އެމެރިކާގެ އަސްކަރިއްޔާއިން ސޫރިއާގައި ހިފާފައިވާ ސަރަހައްދުތަކުން އެ ގައުމުގެ ސިފައިން ބޭލުމުގެ މަސައްކަތް ފަށައިފިއެވެ. މި ނިންމުމަކީ ސޫރިއާގައި ތިބި އެމެރިކާގެ ގާތްގަނޑަކަށް 1،000 އެއްހާ ސިފައިން އެއްކޮށް ބޭލުމަށް ކުރަމުންދާ މަސައްކަތުގެ ބައެއް ކަމަށް ރިޕޯޓްތައް ބުނެއެވެ.

މި ނިންމުން ނިންމާފައިވަނީ އެމެރިކާގެ ބައިވެރިއެއްގެ ގޮތުގައި އޮތް "ސީރިއަން ޑިމޮކްރެޓިކް ފޯސަސް" (އެސް.ޑީ.އެފް) ބަލިކަށިވެ، އެ ޖަމާއަތުގެ ކޮންޓްރޯލް ގެއްލެން ފެށުމާ ގުޅިގެންނެވެ. އެސް.ޑީ.އެފް އަކީ ސޫރިއާގެ ސަރަހައްދުތައް ހިފެހެއްޓުމަށާއި، އައި.އެސް ޖަމާއަތުގެ ހަނގުރާމަވެރިން ހައްޔަރުކޮށްގެން ބެލެހެއްޓުމުގައި އެމެރިކާއިން ބޭނުންކުރި މައިގަނޑު ބާރެވެ. ނަމަވެސް އެ ޖަމާއަތުގެ ބާރު ކެނޑުމުން، އެމެރިކާ ސިފައިންނަށް އެ ސަރަހައްދުގައި ދެމިތިބުމަށް ވަނީ ގޮންޖެހުންތަކެއް ކުރިމަތިވެފައެވެ.

މި ބަދަލުތަކާ ގުޅިގެން، ސޫރިއާގައި ތިބި އައި.އެސްގެ ކުށްވެރިން އިރާގަށް ބަދަލުކުރުމުގެ މަސައްކަތްވެސް އެމެރިކާ ސިފައިން މިހާރު ވަނީ ފަށާފައެވެ. ސަލާމަތީ މަޝްރަހަށް އަންނަ ބަދަލުތަކަށް ރިއާޔަތްކޮށް، ކުރިއަށް އޮތް ދުވަސްތަކުގައި އެތައް ހާސް ކުށްވެރިންނެއް ސޫރިއާއިން އިރާގަށް ބަދަލުކުރާނެ ކަމަށް ބެލެވެއެވެ.

ވޯލް ސްޓްރީޓް ޖާނަލް، ރޮއިޓާސް އަދި ޖަރޫސަލަމް ޕޯސްޓް ފަދަ ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުގައި، މި ފިޔަވަޅަކީ ސޫރިއާގެ މަޝްރަހަށް އަންނަ ބޮޑު ބަދަލެކެވެ. އެމެރިކާ ސިފައިން ސޫރިއާއިން ފޭބުމަކީ އެ ސަރަހައްދުގެ ސިޔާސީ އަދި އަސްކަރީ ބާރުތަކަށް ބޮޑެތި ބަދަލުތަކެއް އަތުވެދާނެ ކަމެއް ކަމަށް މުހައްލިލުން ދެކެއެވެ.