕް ވިދާޅުވިއެވެ. އަދި އެމެރިކާއިން އެމީހުންގެ މަރުގެ ބަދަލުހިފާނެ ކަމަށްވެސް ވިދާޅުވިއެވެ.
އީރާނުން އަބަދުވެސް ބުނަމުންދަނީ އެ ގައުމުން ނިއުކްލިއާ ހަތިޔާރު އުފައްދަން މަސައްކަތް ނުކުރާ ކަމަށެވެ. ތަޖުރިބާކާރުން ލަފާކުރާ ގޮތުގައި އީރާނުން އެފަދަ ހަތިޔާރެއް އުފައްދަން ބޭނުންވި ނަމަވެސް، އެކަމަށް އަދި ގިނަ އަހަރުތަކެއް ނަގާނެއެވެ. އެމެރިކާއިން މި ހަމަލާތައް ދީފައިވަނީ އީރާނުގެ ނިއުކްލިއާ ޕްރޮގްރާމާ ގުޅޭގޮތުން ދެ ގައުމުގެ ދެމެދުގައި މަޝްވަރާތައް ކުރިއަށްދަނިކޮށެވެ.
މި ހަރުކަށި ބަސްމަގުގެ ކުރިން ދެއްވި ބައެއް އިންޓަވިއުތަކުގައި ޓްރަމްޕް ވަނީ ޑިޕްލޮމެޓިކް ހައްލަކަށް ފުރުސަތު އޮތް ކަމަށް އިޝާރާތް ކުރައްވާފައެވެ.
އެގޮތުން އީރާނުގެ އާ ލީޑަޝިޕާ ވާހަކަ ދައްކަން ތައްޔާރަށް ހުންނެވި ކަމަށް 'ދަ އެޓްލާންޓިކް' މެގަޒިންއަށް ދެއްވި އިންޓަވިއުއެއްގައި ޓްރަމްޕް ވިދާޅުވެފައިވެއެވެ.
