ރޯދައިގެ މައިގަނޑު ބޭނުމަކީ ތަޤްވާވެރިކަމަށް ތިމާމީހާ ވާސިލްވުމެވެ. ގިނަ މީހުން ތަޤްވާ މާނަކުރަނީ ﷲގެ ބިރުވެތިވުން ކަމަށެވެ. އެކަމަކު ޙަޤީޤީ މާނައަކީ ކޮބާހެއްޔެވެ؟
ދަރިވަރަކު އެއްދުވަހު ސުވާލެއްކުރިއެވެ. "އަހަރެން ﷲ سبحانه وتعالى އަށް ބިރުގަންނަންވީ ކީއްވެހެއްޔެވެ؟" ޖަވާބަކީ ވަރަށް މާނަ ފުން ޖަވާބެކެވެ. ﷲ سبحانه وتعالى އަށް ޙަޤީޤަތުގައި ބިރުވެތިމުވަކީ އެކަލާނގެއަށް ބިރުވެތިވުމެއް ނޫނެވެ. އަދި ކިއެއްތަ ތިމާ އާއި ﷲ سبحانه وتعالى ދެމެދު އޮންނަ ގުޅުން ކެނޑިދާނެތީ ގަންނަންޖެހޭ ބިރެވެ.
ވަރަށް ކުޑަ މިސާލަކަށް ވިސްނާލަމާ ހިނގާށެވެ. އަހަރެމެން ލޯބިވާ މީހަކާ މެދު އޮންނަ ގުޅުމަށް ބަލާލަމާ ހިނގާށެވެ. އެގުޅުމަށް ބުރޫއަރާކަށް ގެއްލުމެއް ވާކަށް ބޭނުމެއް ނުވާނެއެވެ. އެގުޅުމަށް ހީނަރުކަމެއް ނުގެނެސް ތާއަބަދަށް ބާއްވަން ބޭނުންވާނެއެވެ. އަދި އެގުޅުމަށް ގެއްލުމެއް ވެދާނެ ފަދަ ކަންކަމުން ދުރުވާނެއެވެ. އަހަރެމެންނާއި ﷲ سبحانه وتعالى ދެމެދު ގުޅުންވެސް ހަމަ މިފަދައެވެ. އަހަރެމެންނަކީ ﷲ سبحانه وتعالى ދެމެދުގައިވާ ގުޅުން ދެމެހެއްޓުމަށް މަސައްކަތް ކުރާ ބައެއްކަމުގައި ލައްވާށިއެވެ.
ހުރިހާ އެއްޗެއް ވަރަށް ކުޑަ އަގެއްގައި ލިބޭ ބޮޑު ސޭލެއް ޚިޔާލު ކޮށްލާށެވެ. ބްލެކް ފުރައިޑޭ ކަހަލަ ޑީލްތަކަށް އިންތިޒާރުކޮށް، އަގުތަށް ބަލައި، ބޭނުންވާ ތަކެތި ހޯދުމަށް އަހަރެމެން ކެއްމަދުވެފައި ތިބެމެވެ. ރަމަޟާން މަހަކީ އެއަށްވުރެވެސް ބޮޑު ސޭލެކެވެ. މި މާތް މައްސަރުގައި ﷲ سبحانه وتعالى ގެ ރަޙުމަތާއި ފުއްސެވުން އިތުރުވެގެން ވެއެވެ. ނަމަވެސް އަހަރެމެންގެ ތެރެއިން ގިނަ މީހުން މި ރަނުގެ ފުރުޞަތު ހޯދަން އެކަށީގެންވާ މަސައްކަތެއް ނުކުރެވެއެވެ.
ﷲ سبحانه وتعالى އީ ގިނަގިނައިން ޢަފޫކުރައްވާ ރަސްކަލާނގެއެވެ. މިކަމުން އަހަރެމެންނަށް ލިބޭ ޢިބުރަތަކީ ފާފަތައް ކިތަންމެ ގިނަ ކަމުގައި ވިޔަސް އެކަލާނގެ ރަޙުމަތުގެ ދޮރުކޮޅުތައް އަބަދާ އަބަދު އަހަރެމެންނަށް ހުޅުވިފައިވާކަމެވެ. ނަމަވެސް ޝައިތާނާ އަހަރެމެންގެ ހިތްތަކަށް ވައްދަނީ ޝައްކާއި ވަހުމުގެ ވަސްވާސްތަކެވެ. ފާފައެއް ކުރެވުމުން ތަޢުބާ ވުމަށްފަހު، ޝައިތާނާ އަހަރެމެންނަށް ހިތަށް ވައްދާ ވަސްވާހަކީ ހަމަ ޙަޤީޤަތުގައިވެސް ﷲ سبحانه وتعالى އެ ފާފަ ފުއްސަވައިފިތޯ؟ މިކަހަލަ ސުވާލު ތަކެވެ. އަހަރެމެން ހެޔޮ ޢަމަލުތައް ކުރުމަށް ލޯބި ކުރުމާއި ނުބައި ކަންތައްތަކުން ދުރުހެލިވާން މަސައްކަތް ކުރުމަކީ ފާފަތައް ފުއްސަވާ ކަމުގެ ނިޝާނެކެވެ.
މި ފެށޭ ރަމަޟާން މަހު އަހަރެމެންގެ ވަގުތު ޙިކުމަތްތެރިކަމާއިއެކު ބޭނުންކުރަމާ ހިނގާށެވެ. މަޢާފު ކުރުން ގިނަކޮށް އަޅުކަންތަކާއި ޒިކުރު ކުރުން ގިނަ ކުރަމާ ހިނގާށެވެ. އޭރުން ތިބާއާއި ތިބާގެ ރައްބާ ދެމެދުވާ ގުޅުން ވަރުގަދަ ވާނެއެވެ. މި ބަރަކާތްތެރި މަހުގެ ފައިދާ އެންމެ ރަނގަޅު ގޮތުގައި ނަގައި ، ސާފު ހިތަކާއިގެން މި މަހާ ބައްދަލުކުރާ މީހުންގެ ތެރޭގައި އަހަރެމެން އެންމެން ލައްވާށި. އާމީން
