ސްޕެނިޝް ލަލީގާގައި ރޭ ރެއާލް އޮވިއޭޑޯ އާއި ދެކޮޅަށް ބާސެލޯނާ ކުޅުނު މެޗު 3-0 ގެ ނަތީޖާއަކުން ބާސެލޯނާ މޮޅުވެ ތާވަލުގެ އެއްވަނައަށް އަލުން އަރައިފި އެވެ.
މި މެޗުން ބާސެލޯނާ މޮޅުވުމާއިއެކު އެ ޓީމަށް ވަނީ މިހާތަނަށް ކުޅުނު 21 މެޗުން ޖުމްލަ 52 ޕޮއިންޓާއެކު ތާވަލުގެ އެއްވަނަ އަށް އަރާފަ އެވެ. ދެވަނައިގައި އޮތް ރެއާލް މެޑްރިޑަށް ވުރެ އެޓީމު ކުރީގައި އޮތީ އެންމެ ޕޮއިންޓެެއްގެ ތަފާތުންނެވެ.
ބާސެލޯނާގެ ސްޕޮޓިފައި ކޭމްޕް ނޫ ގައި އެތައް ހާސް ސަޕޯޓަރުންގެ ކުރިމަތީގައި ކުޅުނު މި މެޗުގެ ފުރަތަމަ ހާފުގައި ލަނޑެއް ކާމިޔާބު ކުރެވިފައިނުވި ނަމަވެސް ދެވަނަ ހަފުގެ ކުޅުން ފެށުނުތާ ހަތްވަނަ މިނިޓުގައި ޑެނީ އޮލްމޯ ވަނީ ގޯލެއް ޖަހައި އެ ޓީމަށް ލީޑު ނަަގައިދީފަ އެވެ.
އަދި އޭގެ ފަސް މިނިޓު ފަހުން މެޗުގެ 57 ވަނަ މިނިޓުގައި ރަފީނިއާ ވަނީ އިތުރު ލަނޑެއް ޖަހައި ލީޑު އިތުރަށް ފުޅާކޮށްދީފަ އެވެ.
މި މެޗުގައި ބާސެލޯނާ އިން ޖެހި ތިންވަނަ ލަނޑަކީ ޑެނީ އޮލްމޯ ދިން ޕާހަކުން ލަމީން ޔަމާލް ކާމިޔާބުކޮށްދީފައިވާ ލަނޑެކެވެ.
ބާސެލޯނާ މި މެޗުން މޮޅުވިއިރު މިއީ ހެންސީ ފްލިކްގެ އިރުޝާދުގެ ދަށުން އެ ޓީމު އަމިއްލަ ދަނޑުގައި މޮޅުވި ދިހަވަނަ މެޗެވެ. މީގެ ކުރިން އެ ޓީމު އަމިއްލަ ދަނޑުގައި މި އަދަދަށް މޮޅުވެފައިވަނީ 2019 ވަނަ އަހަރު އެވެ.
