ދިވެހިރާއްޖޭގެ ދެކުނުގެ އަތޮޅުތަކުގެ ދަތުރުފަތުރުގެ ނިޒާމު ހަރުދަނާކުރުމަށްޓަކައި، ގައުމީ އެއާލައިން "މޯލްޑިވިއަން" އިން ވައިގެ ދަތުރުފަތުރުގެ ޚިދުމަތްތައް އިތުރަށް ފުޅާކޮށްފިއެވެ.
މިއީ ސަރަޙައްދީ ވައިގެ ދަތުރުފަތުރުގެ ގުޅުން ބަދަހިކުރުމަށްޓަކައި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ކުރަމުންދާ މަސައްކަތްތަކާ އެއްގޮތްވާ ގޮތުގެ މަތިން ނިންމި ނިންމުމެކެވެ.
މޯލްޑިވިއަނުން ދެކުނުގެ އަތޮޅުތައް ފުރޮޅުލީ ކުދި ބޯޓުތަކުގައި ދަތުރުތައް ފެށުމުގެ ގޮތުން މިއަދު ހާއްސަ ރަސްމިއްޔާތެއް ބާއްވާފައިވާއިރު، ހިދުމަތް އިފްތިތާހުކޮށްދެއްވީ މޯލްޑިވިއަންގެ މެނޭޖިން ޑިރެކްޓަރު އިބްރާހިމް އިލްޔާސް، ހޯމް މިނިސްޓަރު އަލީ އިހުސާން، ޓްރާންސްޕޯޓް މިނިސްޓަރު މުހައްމަދު އަމީން، ހައުސިން މިނިސްޓަރު، އަބްދުﷲ މުއްތަލިބްގެ އިތުރުން ފޮރިން މިނިސްޓަރު، އަބްދުﷲ ހަލީލެވެ.
މޯލްޑިވިއަނުން ވިދާޅުވީ، ފުޅާކުރެވުނު ޚިދުމަތްތަކުގެ ސަބަބުން ދެކުނުގެ އަތޮޅުތަކުގެ މެދުގައި އޮތް ދަތުރުފަތުރުގެ ގުޅުން އިތުރަށް ވަރުގަދަވެ، ގއ. އަތޮޅާއި، ގދ. އަތޮޅު އަދި ފުވައްމުލައް ސިޓީގެ މެދުގައި ދަތުރުފަތުރުކުރުމަށް ބޮޑެތި ލުއިފަސޭހަތަކެއް ލިބިގެންދާނެ ކަމަށެވެ. ހަމައެއާއެކު، މި އާފެށުމާއެކު އައްޑޫސިޓީގެ ގަމަކީ މުޅި ދެކުނުގެ ސަރަހައްދު ގުޅުވައިދޭ ވައިގެ ދަތުރުފަތުރުގެ މައި މަރުކަޒެއްގެ ގޮތުގައި އިތުރަށް ހަރުދަނާވެގެންދާނެ ކަމަށް މޯލްޑިވިއަނުން ވިދާޅުވިއެވެ.
މިއަދު ފެށުނު ހިދުމަތާއެކު، ދެކުނުގެ އަތޮޅުތަކުގައި ދިރިއުޅޭ ރައްޔިތުންނަށް ރަށްރަށުގެ މެދުގައި ކުރާ ދަތުރުފަތުރުތައް މިހާރަށްވުރެ އިތުބާރު ހުރި، ފަސޭހަ އިންތިޒާމެއްގެ ތެރެއިން ހަމަޖެހިގެންދާނެއިރު، ވަޒީފާއާއި ތަޢުލީމުގެ އިތުރުން ދިރިއުޅުމުގެ ޒަރޫރީ ބޭނުންތަކަށް ކުރަންޖެހޭ ދަތުރުތަކަށް ބޮޑު ލުޔެއް ލިބިގެންދާނެ ކަމަށް މޯލްޑިވިއަނުން ދެކެއެވެ.
މިކަމުގެ ސަބަބުން ގަން މެދުވެރިކޮށް ސިއްހީ ފަރުވާއަށް ކުރާ ދަތުރުތައް ރަނގަޅުވެ، މޫސުމަށް ބަރޯސާވެފައިވާ ކަނޑު ދަތުރު ކުރުން މަދުވާނެ. އަދި ފަތުރުވެރިން އުފުލުމަށް ބޮޑު އެހީއަކަށްވާނެ" މޯލްޑިވިއަނުން ވިދާޅުވިއެވެ.
ދެކުނުގެ ދަތުރުތަކާއި އަގުތައް:
- ގަން-ކާޑެއްދޫ: ހަފްތާއަކު ހަތަރު ދުވަހު، އެއްކޮޅު އަގަކީ 900 ރުފިޔާ
- ގަން-ފުވައްމުލައް: ހަފްތާއަކު 7 ދުވަހު، އެއްކޮޅު އަގަކީ 500 ރުފިޔާ
- ފުވައްމުލައް-ކާޑެއްދޫ: ހަފްތާއަކު ހަތަރު ދުވަހު، އެއްކޮޅު އަގަކީ 650 ރުފިޔާ
- ފުވައްމުލައް-ކޫއްޑޫ: ހަފްތާއަކު ތިން ދުވަހު، އެއްކޮޅު އަގަކީ 650 ރުފިޔާ
- ގަން-ކޫއްޑޫ: ހަފްތާއަކު ތިން ދުވަހު، އެއްކޮޅު އަގަކީ 900 ރުފިޔާ
މޯލްޑިވިއަނުން ވިދާޅުވީ، ދެކުނުގެ އަތޮޅުތައް ގުޅުވާލުމުން، ގަން އިންޓަނޭޝަނަލް އެއާޕަށް އަންނަ ފަތުރުވެރިންނަށް ދެކުނުގެ އެކި މަންޒިލްތަކަށް ދަތުރު ކުރުމަށް ފަސޭހަވެ، ރިސޯޓުތަކަށާއި ގެސްޓްހައުސްތަކަށް ދިއުމަށް ފަސޭހަވެގެންދާނެ ކަމަށެވެ.
މި ހިދުމަތް މިއަދު ފަށާފައިވާއިރު، ބުކިން ހެދުމުގެ ފުރުސަތު މިމަހުގެ 22 އިން ފެށިގެން ވަނީ ހުޅުވާލެވިފައެވެ. އަދި ރަސްމީކޮށް ދަތުރުތައް ފެށުމަށް ހަމަޖެހިފައިވަނީ އަންނަ މަހުގެ 1 ވަނަ ދުވަހުން ފެށިގެންނެވެ.
